İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 118 Hüküm no: 43 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. İbrahim’in Ahmed Ağa b. Osman’daki alacağının ödenmesi Vilâyet-i Anadolu’da medîne-i Kayseriye müzâfâtından Çırlavuk nâm karyede sâkin olup sâbıkā vilâyet-i mezbûrda vâki‘ Güherçile Mukāta‘ası emîni olan Mahmud Ağa b. İbrahim nâm kimesne tarafından husûs-ı âti’l-beyâna vekîl olduğu es-Seyyid Mehmed Çelebi b. es-Seyyid Receb ve Halil Çelebi b. Ali nâm kimesneler şehâdetleriyle hasm-ı câhid mahzarında şer‘an sâbit ve sübût-ı vekâletine hükm-i şer‘î lâhık olan li-ebeveyn er karındaşı Hasan Ağa meclis-i şer‘-i şerîf-i enverde Ahmed Ağa b. Osman mahzarında bi’l-vekâle üzerine da‘vâ ve takrîr-i kelâm edip bin yüz altı senesinde şıkk-ı evvel defterdârı olan umdetü erbâbü’t-tahrîr ve’l-kalem Câbî Ahmed Efendi tarafından mezbûr Ahmed Ağa müvekkilim mezbûru taraf-ı Saltanat-ı aliyye’ye ihzâr için karye-i mezbûreye geldikde karındaşım mezbûr Mahmud Ağa’yı ahz u habs ve bi-gayr-ı hakkın altı yüz guruşunu ahz ve kendi mesârifine sarfla istihlâk etmeğin hâlâ mezbûr Ahmed Ağa’ya suâl olunup meblağ-ı mezbûr altı yüz elli guruşun bi’l-vekâle bana alıverilmesi matlûbumdur dedikde gıbbe’s-suâl mezbûr Ahmed Ağa cevâbında fi’l-hakīka ber-vech-i muharrer müvekkil-i mezbûr Mahmud Ağa yedinden bi-gayr-ı hakkın altı yüz elli guruşunu ahz ve istihlâk etdiğini ikrâr lâkin meblağ-ı mezbûr altı yüz elli guruşu mahrûse-i Edirne’de müvekkil-i mezbûr Mahmud Ağa’ya bi’t-tamam teslîm eyledim deyü def‘le mukābele [15b] edicek gıbbe’l-istintâk ve’l-inkâr mezbûr Ahmed Ağa’dan def‘-i mezbûrunu mübeyyene beyyine taleb olundukda ityân-ı beyyine için bir ay mikdârı istimhâl etmekle mehl-i şer‘î birle ba‘de’l-imhâl müddet-i mehl tamam olup ityân-ı beyyineye bir vechile kādir olmayıp müvekkil-i mezbûr dahi hazır olmamağla mevkūfen ale’l-yemîn mûcebiyle meblağ-ı mezbûr altı yüz elli guruşu vekîl-i mezbûra edâ ve teslîme mezbûr Ahmed Ağa’ya tenbîh birle mâ vaka‘a bi’t-taleb ketb olundu. Fi’l-yevmi’s-sânî aşer min-Recebi’l-ferd li-sene seb‘a ve mie ve elf. Şuhûdü’l-hâl: Fahrü’l-müderrisîn İbrahim Efendi b. el-merhûm Mustafa Paşa, fahrü’l-eşbâh Telhîsî Ramazan Ağa, İbrahim Çelebi b. Ahmed, Mustafa b. Şaban, Receb b. Süleyman, Mehmed b. Ahmed.