İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 107 Hüküm no: 34 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Mehmed b. Mustafa’nın koyun ve kuzu bedelinden Yahudi Kasap Arslan v. Avraham’daki alacağının tahsili Tersâne-i âmire’de olan kalyoncu tâifesinden bâ‘isü’l-kitâb Mehmed b. Mustafa nâm kimesne meclis-i şer‘-i şerîf-i enverde yahudi tâifesinden Kasab Arslan v. Avraham nâm yahudi muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem merkūm Arslan yahudiye beher re’si yüz altmışar akçe olmak üzere on dört re’s kuzuyu iki bin yüz akçeye ve beher re’sde üçer yüz akçeye olmak üzere yedi re’s koyunu iki bin yüz akçeye ve beher re’s ikişer yüz kırkar akçeden beş re’s koyunumu bin iki yüz akçeye bey‘ ve teslîm ve on beş guruşumu dahi ikrâz ve def‘ ve teslîm merkūm Arslan yahudi dahi ber-vech-i meşrûh yedimden iştirâ ve kabz ve ikrâz ve ahz ve mesârifine sarfla istihlâk etmekle zimmetinde min-haysü’l-mecmû‘ altmış guruş hakkım olmağın hatta meblağ-ı mecmû‘-ı mezbûrdan elli guruşu zimmetinde bana deyni olduğunu şuhûd mahzarlarında ikrâr u i‘tirâf etmişidi. Hâlâ merkūm Arslan yahudiye suâl olunup meblağ-ı mecmû‘-ı mezbûrun alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyene beyyine taleb olundukda mahrûse-i Galata müzâfâtından kasaba-i Kasımpaşa’da Tahtakadı mahallesinde el-Hâc Hasan b. el-Hâc Mehmed ve Mehmed Beşe b. Osman nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka bundan esbak merkūm Arslan Yahûdî müdde‘î-i mezbûr Mehmed’e yedinden iştirâ ve kabz eylediği kuzu ve koyun bahâlarından ve cihet-i karz-ı şer‘îden elli guruş zimmetinde vâcibü’l-edâ ve lâzımü’l-kazâ deynimdir deyü bizim huzûrumuzda kirâren ve mirâren ikrâr u i‘tirâf eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr elli guruşu müdde‘î-i mezbûr Mehmed’e edâ ve teslîme merkūm Kasab Arslan yahudiye tenbîh olundukdan sonra müdde‘î-i mezbûr Mehmed ziyâde on guruş beyyinesi için bi’l-istimhâl mehl-i şer‘î ile imhâl olunmağın mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelûlâ li-sene seb‘a ve mie ve elf. Şuhûdü’l-hâl: Mehmed Çelebi b. İbrahim, Mustafa b. Şaban, Abdurrahim Çelebi b. ( ), Ahmed Beşe b. Ahmed, Ali b. Bali.