İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 116 Hüküm no: 41 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiremidci Mehmed b. Mustafa’nın Hasan Ağa b. Ali’de olan alacağının tahsili Mahmiye-i İstanbul’da kiremidci tâifesinden işbu râfi‘u’l-vesîka Mehmed b. Mustafa nâm kimesne meclis-i şer‘-i şerîf-i enverde Hasan Ağa b. Ali nâm kimesne mahzarında üzerine da‘vâ ve takrîr-i kelâm edip mezbûr Hasan Ağa zimmetinde her bini dörder yüz ellişer akçeye olmak üzere bundan akdem yedimden iştirâ ve kabz eylediği yirmi yedi bin altı yüz kiremid semenlerinden imzâ ve hatmini hâvî yedimde olan işbu temessük nâtık olduğu üzere yüz üç guruş ve bir sülüs guruş hakkım olup meblağ-ı mezbûr kırk dört guruşu yedinden ahz u kabz edip elli dokuz guruş ve bir sülüs hakkım bâkī kalmağla suâl olunup meblağ-ı bâkī-i mezbûrun alıverilmesi matlûbumdur deyicek gıbbe’s-suâl mezbûr Hasan Ağa cevâbında fi’l-hakīka imzâ ve hatmini hâvî temessük nâtık olduğu üzere sâlifü’z-zikr kiremid semenlerinden vech-i meşrûh üzere müdde‘î-i merkūma zimmetinde bâkī elli dokuz guruş ve bir sülüs guruş elân vâcibü’l-edâ deyni olduğunu tâyi‘an ikrâr u i‘tirâf etmeğin alâ mûcebi i‘tirâfihî meblağ-ı bâkī-i merkūm elli dokuz guruş ve bir sülüs guruşu müdde‘î-i merkūma edâ ve teslîme mezbûr Hasan Ağa’ya tenbîh birle mâ vaka‘a bi’t-taleb ketb olundu. Fi’l-yevmi’s-sâdis aşer min-Recebi’l-mürecceb li-sene seb‘a ve mie ve elf. Şuhûdü’l-hâl: Mehmed Efendi b. Mehmed Efendi, Mehmed Çelebi b. ( ), Mehmed Çelebi b. ( ).