İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 106 Hüküm no: 33 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hanım bt. Mehmed Bey’in Esirci İslam Beşe b. Ali’de olan alacağının bir kısmı devlet tarafından ödendiğinden hapis olan İslam’ın serbest bırakıldığı İşbu eyyâm-ı mübârekede es-sadakatü tereddü’l-belâ ve tezîdü’l-ömr mazmûnları ile amel buyurulup ihrâz-ı rızâ-yı melik-i Gaffâr ve isticlâb-ı ed‘iyye-i hayriye-i ashâb-ı ıztırâr için tesâdduk buyurulmağla sicn-i sultânîde düyûn-ı müsbite için mahbûs olan fukarâ ve zu‘afânın garîmleri yedlerinde olan hücec-i şer‘iye mûcebince deynlerinin birer mikdârı cânib-i mîrîden tesâdduk ve edâ için fermân-ı âlî sâdır olmağla imtisâlen-leh kıbel-i şer‘den irsâl olunan Ebûbekir Efendi mahmiye-i İstanbul’da Baba Cafer zindânına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde derûn-ı hüccetde ismi mastûr olan İsmihan Hanım bt. Mehmed Bey tarafından husûs-ı âti’z-zikre vekîl olduğu zâtı ma‘rifet-i şer‘iye ile ârifân akribâsından Mehmed Çelebi b. Fethullah ve el-Hâc Hasan b. Mehmed şehâdetleriyle şer‘an sâbit olan Emetullah bt. Mehmed nâm hatun meclis-i ma‘kūd-ı mezbûrda derûn-ı hüccetde mastûrü’l-ism olup sicn-i mezbûrda mahbûs olan İslâm b. Hüseyin nâm kimesne mahzarında bi’l-vekâle ikrâr-ı tâm ve takrîr-i kelâm edip işbu derûn-ı hüccetde mastûr olduğu vech üzere iki re’s gulâmın kıymet-i şer‘iyeleri olan iki yüz on guruş için merkūm İslâm sicn-i mezbûrda mahbûs iken meblağ-ı mezbûrun yüz yirmi guruşunu mukaddemâ müvekkile-i mezbûra edâ ve teslîm edip doksan guruş deyni bâkī kalmışidi. Hâlâ meblağ-ı bâkī-i mezbûrun otuz iki guruş ve bir rub‘unu taraf-ı şehriyârîden tesâdduk ve ihsân olunan meblağdan husûs-ı merkūma memûr olan Ebûbekir Ağa’dan ahz u kabz edip mâ‘adâ da‘vâsından mezkûr İslâm’ın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mezbûr Ebûbekir Efendi mahâllinde ketb u tahrîr edip ba‘dehû ma‘an ba‘s olunan Ali b. Bali ve Mehmed b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis min-şehri Recebi’l-ferd li-sene seb‘a ve mie ve elf. Şuhûdü’l-hâl: es-Seyyid Şükrullah Efendi el-kâtib, es-Seyyid Hasan Efendi el-kâtib, es-Seyyid Ali Efendi el-kâtib, Subaşı Mehmed Ağa b. ( ), Asesbaşı Mehmed Ağa b. ( ), Veznedâr Ali Çelebi, Edirneli Hüseyin b. ( ), Bosnevî Salih b. Mehmed, Rasûl Beşe b. Şaban. El-emru kemâ sicni’l-kitâb nemakahü’l-fakīr ileyhi azze şânühu te‘âlâ. Mustafa b. İsa el-müvellâ-hilâfeten bi-Medîne-i Kostantıniyyeti’l-mahmiye gufira lehümâ