İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 125 Hüküm no: 48 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa b. Osman’ın Lütfi Paşa ekmek fırınını Aritun v. Minas ve Mircan v. Haim’e kiraya verdiği Hılâl-i sütûrda mastûr olan husûsu mahâllinde ketb u tahrîr için savb-ı şer‘den bi’t-taleb irsâl olunan Mustafa Efendi b. ( ) hâlâ revnak-ârâ-yı mesned-i fetvâ ve şeref-bahşâ-yı erîke-i takvâ sultânü’l-ulemâ bürhânü’l-fudalâ hurşîd-i behçet-bedîde sehl-i fezâil ve bedr-i şeref-resîd müfârık-ı efâzıl hâce-i âlî-hazret-i pâdişâh-ı mu‘azzam mu‘allim-i şehin-şâh-ı ma‘delet-penâh-ı a‘zam kurretü sıdkıhu’l-fazli’l-ikbâl izzetü feleki’l-mecd ve’l-efdâl râtibe-bahş-ı muhavvel-i âfâk ve ale’l-küllî fi’l-fazli fâk melâz-ı bî-minneti kâffe-i ulemâ ve melce-i âmmü’n-nef‘i fudalâ zübdetü el-tarvîs? şeyh-i meşâyihi’l-islâm ve’l-Müslimîn es-Seyyid Feyzullah hafezahü’l-meliki’l-mu‘în hazretlerinin mahmiye-i İstanbul hısnı ebvâbından Silivrikapısı hâricinde sâkin oldukları bahçeye varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr eyledikde hazret-i müşârün-ileyh esbağallâhu te‘âlâ ni‘amehû aleyhin mahmiye-i İstanbul’da Lütfi Paşa mahallesinde vâki‘ Lütfi [Paşa] habbâz fırınında müste’cirleri olan Aritun v. Minas ve Mircan v. Haim nâm zimmîler meclis-i ma‘kūd-ı mezbûrda müşârün-ileyh hazretleri taraf-ı bâhirü’ş-şereflerinden husûs-ı âti’z-zikre vekîl-i müseccelleri olan umdetü’l-emâcid ve’l-a‘yân makbûlü’s-sudûr ve’l-erkân el-Hâc Mehmed Ağa b. Osman mahzarında herbiri ikrâr-ı tâm ve takrîr-i kelâm edip müvekkil-i müşârün-ileyh hazretlerinin taht-ı tasarruflarında olan Lütfi Paşa fırını demekle ma‘rûf habbâz fırınını beher yevm birer yaldız altını olmak üzere işbu bin yüz yedi senesi şehr-i Ramazanü’l-mübârek’i gurresinden bir sene tamamına değin dokuz yüz kıt‘a kâmilü’l-vezn ve’l-a‘yâr aynî esedî guruşa vekîl-i mûmâ-ileyh el-Hâc Mehmed Ağa bize îcâr ve teslîm biz dahi istîcâr ve tesellüm ve kabûl edip ücret-i mezbûreden herbirimiz âharın zimmetine lâzım gelen meblağa emr ve kabûlü hâviye kefâlet-i sahîha ile alâ haddihî kefîl olduk dediklerinde gıbbe’t-tasdîkı’ş-şer‘î vâki‘ hâli mezbûr Mustafa Efendi mahâllinde tahrîr edip ba‘dehû ma‘an ba‘s olunan [17b] meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min-şehri Ramazani’l-mübârek sene [1]107 Şuhûdü’l-hâl: Hasan Beşe b. Ömer, Receb Çelebi b. Süleyman, Ahmed Beşe b. Abdülkadir, Mustafa Ağa b. Derviş, Ali Çelebi b. Abdullah, Mehmed Beşe b. Hasan.