İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 140 Hüküm no: 60 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Bey b. Kurd’un tımarından Gelveri köyündeki tarla, meşelik, otlak ve mahsulatını zapt eden Hoca Sinan Paşa vakfı mütevellîsi Seyyid Ömer Çelebi b. Receb’in bu yerleri teslim etmesi Husûs-ı âti’z-zikrin mahâllinde istimâ‘ ve tahrîr ve fasl [u] hasmı için kıbel-i şer‘den bir nâib irsâl olunmak bâbında bu fakīre hitâben fermân-ı cihân-mutâ‘ sâdır olmağla imtisâlen-leh kıbel-i şer‘den me’zûnen ba‘s olunan sâbıkā Kestel kadısı umdetü kuzâtü’l-kirâm Hidâyetullah Efendi b. Ahmed Havâss-ı Aliyye kazâsı müzâfâtından Silivri nâhiyesine tâbi‘ Büyükçeltikçi nâm karye kurbünde vâki‘ zikri âtî arâzinin üzerlerine varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr eyledikde zikrolunan Çeltikçi nâm karye ve gayrı tımara berat-ı şerîf-i âlîşân ile mutasarrıf olan Hüseyin Bey b. Kurd nâm kimesne meclis-i ma‘kūd-ı mezbûrda merhûm Hoca Sinan Paşa vakfına bi’l-fi‘il mütevellî olmağla vakf-ı mezbûrdan olan Gelveri nâm karye arâzisinden olmak üzere zikri âtî tarla ve meşelik ve otlağa ve mahsûlâtına vâzı‘u’l-yed olan es-Seyyid Ömer Çelebi b. Receb mahzarında üzerine da‘vâ ve takrîr-i kelâm edip benim tımarım karyelerinden olan sâlifü’z-zikr Çeltikçi nâm karyenin cânib-i şarkīsinde vâki‘ etrâf-ı erba‘ası devletlü ve sa‘âdetlü Hatice Sultân hâssı ve tımar-ı mezbûrdan olan arâzi ve mârrü’z-zikr Hoca Sinan Paşa vakfından olan arâzi ve Gelveri nâm karyeye giden tarîkden nehir başına ondan Kırlangıç pınarına ondan dere sıra oluklar başına ondan hark-ı kebîr hizâsından Kavak değirmenine ve yine hark-ı mezbûrdan Tayka değirmenine ve hark kenarından Ramazan değirmenine ve yine hark-ı mezbûr hizâsından Köstemir karyesine müntehî tahmînen yüz elli keyl tohm isti‘âb eder tarlalar ve meşelik ve otlak feth-i hâkānîden beri benim mutasarrıf olduğu tımar-ı mezbûr arâzisinden olup beher sene hâsıl olan a‘şâr-ı şer‘iye ve sâir rüsûmâtı tımar-ı mezkûr sipâhileri kabz edegelmişiken hâlâ mütevellî-i mezbûr es-Seyyid Ömer Çelebi zikrolunan tarla ve meşelik ve otlağı vakf-ı merkūm karyesi toprağından olmak üzere zabt ve hâsıl olan a‘şâr-ı şer‘iye ve sâir rüsûmâtına bi-gayr-ı hakkın vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl mütevellî-i mezbûr Ömer Çelebi cevâbında zikrolunan arâzi vakf-ı mezbûr toprağından olmak üzere zabt ve mahsûlâtına bi’t-tevliye vaz‘-ı yedini ikrâr lâkin müdde‘î-i mezbûrun ber-vech-i meşrûh tımarı karyelerinden olup beher sene a‘şâr-ı şer‘iye ve sâir rüsûmâtı tımar-ı mezbûr zâbitleri tarafından kabz olunageldiğini inkâr edicek müdde‘î-i mezbûrdan sıdk-ı makāline beyyine taleb olundukda udûl-i ahrâr-ı ricâl-i Müslimînden olup Köstemir nâm karye ahâlîsinden Receb Çelebi b. Pîrî Bey ve Müezzin Ahmed Halîfe b. Bâyezid ve Mustafa b. Ali Kapıcı ve diğer Mustafa Çelebi b. Ali ve İbrahim b. Şaban ve Ali b. Mahmud, İmâm Osman Efendi b. Bayram ve Halil b. Mahmud ve diğer Halil b. İbrahim ve Mustafa b. Ahmed ve Veli b. Durak ve Kara nâm karye ahâlîsinden Hüseyin b. Mahmud ve Ahmed b. Mehmed ve Mehmed b. Baltacı Hüseyin ve Ahmed Çelebi b. el-Hâc Durak ve diğer Ahmed Çelebi b. el-Hâc Mehmed ve Beyceler nâm karyeden Mehmed Bey ve Mustafa Bey b. Abdullah ve Ahmed Çelebi b. Hüseyin ve Mehmed Kethudâ b. Ahmed ve Ahmed Beşe b. Hamza ve Derviş Beşe b. Ali ve Halıcı nâm karyeden Mehmed b. Hasan ve Kara Ali b. Veli ve Mehmed Ağa b. Ali ve Abdullah Çelebi b. Abdullah ve Mustafa Beşe b. İvaz Bey b. Abdullah ve Hasan Beşe b. Ali ve Mustafa Çelebi b. Ömer Ağa nâm kimesneler li-ecli’ş-şehâde meclis-i mezbûra hâzırûn olup isre’l-istişhâd fi’l-hakīka işbu mârrü’z-zikr Çeltikçi nâm karyenin cânib-i şarkīsinde vâki‘ etrâf-ı erba‘ası müşârün-ileyhâ Hatice Sultân hâssı ve tımar-ı mezbûrdan olan tarlalar ve Hoca Sinan Paşa vakfından olan arâzi ve Gelveri nâm karyeye giden tarîkden nehir başına ondan Kırlangıç pınarına ondan dere sıra oluklar başına ondan hark-ı kebîr hizâsından Kavak değirmenine ve yine hark-ı mezbûrdan Tayka değirmenine ve hark-ı mezbûr kenarından Ramazan değirmenine ve hark-ı mezbûr hizâsından Köstemir karyesine müntehî tahmînen yüz elli keyl tohm isti‘âb eder işbu tarlalar ve meşelik ve otlak feth-i hâkānîden beri müdde‘î-i mezbûr Hüseyin Bey’in tasarrufunda olan tımar-ı merkūm arâzisinden olup beher sene hâsıl olan a‘şâr-ı şer‘iye ve sâir rüsûmâtı tımar-ı merkūm sipâhileri tarafından kabz oluna [21a] gelmişdir biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm arâzî-i mezbûreden mütevellî-i mezbûrun kasr-ı yedine tenbîh ve vâki‘ hâli mevlânâ-yı mezbûr Hidâyetullah Efendi mahâllinde tahrîr ba‘dehû ma‘an ba‘s olunan Musa Çelebi b. Musa ve diğer Musa b. Osman ile bi-ecmâ‘ihim meclis-i şer‘a gelip mütevellî-i mezbûr muvâcehesinde alâ vukū‘ihî inhâ ve takrîr etmeğin hükm-i mezbûr kıbel-i şer‘den ba‘de’t-tenbîh mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Recebi’l-ferd li-sene seb‘a mie ve elf. Şuhûdü’l-hâl: İsmail Bey Kethudâ-yı Çiftlik-i Mustafa Paşa, Ömer Kethudâ b. Mehmed an karye-i Köstemir, Mustafa b. Yusuf an karye-i mezbûr, Kapıcı Mehmed Bey an karye-i mezbûre, Murtaza Çelebi b Lütfullah, Ali Ağa b. Mehmed. Yevm-i erba‘a fî 26 min-Recebi’l-ferd li-sene 1107