İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 114 Hüküm no: 39 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Abdullah’ın vakfettiği evin ulemadan Abdullah Efendi b. Abdülkadir’e tahsis edildiği Ashâb-ı hayrâtdan merhûm Mahmud b. Abdullah’ın kendi rûhi’çün her Cum‘a gecesi bir Sûre-i Mülk tilâvet etmek üzere ulemâdan bir recül-i sâlihe meşrûta vakfı olup mahmiye-i İstanbul’da Yedikule dâhilinde Bucakbağı mahallesinde vâki‘ bir tarafı mahalle-i mezbûre imâmına meşrûta vakf menzil ve iki tarafı cidâr-ı hısn ve bir tarafı tarîk-i hâss ile mahdûd iki bâb tahtânî oda ve bi’r-i mâ ve cüneyneyi muhtevî menzile tevcîh-i hâkimü’ş-şer‘le mutasarrıf olan Ali Efendi b. Mehmed kendi rızâsıyla kasr-ı yed etmekle süknâ-yı menzil-i mezbûr mahlûl ve işbu bâ‘isü’l-kitâb Abdullah Efendi b. Abdülkadir ulemâdan olup süknâya muhtâc ve her vechile muhîl ve müstehık olduğunu sikāt-ı makbûletü’l-kelimât ihbâr etmeleriyle işbu kitâb-ı müşgîn-nikāb-ı tevkī‘-i refî‘-i müstetâbî ile şeref-yâb olan hâkim-i ma‘delet-nisâb tûbâ-lehû ve hüsnü-meâb hazretleri dahi süknâ-yı menzil-i mahdûd-ı mezbûru ber-mûceb-i şart-ı vâkıf kıbel-i şer‘den mezkûr Abdullah Efendi’ye tevcîh edip tasarrufi’çün işbu vesîka bi’t-taleb ketb olundu. Fi’l-yevmi’s-sâlis aşer min-şehri Recebi’l-ferd li-sene seb‘a ve mie ve elf. Şuhûdü’l-hâl: el-Hâc Mustafa Çelebi b. el-Hâc Ahmed, İbrahim Çelebi b. Ahmed, Abdurrahman Efendi Kâtib-i muhâsebe, Mehmed Ağa b. ( ) muhzırân, Ali Çelebi b. Bali.