İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 110 Hüküm no: 37 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Abdullah’tan varislerine intikal eden harap simitçi fırınını yaptıran vasî Hacı İbrahim Ağa b. Receb’in inşaat masraflarının tespiti Husûs-ı âti’z-zikrin mahâllinde keşf ve tahrîri bâbında buyruldu-yı şerîf vârid olmağın imtisâlen-leh savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Ali Halîfe b. Abdullah ve Osman Halîfe b. Abdülmennan ile mahmiye-i İstanbul’da Lâleliçeşme kurbünde Ahmed Ağa mahallesinde vâki‘ iki tarafdan Hammâmî el-Hâc Süleyman menzili ve bir tarafdan boyahâne ve bir tarafdan tarîk-i âm ile mahdûd simidci fırınına varıp zeyl-i kitâbda muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde mahmiye-i mezbûre hısnı ebvâbından Topkapısı kurbünde Fâtıma Sultân mahallesinde sâkin iken bundan akdem vefât eden Mustafa Ağa b. Abdullah nâm kimesnenin sulbî kebîr oğlu Mustafa Çelebi ve sulbiye kebîre kızı Ayşe nâm hatun taraflarından husûs-ı âti’z-zikre ber-mûceb-i hüccet-i şer‘iye vekîl-i şer‘îleri ve sulbî sagīr oğlu Mehmed ve sagīre kızı Hatice’nin tesviye-i emrlerine kıbel-i şer‘den mansûb vasîleri olan mezbûre Ayşe’nin zevci işbu bâ‘isü’l-kitâb el-Hâc İbrahim Ağa b. Receb nâm kimesne meclis-i ma‘kūd-ı mezbûrda takrîr-i kelâm edip mahmiye-i mezbûrede Hüseyin Ağa vakfından icâreteyn-i ma‘lûmeteyn ile müvekkilân-ı mezbûrân ile sagīrân-ı [12b] merkūmânın babaları müteveffâ-yı mezbûrun ile’l-vefât taht-ı tasarrufunda olup ba‘de vefâtihî intikāl-i âdî ile kendilere intikāl eden işbu simidci fırını mürûr-ı eyyâm ile müşrif ve harâb olup eşedd-i ihtiyâc ile ta‘mîr ü termîme muhtâc olmağın mezbûrân Mustafa Çelebi ve Ayşe fırın-ı mezbûru ta‘mîr ü termîme taraflarından beni vekîl ve yedime hüccet-i şer‘iye vermeleriyle ben dahi ba‘de’l-kabûl masrûfum kendilere rücû‘ etmek üzere fırın-ı mezbûru nıkz-ı mevcûduyla mahlût işbu tarz-ı müşâhed üzere müceddeden binâ etmekle hâlâ keşf ve masrûfum tahmîn-i sahîh ile tahmîn olunmak matlûbumdur dedikde mi‘mârân-ı mezbûrân fırın-ı mezbûru bi’l-muvâcehe keşf ve mesâha eylediklerinde tûlen on iki ve arzen sekiz buçuk bi-hesâbı terbî‘î yüz iki zirâ‘ mahlût sakf zirâ‘ı yirmi beşer akçeden iki bin beş yüz elli akçe ve bi-hesâbı mezbûr otuz dokuz zirâ‘ cedîd tahta döşeme zirâ‘ı otuzar akçeden bin yüz yetmiş akçe ve bi-hesâbı merkūm seksen yedi zirâ‘ tahta perde zirâ‘ı yirmişer akçeden bin yedi yüz kırk akçe ve bi-hesâbı merkūm iki tarafı sıvalı iki yüz yirmi dört zirâ‘ dolma duvar zirâ‘ı otuz beşer akçeden yedi bin sekiz yüz kırk akçe ve bi-hesâbı mezbûr on beş zirâ‘ kepenk zirâ‘ı kırkar akçeden altı yüz akçe ve dört aded Sakarya direği ma‘a başlık herbiri yüzer akçeden dört yüz akçe ve beş aded dolab tabanı herbiri yetmiş beşer akçeden üç yüz yetmiş beş akçe ve altı aded yeni çap direği herbiri on beşer akçeden doksan akçe ve beş aded dirge elli akçe ve karaağaç tahtasından üç zirâ‘ cedîd tekne beş yüz akçe ve bi-hesâbı mezbûr yüz zirâ‘ cedîd …? ocak diğer döşeme ve rıhtım zirâ‘ı yetmişer akçeden yedi bin akçe ve ağa tahtası bir kubur? iki yüz akçe ve ihrâc-ı mezbele beş yüz akçe ki min-haysü’l-mecmû‘ yekûnü üç bin on beş akçe ile ancak olur noksan ile olmak mümkün değildir deyü mi‘mârân-ı mezbûrân ile Müslimûn-ı mezbûrûn icmâ‘ u ittifâk etmeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Halil b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Ömer Çelebi b. Mehmed, Mehmed Çelebi b. Mustafa, Berber Fethullah b. Emrullah, Mehmed Çelebi b. Ahmed, Süleyman Efendi b. Receb, Mustafa Çelebi b. Receb, Mustafa b. Mehmed. Yevmü’r-râbi‘ fî 12 min-Recebi’l-ferd li-sene 1107