İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 133 Hüküm no: 55 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun bt. Kaliçecizâde Abdurrahman’ın para vakfına ait evin Yusuf b. Abdullah’a satıldığı Mahmiye-i İstanbul’da Nişancı Cafer Çelebi mahallesinde sâkin bundan akdem vefât eden Kaliçecizâde Abdurrahman Efendi’nin kızı Ümmühani Hatun nâm sahibü’l-hayrın eczâ-i şerîfe tilâvet için mevkūfe nukūduna bi’l-fi‘il mütevellî olan Mehmed Efendi b. Fazlullah Efendi nâm kimesne meclis-i şer‘-i şerîf-i enverde işbu râfi‘u’l-kitâb İbrahim Efendi b. Mehmed mahzarında bi’t-tevliye ikrâr ve takrîr-i kelâm edip mahalle-i mezbûre ahâlîsinden iken bundan akdem bilâ-vâris fevt olmağla terekesi cânib-i beytü’l-mâla âide olan kuzâtdan Abdülkerim Efendi b. Cafer b. Abdurrahman nâm kimesnenin mahalle-i mezbûrede vâki‘ bir tarafdan Halil Çelebi mülkü ve bir tarafdan İbrahim Bey mülkü ve bir tarafdan Çavuş veresesi mülkü ve bir tarafdan tarîk-i âm ile mahdûd büyût-ı adîdeyi müştemil mülk menzili işbu yedimde olan hükm hücceti nâtıka olduğu üzere vakf-ı mezbûrdan beş yüz guruşa bi-tarîkı’l-istiğlâl rehn olduğunu bundan akdem tevliyetim hasebiyle menzil-i mezbûr beytü’l-mâl olmak üzere vaz‘-ı yed eder …? Beytü’l-mâl Emîni Mustafa Ağa b. Abdülmennan’ın vekîl-i müsecceli olan işbu Mehmed Çelebi b. Mustafa muvâcehesinde meclis-i şer‘de da‘vâ ve müdde‘âmı şühûd-ı udûl ile isbât edip hükm-i hâkim lâhık olmağla yedime hüccet-i şer‘iye verilmişidi. El-hâletü-hâzihî menzil-i mahdûd-ı mezkûr işbu Yusuf b. Abdullah nâm münâdî ile altmış günden mütecâviz sûk-ı sultânîde nidâ ve müzâyede olunup ve ba‘de inkıtâ‘ı’r-rağbe semen-i misli olduğu ihbâr-ı sikāt ile mütehakkık olan iki yüz elli bir guruşa merkūm İbrahim Efendi’ye bey‘-ı kat‘î ile bey‘ ve temlîk ve teslîm ol dahi ber-vech-i muharrer iştirâ ve temellük ve kabz edip ve semen-i mezbûr iki yüz elli guruşu bana edâ ve teslîm ben dahi yedinden bi’t-tevliye vakf-ı mezbûr için ahz u kabz eyledim ba‘de’l-yevm menzil-i mahdûd-ı mezkûr merkūm İbrahim Efendi’nin mülk-i müşterâsı ve hakk-ı sırfı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min-Recebi’l-ferd li-sene seb‘a ve mie ve elf. Şuhûdü’l-hâl: el-Hâc Mustafa Çelebi Kethudâ-yı muhzırân, Abdurrahman Efendi Kâtib-i muhâsebe, Mustafa Çelebi Muhzır-ı muhâsebe, Mustafa Çelebi b. İsmail. Yevmü’l-isneyn fî 24 min-Recebi’l-ferd li-sene 1107