İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 108 Hüküm no: 35 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın Yahudi Kasap Arslan v. Avraham’da olan alacağının bir kısmı devlet tarafından ödenmesi üzerine hapiste olan Arslan’ın serbest bırakıldığı İşbu eyyâm-ı mübârekede es-sadakatü tereddü’l-belâ ve tezîdü’l-ömr mazmûnları ile amel buyurulup ihrâz-ı rızâ-yı melik-i Gaffâr ve isticlâb-ı ed‘iyye-i hayriye-i ashâb-ı ıztırâr için tesâdduk buyurulmağla sicn-i sultânîde düyûn-ı müsbite için mahbûs olan fukarâ ve zu‘afânın garîmleri yedlerinde olan hücec-i şer‘iye mûcebince deynlerinin birer mikdârı cânib-i mîrîden tesâdduk ve edâ için fermân-ı âlî sâdır olmağla imtisâlen-leh kıbel-i şer‘den irsâl olunan Ebûbekir Efendi mahmiye-i İstanbul’da Baba Cafer zindânına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde işbu derûn-ı hüccetde ismi mastûr olan Mehmed b. Mustafa meclis-i ma‘kūd-ı mezbûrda medyûn-ı merkūm Arslan v. Avraham muvâcehesinde ikrâr-ı tâm ve takrîr-i kelâm edip işbu derûn-ı hüccetde mastûr olduğu vech üzere edâsına şer‘an tenbîh olunan meblağ-ı mezbûr elli guruşun on yedi guruşu taraf-ı şehriyârîden tesâdduk ve ihsân olunan meblağdan husûs-ı merkūma memûr olan Ebûbekir Ağa yedinden ahz u kabz edip mâ‘adâ da‘vâsından mezbûr Arslan’ın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr Ebûbekir Efendi mahâllinde tahrîr edip ba‘dehû ma‘an ba‘s olunan Ali b. Bali ve Mehmed b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis min-şehri Recebi’l-ferd sene 1107 Şuhûdü’l-hâl: es-Seyyid Şükrullah Efendi b. ( ) Kâtib-i sicn, es-Seyyid Hasan Efendi Kâtib-i sicn, es-Seyyid Ali Efendi Kâtib-i sicn, Mehmed Ağa b. ( ) Asesbaşı, Mehmed Ağa Subaşı, Veznedâr Ali Çelebi, Edirneli Hüseyin Çelebi, Bosnevî Salih, Rasûl b. Şaban. El-emru kemâ zükira fîhi nemekahü’l-fakīr ileyhi Sübhânehû Mehmed el-müvellâ-hilâfeten bi-Mahkeme-i Mahmudpaşa bi-Medîne-i Kostantıniyyeti’l-mahmiyye afâ-anhü.