İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 138 Hüküm no: 59 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Muhsin’in, Varadin Kadısı Hamdi Mehmed Efendi b. Talibî’de olan alacağının terekesinden ödenmesi Vilâyet-i Rumeli’nde Varadin kasabası ahâlîsinden olup mahmiye-i İstanbul’da Kadıçeşmesi kurbünde Yarhisârî Mustafa Efendi mahallesinde sâkin iken bundan akdem vefât yine sâbıkā Varadin Kadısı Hamdi Mehmed Efendi b. Talibî b. Abdullah’ın hayatında kethudâsı iken vefât eden Muhsin b. İbrahim’in sulbî kebîr oğlu bâ‘isü hâze’l-kitâb diğer İbrahim Çelebi nâm kimesne meclis-i şer‘-i şerîf-i enverde mezbûr Hamdi Mehmed Efendi’nin vasîyy-i muhtârı olmağla terekesine vâzı‘u’l-yed olan fahrü’l-müderrisîni’l-kirâm Muharrem Efendi b. Mustafa tarafından husûs-ı âti’l-beyâna vekîl olduğu Hasan Efendi b. Ali ve İbrahim Çelebi b. Ahmed nâm kimesneler şehâdetleriyle sâbit olan Ahmed Efendi b. Mehmed nâm kimesne mahzarında üzerine da‘vâ ve takrîr-i kelâm edip mezbûr Hamdi Mehmed Efendi hayatında benim hâl-i sıgārımda vasîyy-i muhtârım olmağla babam mezbûr Muhsin’den ırsen bana intikāl eden on dört bin akçeyi bi’l-vesâye ahz u kabz ve kendi mesârifine sarfla istihlâk edip hatta mezbûr Hamdi Mehmed Efendi bin doksan dört senesinde hayatında meblağ-ı mezbûru bi’l-vesâye kabz ve mesârifine sarfla istihlâk etmekle zimmetinde bana deyni olduğunu ben yanında hâl-i sıgārımda hizmetinde iken medîne-i Belgrad’da şuhûd mahzarında ikrâr ve işhâd dahi etdikden sonra kable’l-edâ fevt olmağla suâl olunup vasîyy-i müşârün-ileyh terekesinden bana edâ etmek üzere vekîl-i mezbûra tenbîh olunmak matlûbumdur dedikde gıbbe’s-suâl vekîl-i merkūm cevâbında vekîl-i mezbûr Muharrem Efendi müteveffâ-yı Hamdi Mehmed Efendi’nin bi’l-vesâye [20b] vaz‘-ı yedini ikrâr lâkin deyn-i mezkûru münkir olmağın müdde‘î-i mezbûrdan müdde‘âsını mübeyyene beyyine taleb olundukda udûl-i Müslimînden ve sâbıkā medîne-i Belgrad’da sâkin muvakkaten Niğbolu [Niğbolu] kadısı olup mahmiye-i mezbûrede Koğacıdede mahallesinde sâkin Edirnevî Musa Efendi b. Himmet ve Küçükkaraman’da sâkin ve yine Belgrad ahâlîsinden olup sâbıkā Babadağı kadısı olan Osman Efendi b. İsmail ve Pirinçci Sinan mahallesinde sâkin es-Seyyid Mehmed Efendi b. es-Seyyid Ahmed nâm kimesneler li-ecli’ş-şehâde mahfil-i kazâya hâzırûn olup isre’l-istişhâd fi’l-hakīka müteveffâ-yı mezbûr Hamdi Mehmed Efendi b. Talibî b. Abdullah bin doksan dört senesinde medîne-i Belgrad’da hayatında işbu müdde‘î-i mezbûr İbrahim Çelebi’nin vasîsi olduğum hasebiyle babası mezbûr Muhsin’den intikāl eden [on] dört bin akçesini ahz u kabz ve kendi mesârifime sarfla istihlâk eyledim hâlâ zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa bu vech [üzere] şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr tahlîf-i şer‘î olundukdan sonra mûcebiyle vasîyy-i mûmâ-ileyh Muharrem Efendi müteveffâ-yı mezbûr Hamdi Mehmed Efendi’nin terekesinden meblağ-ı merkūm on dört bin akçeyi müdde‘î-i mezbûra edâ ve teslîm etmek üzere vekîl-i merkūma ba‘de’t-tenbîh mâ vaka‘a bi’t-taleb ketb olundu. Fi’l-yevmi’s-sâlis ve’l-işrîn [min Recebi’l-ferd] li-sene seb‘a ve mie ve elf. Şuhûdü’l-hâl: Mehmed Ağa Ser-muhzırân, Hasan Efendi b. Ali el-imâm, İbrahim Çelebi b. Ahmed, Musa? b. Ahmed, Mehmed Çelebi b. ( ).