İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 117 Hüküm no: 42 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Ali Hatun boşandığı Abdurrahman Beşe b. Mehmed’de olan eşya ve nafaka bedelinden olan alacak davasında sulh olduğu Mahmiye-i İstanbul’da Soğanağa mahallesi sâkinelerinden olup zâtı Mehmed b. Hasan ve Müezzin Beşe b. Ali nâm kimesneler ta‘rîfleriyle mu‘arrefe olan Emetullah bt. Ali nâm hatun meclis-i şer‘-i şerîf-i enverde zevc-i mutallakı Abdurrahman Beşe b. Mehmed mahzarında ikrâr ve takrîr-i kelâm edip mezbûr Abdurrahman Beşe beni târih-i kitâbdan iki sene mukaddem tatlîk etmeğin zimmetinde mütekarrer ve ma‘kūdün-aleyh olan üç bin akçe mehr-i müeccelimi ve eşyâ-i memlûkemden bi-gayr-ı hakkın ahz ve istihlâk eylediği mecmû‘ otuz guruş kıymetli bir sagīr sîm edik kuşak ve iki kumaş kaftân ve bir sof ferâce bir sandala kaplı teyn kürkü ve iki mükemmel hamam rahtı ve on üç aded şerîfî altınımı mezbûr Abdurrahman Beşe’den taleb ve da‘vâ etdiğimde ol dahi cevâbında işbu yedimde olan hüccet-i şer‘iye nâtıka olduğu mehr-i müeccel-i mezbûrun iki bin akçesi mukābelesinde eşyâ verip bâkī bin akçe mehr-i müeccel ve nafaka-i iddet-i mu‘ayyene-i ma‘lûmen üzerlerine ve me’ûnet-i süknân dahi kendi üzerine olmak üzere muhâla‘a oldum deyü def‘ ve eşyâ-i mezkûre ve meblağ-ı mezbûru bi’l-külliye inkâr etmelerine ba‘de’n-nizâ‘ muslihûn tavassut edip da‘vâ-yı mezkûremden mezbûr Abdurrahman Beşe benimle iki bin sağ akçe üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr iki bin akçeyi mezbûr Abdurrahman Beşe yedinden bi’t-tamam ahz u kabz eyledim ba‘de’l-yevm ziyâde müdde‘âm olan husûs-ı mezkûra ve târih-i kitâba gelince sâir husûsa müte‘allika âmme-i da‘vâdan mezbûr Abdurrahman Beşe’nin zimmetin ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min-Recebi’l-ferd li-sene seb‘a ve mie ve elf. Şuhûdü’l-hâl: Musa Beşe b. Ali, Ahmed Ağa b. Abdülkadir, el-Hâc Ahmed b. el-Hâc Hicâzî, Mehmed b. Hasan, Ahmed Çelebi b. Halîfe Yevm-i isneyn fî 17 min-Recebi’l-ferd li-sene 1107 Yevm-i sülâsâ fî 18 min-Recebi’l-ferd li-sene 1107 Yevm-i erba‘a fî 19 min-Recebi’l-ferd li-sene 1107 Yevmü’l-hamîs fî 20 min-Recebi’l-ferd li-sene 1107