İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 115 Hüküm no: 40 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Ağa b. İlyas’ın varisi Hasan Ağa b. Abdullah’dan intikal eden evi satın alan Mehmed Ağa b. Ahmed’den hissesinin bedelini aldığı Husûs-ı âti’z-zikrin mahâllinde ketb u tahrîri bâbında buyruldu-yı şerîf vârid olmağın savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah b. Ali irsâl olunup ol dahi Hâssa mi‘mârlardan Ali Halîfe b. Abdullah ve Osman Halîfe b. Abdülmennan ile mahmiye-i İstanbul’da Atmeydânı kurbünde İshak Paşa mahallesinde vâki‘ ebniyesi mülk ve arsasının merhûm Na‘lband Mustafa Ağa vakfına beher yevm üçer akçe icâre-i müeccelesi olup bir tarafdan ba‘zen el-Hâc Mehmed ve ba‘zen el-Hâc İsmail menzilleri ve bir tarafdan Davud Ağa odaları ve bir tarafdan tarîk-i âm ile mahdûd büyût-ı adîdeyi müştemil menziline varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimûn mahzarlarında akd-i meclis-i şer‘-i şerîf eylediğinde menzil-i mahdûd-ı mezbûrun arsası icâreteyn ve ma‘lûmeteyn ile taht-ı tasarrufunda ve ebniyesi yedinde mülkü ve hakkı iken bundan akdem vefât eden Hasan Ağa b. Abdullah b. Abdülmennan’ın verâseti zevce-i metrûkesi Fâtıma bt. Abdullah nâm hatun ile sulbiye kebîre kızları Hatice ve Râbia’ya ve usûbet-i nesebiye cihetinden kendiyi i‘tâk eden Mustafa b. Ali b. Mehmed’in li-ebeveyn er karındaşı oğlu Ebûbekir Ağa b. İlyas nâm kimesneye münhasıra olup ba‘dehû Fâtıma dahi vefât edip verâseti sadriye-i kebîre kızı mezbûre Hatice ile kezâlik kendiyi i‘tâk eden mezbûr Mustafa Ağa’nın karındaşı oğlu mezbûr Ebûbekir Ağa’ya münhasıra ve tashîh-i meseleleri bi-tarîkı’l-münâsahati’ş-şer‘iye kırk sekiz sehimden olup sihâm-ı mezbûreden on dokuz sehim mezbûre Hatice’ye ve on altı sehim mezbûre Râbia’ya ve üç sehim mezbûr Ebûbekir Ağa’ya isâbet eylediği şer‘an zâhir ve mütehakkık oldukdan sonra mezbûr Ebûbekir Ağa meclis-i ma‘kūd-ı mezbûrda menzil-i mahdûd-ı mezbûra vâzı‘ idiği mütehakkık olan işbu bâ‘isü’l-kitâb Mehmed Ağa b. Ahmed nâm kimesne mahzarında ikrâr ve takrîr-i kelâm edip bundan akdem ben âhar diyârda iken mezbûretân Hatice ve Râbia müteveffiyân-ı mezbûrânın verâsetleri karzan ve redden kendilere münhasıra olmak zu‘muyla mezbûre Fâtıma menzil-i mezbûrda olan hisse-i şâyi‘asını semen-i ma‘lûm-ı makbûza mezbûre Hatice’ye bey‘ ve temlîk mezbûre Hatice dahi ba‘de’l-iştirâ ve’t-temellük mecmû‘-ı menzil-i mezbûru beş yüz elli guruş semen-i makbûza merkūm Mehmed Ağa’ya bey‘ ve teslîm etmekle hâlâ ben gelip ber-vech-i mübeyyen verâsetimi mezbûr Mehmed Ağa muvâcehesinde şühûd-ı udûl ile isbât ve menzil-i mahdûd-ı mezbûrda olan ber-vech-i muharrer on üç sehim hisse-i şâyi‘am bana hükm ve yedime hükm hücceti dahi verilmekle ben dahi menzil-i mezbûrdan ber-vech-i meşrûh hisse-i şâyi‘am ifrâz ve bana teslîm olunsun deyü taleb eylediğimde mi‘mârân-ı mezbûrân menzil-i mezbûrun ebniyesini bi’l-muvâcehe mesâha eylediklerinde tûlen ve arzen bi-hesâbı terbî‘î üç yüz otuz sekiz zirâ‘ ebniyeden benim on üç sehim hisseme isâbet eden doksan bir zirâ‘ ebniye kısmet-i âdile üzerine menzil-i mezbûrdan ifrâz olunmak mümkün değildir deyü ihbâr etmeleriyle beynimizde nizâ‘-ı küllî cereyân etmişidi. El-hâletü-hâzihî beynimizde muslihûn tavassut edip mezbûr Mehmed Ağa hisse-i mezkûremden benimle yüz guruş üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu mezbûr Mehmed Ağa işbu meclis-i şer‘de bana def‘ ve teslîm ben dahi yedinden tamamen ahz u kabz eyleyip menzil-i mezbûrda olan hisse-i şâyi‘a-i mezkûreme müte‘allika âmme-i mutâlebâtdan ben mezbûr Mehmed Ağa’nın zimmetini ibrâ ve ıskāt edip ve mezbûr Mehmed Ağa dahi bana medfû‘u olan bedel-i sulh-ı mezbûr yüz guruşa müte‘allika âmme-i mutâlebâtdan benim [10a] [Kaydın devamı 10a’dadır.] zimmetimi ve mezbûre Hatice’ye mecmû‘-ı menzil semeni olmak üzere medfû‘u olan meblağ-ı mezbûr beş yüz elli guruşa müte‘allika âmme-i mutâlebâtdan mezbûre Hatice’nin zimmetini ibrâ-i âmm-ı râfi‘u’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Hüseyin Efendi b. Mustafa. Hasan Ağa b. Osman, Mehmed Ağa b. Osman, Mustafa Ağa b. Ali, Mehmed Çelebi b. Musa, Ali Çelebi b. Ali, el-Hâc Abdürrezzak b. Ali. [14a-14b boştur]