İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 134 Hüküm no: 56 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal emini Mustafa Ağa b. Abdülmennan’ın, Ümmühani Hatun bt. Kaliçecizâde Abdurrahman Hatun’un para vakfına ait evi mütevellî Mehmed Efendi b. Fazlullah’a teslim etmesi Mahmiye-i İstanbul’da Nişancı Cafer Çelebi mahallesinde sâkin iken bundan akdem vefât eden Kaliçecizâde Abdurrahman Efendi’nin kızı Ümmühani Hatun nâm sahibü’l-hayrın eczâ-i şerîfe tilâvet için mevkūfe nukūduna bi’l-fi‘il mütevellî olan Mehmed Efendi b. Fazlullah Efendi nâm kimesne meclis-i şer‘-i şerîf-i enverde mahmiye-i mezbûrede beytü’l-mâl-i hâssa emîni <> Mustafa Ağa b. Abdülmennan’ın vekîl-i müsecceli olmağla zikri âtî menzile beytü’l-mâla âid olmak zu‘muyla vaz‘-ı yed eden Mehmed Çelebi b. Mustafa mahzarında bi’t-tevliye üzerine da‘vâ ve takrîr-i kelâm edip mahalle-i mezbûre ahâlîsinden iken bundan esbak bilâ-vâris fevt olan kuzâtdan Abdülkerim Efendi b. Cafer b. Abdurrahman nâm kimesne hâl-i hayatında işbu yedimde olan istiğlâl hücceti nâtıka olduğu üzere yedinde mülkü olup mahalle-i mezbûrede vâki‘ bir tarafdan Halil Çelebi mülkü ve bir tarafdan İbrahim Bey mülkü ve bir tarafdan Çavuş veresesi mülkü ve bir tarafdan tarîk-i âm ile mahdûd büyût-ı adîdeyi müştemil mülk menzilini bin doksan sekiz senesi Saferü’l-hayr’ı evâsıtında vakf-ı mezbûra mütevellî iken fevt olan Hasan Ağa b. Mustafa’ya hayatında beş yüz guruşa bi-tarîkı’l-istiğlâl bey‘ ve teslîm ve meblağ-ı mezbûru mal-ı vakf-ı mezbûrdan olmak üzere mütevellî-i merkūm Hasan Ağa yedinden ahz u kabz edip kable’l-fek merkūm Abdülkerim Efendi vefât etmekle menzil-i mahdûd-ı mezkûr ber-vech-i meşrûh vakf-ı mezbûra rehn iken bundan akdem emîn-i mezbûr merkūm Abdülkerim Efendi bilâ-vâris fevt olmağla menzil-i mezkûru bi-gayr-ı hakkın vaz‘-ı yed edip hatta bey‘a arz etmişdir hâlâ vekîl-i merkūm Mehmed Çelebi’ye suâl olunup kasr-ı yedine [19b] ve menzil-i mezbûru bana teslîm etmek üzere tenbîh olunmak bi’t-tevliye matlûbumdur deyü mazmûnu min-külli’l-vücûh takrîrine mutâbık ve târih-i mezbûr ile müverraha ve mahmiye-i mezbûrede muhâsib-i evkāf olan Abdullah Efendi’nin hatt u hatmini hâviye bir kıt‘a istiğlâl hücceti ibrâz edip merkūm Mehmed Çelebi muvâcehesinde feth ü kırâet ve istintâk olundukda merkūm Mehmed Çelebi cevâbında menzil-i mahdûd-ı mezkûra ber-vech-i muharrer vaz‘-ı yedini ikrâr lâkin mazmûn-ı hüccet-i mezkûreyi inkâr edicek mütevellî-i mezbûr Mehmed Efendi’den mazmûn-ı hüccet-i mezkûreye beyyine taleb olundukda udûl-i Müslimînden olup mahmiye-i mezbûrede Karagümrük kurbünde vâki‘ Dâye Hatun mahallesi ahâlîsinden el-Hâc Salih Efendi b. Receb ve el-Hâc İsmail Çelebi b. el-Hâc Murad nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka bin doksan sekiz senesi Saferü’l-hayr’ı evâsıtında merkūm Abdülkerim Efendi b. Cafer b. Abdurrahman hayatında mülkü olan menzil-i mahdûd-ı mezkûru vakf-ı mezbûra mütevellî iken vefât eden Hasan Ağa b. Mustafa’ya beş yüz guruşa bi-tarîkı’l-istiğlâl bizim huzûrumuzda bey‘ ve teslîm ve meblağ-ı mezbûru mal-ı vakf-ı mezbûrdan olmak üzere mütevellî-i merkūm Hasan Ağa yedinden ahz u kabz edip ve hüccet-i mezbûreyi mûmâ-ileyh Abdullah Efendi’ye tahrîr etdirip kable’l-fek merkūm Abdülkerim Efendi vefât etmişidi biz mazmûn-ı hüccet-i mezkûreye bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükmi’ş-şer‘î emîn-i mezbûrun menzil-i mahdûd-ı mezkûrdan kasr-ı yedine ve mütevellî-i mezbûr Mehmed Efendi’ye teslîm etmek üzere vekîl-i mezbûr Mehmed Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’s-sânî min-Recebi’l-ferd li-sene seb‘a ve mie ve elf. Şuhûdü’l-hâl: el-Hâc Mustafa Çelebi Kethudâ-yı muhzırân, Mustafa Çelebi b. el-Hâc İsmail, İbrahim Çelebi b. Ahmed, Mustafa Çelebi b. Şaban, Ahmed b. Ahmed