İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 120 Hüküm no: 45 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım bt. Hüseyin Bey’in kaybolan eşyalarını elinde bulunduran Süleyman Ağa b. Abdullah’ın eşyaları iade etmesi Mahmiye-i İstanbul’da Mollagürânî mahallesinde sâkine fahrü’l-muhadderât Fâtıma Hanım bt. Hüseyin Bey nâm hatun meclis-i şer‘-i şerîf-i enverde tüccâr tâifesinden Süleyman Ağa b. Abdullah mahzarında üzerine da‘vâ ve takrîr-i kelâm edip mezbûr Süleyman Ağa’nın yedinde olup işbu meclis-i şer‘de mevcûd olan otuz beş bin akçe kıymetli yâkut ve elmas ile murassa‘ üç paftalı cevâhir kuşak ve on altı bin akçe kıymetli inci enselik ve on beş bin akçe kıymetli inci saçlık ve ma‘a on ayak incili altın saç bağı benim mülküm olup târih-i kitâbdan iki sene mukaddem gāib ani’l-meclis hâlâ Sayda-i Beyrud vâlîsi olan Mustafa Paşa hazretleri hizmetinde olan babam mezbûr Hüseyin Bey kendi menzilimde benim haberim yoğiken bi-gayr-ı hakkın ahz u gasb etmekle mülkümden zâyi‘ olmuşidi hâlâ eşyâ-yı mezkûremi mezbûrun yedinde buldum taleb ederim suâl olunup alıverilmesi matlûbumdur dedikde gıbbe’s-suâl mezbûr Süleyman Ağa cevâbında ben eşyâ-i muharrere-i mezkûrenin mecmû‘unu sûk-ı sultânîde bundan akdem gāib ani’l-meclis Ahmed Ağa nâm kimesneden ba‘de’l-müzâyede ve inkıtâ‘ı’r-rağbe dört yüz yetmiş beş guruş semen-i medfû‘a iştirâ etmeğin mülk-i müşterâm olmak üzere vaz‘-ı yed ederim ber-vech-i muharrer mezbûre Fâtıma Hanım’ın mülkü olduğu ma‘lûmum değildir deyicek müdde‘iye-i mezbûre Fâtıma Hanım’dan müdde‘âsını mübeyyene beyyine taleb olundukda udûl-i Müslimînden olup mezbûrenin zâtını ma‘rifet-i şer‘iye ile ârifân olan mahmiye-i mezbûrede Suhte Sinan mahallesi sâkinlerinden Mehmed Çelebi b. Halil ve Mustafa Çelebi b. Ali nâm kimesneler li-ecli’ş-şehâde meclis-i şer‘a hâzırân olup istişhâd [19a] [Kaydın devamı 19a’dadır.] olunduklarında fi’l-hakīka mezbûr Süleyman Ağa’nın yedinde olup işbu meclis-i şer‘de mevcûd olan otuz beş bin akçe kıymetli yâkut ve elmas ile murassa‘ üç paftalı cevâhir kuşak ve on altı bin akçe kıymetli inci enselik ve on beş bin akçe kıymetli inci saçlık ve ma‘a on ayak incili altın saç bağı mezbûre Fâtıma Hanım’ın mülkü olup târih-i kitâbdan iki sene mukaddem mülkünden zâyi‘ olmuşidi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle oldukdan sonra eşyâ-i mezkûreyi âhara bey‘ veyâ hîbe veyâ taraf-ı şer‘iyeden bir vechile mülkünden ihrâc etmediğine mezbûre Fâtıma Hanım’a yemîn teklîf olundukda ol dahi alâ vefki’l-mesûl yemîn billâhi’l-aliyyü’l-a‘lâ etmeğin mûcebiyle ba‘de’l-hükmeşyâ-i muharrere-i mezkûreyi mezbûre Fâtıma Hanım’a teslîme mezbûr Süleyman Ağa’ya tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Recebi’l-ferd li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Molla Süleyman b. Hızır, Mübâşir Ali Çavuş b. Solak Ahmed Ağa, Mustafa b. Şaban, Receb b. Süleyman, Mehmed Çelebi b. İdris.