İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 109 Hüküm no: 36 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa b. Hacı Abdülkadir’in Ebubekir Bey’de olan alacağına kefil olan Hacı İbrahim Ağa’nın kefil olduğu parayı ödemesi Mahmiye-i İstanbul’da Vâlidehânı’nda sâkin işbu bâ‘isü’l-kitâb el-Hâc Mehmed Ağa b. el-Hâc Abdülkadir b. es-Seyyid Musa meclis-i şer‘-i hatîr-i lâzımü’t-tevkīrde el-Hâc İbrahim b. Yusuf mahzarında üzerine da‘vâ ve takrîr-i kelâm edip gāib ani’l-meclis Ebûbekir Çeleb b. Uceyl b. Abdurrahman zimmetinde cihet-i karz-ı şer‘îden yirmi yedi guruş ile üç rub‘ guruş hakkım olup ben meblağ-ı mezbûru târih-i kitâbdan yirmi gün mukaddem [16a] mezbûr Ebûbekir Çelebi’den taleb ve da‘vâ eylediğimde ol dahi cihet-i mezkûreden meblağ-ı mezbûr zimmetinde bana deyni olduğunu şuhûd mahzarında ikrâr ve işhâd dahi eylediğinden mezbûr el-Hâc İbrahim meblağ-ı mezbûru tarafeynden emr ve kabûlü hâvî kefâlet-i sahîha-i şer‘iye ile yine şuhûd mahzarında kefîl olmağın hâlâ meblağ-ı mezkûru mezbûr el-Hâc İbrahim’den bi-hükmi’l-kefâle taleb eylediğimde bana edâdan imtinâ‘ eder suâl <> olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyene beyyine taleb olundukda udûl-i ricâl-i Müslimînden olup mârrü’z-zikr Vâlide hânında sâkin Abdüllatif b. Hüseyin ve Fethullah b. İsa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu müdde‘î-i mezbûr el-Hâc Mehmed Ağa’nın gāib-i mezbûr Ebûbekir Çelebi b. Uceyl b. Abdurrahman zimmetinde cihet-i mezkûreden yirmi yedi guruş ile üç rub‘ guruş hakkı olup müdde‘î-i mezbûr el-Hâc Mehmed Ağa meblağ-ı mezbûru târih-i kitâbdan yirmi gün mukaddem mezbûr Ebûbekir Çelebi’den taleb ve da‘vâ eylediğinde ol dahi cihet-i mezkûreden meblağ-ı mezbûr yirmi yedi guruş ile üç rub‘ guruş müdde‘î-i mezbûra zimmetinde lâzımü’l-edâ deyni olduğunu bizim huzûrumuzda ikrâr ve bizi işhâd eyledikden sonra işbu mezbûr el-Hâc İbrahim meblağ-ı mezbûra tarafeynden emr ve kabûlü hâviye kefâlet-i sahîha-i şer‘iye ile kefîl oldu biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müdde‘î-i mezbûr yirmi yedi guruş ile üç rub‘ guruşu bi-hükmi’l-kefâle müdde‘î-i mezbûr el-Hâc Mehmed Ağa’ya edâ ve teslîme mezbûr el-Hâc İbrahim’e tenbîh olundu mâ vaka‘a bi’t-taleb ketb olundu. Fi’l-yevmi’l-âşir min-Recebi’l-ferd sene seb‘a ve mie ve elf. Şuhûdü’l-hâl: Sâdık Çelebi b. Hasan, Fethullah Çelebi b. Hayrullah, Mehmed Çelebi b. Durmuş, Hüseyin Çelebi b. Mehmed.