İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 121 Hüküm no: 46 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Hacı İbrahim b. Yusuf’un borcunun bir kısmı devlet tarafından ödendiğinden serbest bırakıldığı İşbu sene-i mübârekede es-sadakatü tereddü’l-belâ ve tezîdü’l-ömr mazmûnu ile amel buyurulup ihrâz-ı rızâ-yı melik-i Gaffâr ve isticlâb-ı ed‘iyye-i hayriye-i ashâb-ı ıztırâr için tesâdduk buyurulmağla sicn-i sultânîde düyûn-ı müsbite için mahbûs olan fukarâ ve zu‘afânın garîmleri yedlerinde olan hücec-i şer‘iye mûcebince haklarının bir mikdârını taraf-ı Devlet-i aliyye’den ihsân ve tesâdduk olunan meblağdan ahz ve bâkī haklarından medyûnlarının zimmetlerini ibrâ etmeleriyle husûs-ı âti’z-zikri mahâllinde ketb u tahrîr için savb-ı şer‘den irsâl [olunan] Ebûbekir Efendi mahmiye-i İstanbul’da vâki‘ Baba Cafer zindânına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde işbu derûn-ı hüccetde mastûrü’l-ism olan el-Hâc Mehmed Ağa b. el-Hâc Abdülkadir meclis-i ma‘kūd-ı mezbûrda medyûn-ı merkūm el-Hâc İbrahim b. Yusuf mahzarında ikrâr ve takrîr-i kelâm edip işbu derûn-ı hüccetde mastûr olduğu üzere edâsına tenbîh olunan yirmi yedi guruş ile üç rub‘ guruşun on guruşunu ber-[vech-i] muharrer tesâdduk ve ihsân olunan meblağdan ahz u kabz edip mâ‘adâ on yedi guruş ile üç rub‘ guruş da‘vâsından mezbûr el-Hâc İbrahim’in [zimmetini] ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mezbûr Ebûbekir Efendi mahâllinde ketb u tahrîr edip ba‘dehû ma‘an ba‘s olunan Mehmed b. Ahmed ve Receb b. Osman ile meclis-i şer‘a gelip alâ vukū‘ihî inhâ ve tahrîr etmeğin mâ vaka‘a bi’t-taleb ketb olundu. Hurrire fi’l-yevmi’l-hâmis min-Şa‘bâni’l-mu‘azzam sene [1]107. Şuhûdü’l-hâl: el-Hâc Mustafa Ağa b. ( ), es-Seyyid Şükrullah Efendi, es-Seyyid Hasan Efendi, es-Seyyid Ali Efendi, Ali Çelebi b. Mehmed.