İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 119 Hüküm no: 44 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hürrem Çelebi b. Ahmed Ağa ile kızkardeşi Havva Hatun’un büyük dedeleri Hürrem Ağa’dan intikal eden evdeki hisselerini bölüştükleri Husûs-ı âti’z-zikrin mahâllinde ketb u tahrîri iltimâs olunmağın savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Dede Mehmed Halîfe b. Süleyman ve Ahmed Halîfe b. Mustafa ile mahmiye-i İstanbul’da Kasab İlyas mahallesinde vâki‘ bir tarafdan cidâr-ı hısn ve bir tarafdan ba‘zen Ma‘nevî Efendi mülkü ve ba‘zen el-Hâc Ahmed menzili ve bir tarafdan ba‘zen tarîk-i hâs ve ba‘zen el-Hâc Mustafa menzili ve bir tarafdan ba‘zen Solak Ahmed Çelebi tasarrufunda olan vakf menzil ve ba‘zen Yahya Ağa mülkü ile mahdûd dâhilen ve hâricen büyût-ı adîdeyi müştemil menzile varıp zeyl-i vesîkada muharrerü’l-esâmî Müslimîn ve ebniye ve sukūf ahvâline ıttılâ‘-ı tâmmı olan bî-garaz kimesneler mahzarlarında akd-i meclis-i şer‘-i şerîf eylediğinde menzil-i mahdûd-ı mezbûra zikri âtî vech üzere vâzı‘u’l-yed olan el-Hâc Hürrem Çelebi b. Ahmed Ağa b. Mehmed nâm kimesne meclis-i ma‘kūd-ı mezbûrda li-ebeveyn kız karındaşı olup zâtı ma‘rifet-i şer‘iye ile ârifân Mustafa Çelebi b. Mehmed ve el-Hâc Mustafa b. Ahmed ta‘rîfleriyle mu‘arrefe olan Havva nâm hatun muvâcehesinde ikrâr ve takrîr-i kelâm edip işbu menzil-i mahdûd-ı mezbûru cedd-i a‘lâmız Hürrem Ağa nâm kimesne hayatında yedinde mülkü ve hakkı iken vakf ve habs eyleyip süknâ ve tevliyeti evvelen kendi nefsine ba‘dehû evlâdına ve evlâd-ı evlâdına ve evlâd-ı evlâd-ı evlâdına ve ba‘de’l-inkırâz utekā ve atîkatına ve evlâd-ı utekā ve atîkatına ve evlâd-ı evlâd-ı utekā ve atîkatına neslen ba‘de neslin ve ba‘de’l-inkırâzi’l-küll Medîne-i Münevvere fukarâsını şart ve ta‘yîn ve tescîl-i şer‘î ve vakfiye-i ma‘mûlün-bihâ takrîr etdirdiğinden sonra vefât etmekle evlâdından babamız merkūm Ahmed Ağa menzil-i mezbûru ber-vech-i mübeyyen tasarruf üzere iken ebniyesi bin yetmiş senesinde vâki‘ harîk-i kebîrde bi’l-külliye muhterika olup arsa-i sırfa kalmağın babamız merkūm Ahmed Ağa dahi arsa-i mezbûre üzerine kendi mâlı ile kemâ-kân vakf olmak üzere dâhiliyesinde işbu üç bâb tahtânî oda ve bir sofa ve bir matbah ve hâriciyesinde dahi fevkānî bir kebîr oda ve bir sagīr oda binâ etdiğinden sonra fevt olup nevbet-i süknâ bize intikāl etmeğin ben dahi yine ke’l-evvel vakf olmak üzere kendi mâlım ile işbu dâhiliyede vâki‘ sagīr hamamı ve câmekân odasını binâ etmişidim menzil-i mezbûr kābil-i kısmet olmağla tevliyetim hasebiyle kız karındaşım mezbûre Havva ile beynimizde muhâyee bi’l-mekân vechi üzere taksîm olunmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân menzil-i mezbûru mesâha eylediklerinde tûlen ve arzen bi-hesâbı terbî‘î beş yüz kırk iki zirâ‘ binâlı arsa ve üç bin altı yüz yetmiş sekiz zirâ‘ arsa-i hâliyeden mezbûrân el-Hâc Hürrem Çelebi ve Havva’dan herbirine ikişer yüz yetmiş birer zirâ‘ binâlı arsa ve bin sekiz yüz otuz dokuzar zirâ‘ arsa-i hâliye isâbet etdiği zâhir ve müte‘ayyen olmağın dâhiliyede vâki‘ tahtânî üç bâb oda ve sofa ve hamam ve câmekân odası ve sofanın köşesinde vâki‘ direkden cunba üçüncü parmaklıkdan doğru kal‘a duvarı ve bende vaz‘ olunan alâmete müntehî oluncaya değin sağ cânibde vâkı‘a hadîka mezbûr el-Hâc Hürrem Çelebi’ye hisse ta‘yîn olunup ve hâriciye-i menzil-i mezbûr ma‘a arsa-i hâliye ve dâhiliyede vâki‘ matbah ve köşk ve orta kapı ve sol tarafda vâkı‘a bâkī hadîka mezbûre Havva’ya hisse ta‘yîn ve tahsîs olundukda herbiri muhâyee bi’l-mekân vechi üzere kabz ve kabûl etmeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî min-şehri Recebi’l-mürecceb li-sene seb‘a ve mie ve elf. Şuhûdü’l-hâl: Abdülcelil Efendi b. Mustafa el-imâm, Mustafa Çelebi b. Mehmed, el-Hâc Ahmed b. Hüseyin, el-Hâc Osman b. Mustafa, el-Hâc Mehmed b. Mehmed, Yahya Efendi, Mehmed Çelebi b. Mustafa, el-Hâc Hüseyin b. Mustafa, Mahmud Çelebi b. Mustafa, Abdullah Çelebi, İbrahim Beşe b. Abdullah. Yevmü’l-Cum‘a fî 21 min-Recebi’l-ferd li-sene 1107 Yevmü’s-sebt fî 12 min-Recebi’l-ferd li-sene 1107 Yevm-i ahad fî 23 min-Recebi’l-ferd li-sene 1107