İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 111 Hüküm no: 38 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinanağa mahallesinden vefat eden Mehmed Efendi’den intikal eden ev ve arsanın varisleri arasında taksim edildiği Husûs-ı âti’z-zikrin mahâllinde ketb u tahrîri iltimâs olunmağın savb-ı şer‘-i mutahhardan keşf nâibi olan Abdullah Efendi b. Ali irsâl olunup ol dahi Hâssa mi‘mârlardan Ahmed Halîfe b. Abdullah ile mahmiye-i İstanbul’da Sinan Ağa mahallesinde vâki‘ Çeşmî Mehmed Efendi menzili demekle ma‘rûf menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i mübîn eylediğinde mezbûr yedinde mülkü ve hakkı iken bundan akdem vefât eden mezbûr Mehmed Efendi’nin verâseti zevce-i metrûkesi Hatice bt. Mehmed Efendi’ye ve sulbî kebîr oğulları Mustafa Efendi ve Abdurrahim Efendi ve Mehmed Salih Efendi’ye ve sulbiye kızları Fâtıma ve Emetullah ve Afife ve Emine ve Hayrunnisa ve Fahrünnisa ve Rukiye’ye münhasıra ve tahsîs meselesi yüz dört sehimden olup sihâm-ı mezbûreden on üç sehim mezbûre Hatice’ye ve on dörder sehim mezbûrûn Mustafa Efendi ve Abdurrahim Efendi ve Mehmed Salih Efendi’den herbirine ve yedişer sehim dahi benât-ı mezbûrâtın herbirine isâbet ve mezbûr Mustafa Efendi ile benât-ı mezbûrâtın herbiri zikri âtî arsa-i hâliyede olan ber-vech-i muharrer cem‘an altmış üç sehim hisse-i şâyi‘alarını mezbûrân Abdurrahim Efendi ve Mehmed Salih Efendi’ye semen-i ma‘lûm-ı makbûza bey‘ ve temlîk ve yine mezbûr Mustafa Efendi ile benât-ı mezbûrât ve mezbûre Hatice kezâlik büyût-ı adîdeyi müştemil hâriciye-i menzil-i mezbûrda olan cem‘an yetmiş altı sehim hisse-i şâyi‘alarını yine mezbûrân Abdurrahim ve Mehmed Salih Efendi’ye bey‘ ve temlîk onlar dahi iştirâk-i seviy üzere ba‘de’l-iştirâ ve’t-temellük arsa-i mezbûrenin semeni mezbûre Hatice’nin ve bâkī seb‘a esmânı ırsen ve şirâen mezbûrân Abdurrahim ve Mehmed Salih Efendi’nin olduğundan sonra mezbûr Abdurrahim Efendi dahi vefât edip verâseti vâlidesi mezbûre Hatice ile sulbî kebîr oğlu Mehmed Efendi’ye münhasıra olup ba‘dehû mezbûre Ayşe dahi vefât edip verâseti sadr-ı kebîr oğlu mezbûr Mehmed Salih Efendi’ye münhasıra olup ba‘dehâ mezbûr Mehmed Efendi dahi vefât edip verâseti sulbî kebîr oğlu Abdülhalim Efendi’ye ve sulbiye kızları Fâtıma ve Ayşe’ye münhasıra olup ba‘dehû mezbûre Ayşe dahi vefât edip verâseti vâlidesi Şehbaz bt. Abdullah nâm hatuna ve li-ebeveyn er karındaşı mezbûr Abdülhalim Efendi ile ve li-ebeveyn kız karındaşı mezbûre Fâtıma’ya münhasıra olup ba‘dehâ mezbûr Mehmed Salih Efendi dahi vefât edip verâseti zevce-i metrûkesi Ayşe bt. Mehmed’e ve sulbî kebîr oğulları Mehmed Emin Efendi ve Mehmed Said Efendi’ye ve sulbiye kızları Hatice ve Rukiye ve Emetullah’a münhasıra olup ba‘dehû mezbûre Emetullah dahi vefât edip verâseti li-ebin er karındaşları mezbûrân Mehmed Emin Efendi ve Mehmed Said Efendi ile li-ebin kız karındaşları mezbûretân Hatice ve Rukiye’ye münhasıra olup ba‘dehâ mezbûre Rukiye dahi vefât edip verâseti vâlidesi mezbûre Ayşe ile ve li-ebeveyn er karındaşı mezbûr Mehmed Said Efendi ile li-ebeveyn kız karındaşı mezbûre Hatice’ye ve li-ümmin kız karındaşı Zeyneb nâm bikr-i bâliğaya münhasıra ve tashîh-i meseleleri bi-tarîkı’l-münâsahati’ş-şer‘iye iki yüz kırk sekiz bin sekiz yüz otuz iki sehimden olup sihâm-ı mezbûreden elli yedi bin dokuz yüz altmış sehim mezbûr Abdülhalim Efendi’ye ve yirmi sekiz bin dokuz yüz seksen sehim mezbûre Fâtıma’ya [13a] ve üç bin yedi yüz seksen sehim mezbûre Şehbaz’a ve yirmi üç bin altı yüz yedi sehim mezbûre Ayşe’ye ve kırk altı bin yüz on altı sehim mezbûr Mehmed Emin Efendi’ye ve elli altı bin üç yüz altmış dört sehim mezbûr Mehmed Said Efendi’ye ve yirmi sekiz bin yüz seksen üç sehim mezbûre Hatice’ye ve üç bin sekiz yüz kırk üç sehim mezbûre Zeyneb’e isâbet eylediği ve mezbûr Mehmed Emin Efendi dahi düyûnu terekesinden ezyed olduğu hâlde vefât etmekle arsa-i mezbûrede ve hâriciye-i mezkûrede olan hisse-i şâyi‘a-i mezkûresin ashâb-ı düyûnu semen-i ma‘lûm-ı makbûzla mezbûr Mehmed Said Efendi’ye bey‘ ve temlîk eyledikleri şer‘an zâhir ve mütehakkık oldukdan sonra mezbûr Mehmed Said Efendi kendi tarafından bi’l-asâle ve vâlidesi mezbûre Ayşe ile kız karındaşları mezbûretân Hatice ve Zeyneb taraflarından husûs-ı âti’z-zikre vekîl olduğu zâtlarını ma‘rifet-i şer‘iye ile ârifân üvey babası Mehmed Ağa b. Receb ve Molla Mehmed b. Mahmud şehâdetleriyle şer‘an sâbit olmağla bi’l-vekâle meclis-i ma‘kūd-ı mezbûrda kezâlik kendi asıl ve vâlidesi mezbûre Şehbaz ile kız karındaşı mezbûre Fâtıma taraflarından bi’l-vekâle vekîl olan mezbûr Abdülhalim Efendi mahzarında takrîr-i kelâm ve bast-ı merâm edip bir tarafdan ba‘zen Abdi Efendi mülkü ve ba‘zen Sinan Ağa Câmi‘-i şerîfi ve ba‘zen câmi‘-i mezbûr imâmı ve müezzini menzilleri ve bir tarafdan sâbıkā nakībü’l-eşrâf olan umdetü’l-ulemâi’l-izâm zübdetü’l-mevâliyyi’l-kirâm Fenârîzâde es-Seyyid Mehmed Efendi mülkü ve bir tarafdan ba‘zen umdetü’l-mevâliyyi’l-izâm Fenârîzâde es-Seyyid Ahmed Efendi mülkü ve ba‘zen benim ile müvekkilelerim mezbûrâtın âhar mülkümüz olan hân ve mahzen ve dâhiliye-i menzil-i mezbûr ile mahdûde işbu arsa-i hâliye ile yine bir tarafdan dâhiliye-i mezkûre ve mahzen ve hân ve iki tarafdan yine mûmâ-ileyh Fenârîzâde es-Seyyid Ahmed Efendi mülkü ve bir tarafdan tarîk-i âm ile mahdûd hâriciye-i menzil-i mezkûr kābil-i kısmet olmalarıyla beynimizde taksîm olunmak matlûbumdur dedikde gıbbe’t-tasdîkı’ş-şer‘î mi‘mâr-ı mezbûr evvelen arsa-i mezbûreyi bi’l-muvâcehe mesâha eyledikde tûlen ve arzen bi-hesâbı terbî‘î üç bin dokuz yüz seksen zirâ‘ arsadan mezbûr Abdülhalim Efendi ile müvekkileleri mezbûretânın cem‘an doksan bin yedi yüz yirmi sehimlerine bin dört yüz elli zirâ‘ arsa-i mezbûr Mehmed Said Efendi ile müvekkilelerim mezbûrâtın cem‘an yüz elli sekiz bin yüz on iki sehimlerine iki bin beş yüz yirmi sekiz zirâ‘ arsa isâbet etmekle mûmâ-ileyh Fenârîzâde es-Seyyid Mehmed Efendi hazretleri mülkü olan kârgir duvar köşesinden doğru mahzen duvarına vaz‘ olunan alâmet beraberine gelince mûmâ-ileyh es-Seyyid Ahmed Efendi tarafında vâkı‘a bin dört yüz elli zirâ‘ arsa hamam-ı mezbûr arsasından hâriciyeye müntehî oluncaya değin arzen <> iki buçuk zirâ‘ arsa tarîk üzere mezbûr Abdülhalim Efendi ile müvekkileleri mezbûretânın cem‘an doksan bin yedi yüz yirmi sehimlerine hisse ta‘yîn ve tahsîs olunup ve bâkī iki bin beş yüz yirmi sekiz zirâ‘ arsa mezbûr Mehmed Said efendi ile müvekkileleri mezbûretânın cem‘an yüz elli sekiz bin yüz on iki <> yine hisse ta‘yîn ve tahsîs olunup ve hâriciye-i menzil-i mezbûr müteveffiyân-ı mezbûrân Abdurrahim Efendi ve Mehmed Salih Efendi’nin beynlerinde iştirâk-i seviy üzere mülkleri olup mezbûr Abdurrahim Efendi hazretleri hissesinin südüsü ba‘de vefâtihî vâlidesi mezbûre Hatice’ye ve mezbûre Hatice dahi vefât eyledikde verâseti sadrî oğlu mezbûr Mehmed Salih Efendi’ye münhasıra olmağla alâ-tarîkı’l-münâsaha on iki sehimin yedi sehimi mezbûr Mehmed Said Efendi ile müvekkileleri mezbûrâta ve beş sehimi mezbûr Abdülhalim Efendi müvekkileleri mezbûretâna isâbet eylediği mütehakkık olmağın mi‘mâr-ı mezbûr mesâha eyledikde bi-hesâbı mezbûr bin on sekiz zirâ‘ binâlı arsa ve beş yüz zirâ‘ arsa-i hâliyeden mezbûr Abdülhalim Efendi ile müvekkileleri mezbûretânın beş sehimlerine dört yüz yirmi beş zirâ‘ binâlı arsa ve iki yüz sekiz zirâ‘ arsa-i hâliye isâbet eyleyip ve mezbûr Mehmed Said Efendi ile müvekkileleri mezbûrâtın yedi sehimlerine beş yüz doksan üç zirâ‘ binâlı arsa ve iki yüz doksan iki zirâ‘ arsa-i hâliye isâbet etmekle dâhiliye tarafında vâki‘ bir kebîr oda ve dört sagīr oda ve bir cihânnümâ ve tahtânî üç bâb oda ve bir bi’r-i mâ ve dîvânhâne sofası ma‘a dehliz sol tarafda vâki‘ ibtidâ pencerenin önündeki direk yüzünden doğru arsa-i hâliye nihâyetine değin müceddeden sokak kapısı açmak üzere mezbûr Mehmed Said Efendi ile müvekkileleri mezbûrâtın yedi sehimlerine hisse ta‘yîn ve tahsîs olunup ve bâkī sol tarafda vâki‘ fevkānî bir kebîr oda ve iki sagīr oda ve altında üç bâb sagīr oda ve bir ahır ve kenîf ve sokak kapısı ve bâkī arsa-i hâliye mezbûr Abdülhalim Efendi ile müvekkileleri mezbûretâna hisse ta‘yîn ve tahsîs ve beynlerine alâmât-ı fâsıla vaz‘ olunup ve mezbûr Abdülhalim Efendi ile müvekkileleri mezbûretâna altmış sekiz zirâ‘ arsa-i hâliye ile tûlen on sekiz buçuk ve arzen bir zirâ‘ ve altı parmak binâlı arsa ziyâde geçmekle mezbûr Abdülhalim Efendi ile müvekkileleri mezbûretândan mezbûr Mehmed Said Efendi ile müvekkileleri mezbûrâta lâzım gelen altmış yedi buçuk guruşun otuz beş guruş ve bir sülüsünü mezbûr Mehmed Said Efendi bi’l-asâle ve bi’l-vekâle mezbûr Abdülhalim Efendi mukaddemâ beynlerinde ma‘lûm mesârif-i ebniye ve semen-i enkāz hesâblarından lâzım gelen otuz beş guruş ve bir sülüse takās eyledikde mezbûr Abdülhalim Efendi dahi mukāssa ve kabûl edip bâkī otuz iki guruş ve iki sümünü mezbûr Mehmed Said Efendi’ye teslîm etmek üzere herbiri bi’l-asâle ve bi’l-vekâle hisse-i mu‘ayyene-i müfrezelerin kabz ve kabûl ve âharın hisselerine ta‘yîn olunan ebniye ve arsaya ve târih-i kitâba gelince beynlerinde cereyân eden mesârif-i ebniye ve semen-i enkāz ve pencere demirine müte‘allika âmme-i de‘âvî ve mutâlebâtdan herbiri asâleten ve vekâleten âharın zimmetlerini ibrâ-i âmm-ı râfi‘u’l-hısâm ile ibrâ ve ıskāt etmeğin vâki‘ hâli [13b] mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. İbrahim ve Mehmed Çelebi b. Mustafa ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Fahrü’l-müderrisîni’l-kirâm Abdullah Efendi b. el-merhûm Mustafa, Abdullah Efendi b. Mustafa, Mehmed Ağa b. Receb, el-Hâc Hasan Ağa b. Abdullah, Abdurrahman Çelebi b. Yusuf, İsmail Çelebi b. Fazlı, Mehmed Çelebi b. Mahmud, Mustafa Çelebi b. Mehmed. Yevmü’l-hamîs fî 13 min-Recebi’l-ferd li-sene 1107