İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 141 Hüküm no: 61 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Tanaş v. İlya’nın dükkânını içindeki malzemeleriyle birlikte Bakkal Mustafa Çelebi b. Receb’e sattığı Mahmiye-i İstanbul’da Haseki çarşısında vâki‘ üç kıt‘a bakkāl dükkânında müste’cir olan kefere dükkânlarında hamr ve arak bey‘ ederler deyü mahalleleri ahâlîsi şikâyet eylemeleriyle zikrolunan dükkânlarda bakkāl keferesi ihrâc olunup ehl-i İslâm’dan bakkāllara îcâr oluna deyü fermân-ı âlî sâdır olmağın imtisâlen-leh savb-ı şer‘-i mutahhardan keşf nâibimiz olan Abdullah Efendi b. Ali irsâl olunup ol dahi zikrolunan dükkânlardan sûk-ı mezbûrda Hobyâr mahallesinde vâki‘ bakkāl dükkânına varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf eyleyip dükkân-ı mezbûrda müste’cir olan Tanaş v. İlya nâm zimmîye ber-mûceb-i fermân-ı âlî dükkân-ı mezbûrdan çıkmak üzere tenbîh eylediğinden sonra mezbûr Tanaş meclis-i ma‘kūd-ı mezbûrda yine tâife-i mezbûrdan Mustafa Çelebi b. Receb nâm kimesne mahzarında ikrâr ve takrîr-i kelâm edip işbu dükkân-ı mezbûr içinde mevcûd evzânı ve envâ‘ı beynimizde ma‘lûme bakkāl metâ‘ı olan Edremid siyahı ve İzmir siyahı üzüm ve Beylerce üzümü ve incir ve pekmez ve tulum peyniri ve kaşkaval peyniri ve İzmir sabunu ve revgan-ı sâde ve asel ve yağ mumu ve nardenk ve sirke ve şa‘riye ve nohud ve Eflak tuzu ve soğan ve böğrülce ve fındık ve zeytin ve sâir beynimizde ma‘lûm bakkāl âlâtı ve dükkân levâzımını mezbûr Mustafa Çelebi’ye bi-safkatin vâhidetin yirmi iki bin dokuz yüz altmış yedi sağ akçeye bey‘ ve teslîm ve temlîk ol dahi iştirâ ve temellük ve kabz ve tesellüm ve kabûl eyleyip semeni olan meblağ-ı mezbûr yirmi iki bin dokuz yüz altmış yedi akçeyi mezbûr Mustafa Çelebi defaten edâya iktidârı olmayıp tecîl ve taksîte tâlib olmağın ben dahi her sekiz gün tamamında ikişer bin akçe verip târih-i kitâbdan doksan gün tamamına değin edâ ve teslîm etmek üzere meblağ-ı mezbûru tecîl ve taksît eylediğimde mezbûr Mustafa Çelebi dahi kabûl ve meblağ-ı mezbûru ber-vech-i muharrer bana edâya ta‘ahhüd eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ömer b. Ahmed ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fî gurre-i Recebi’l-ferd li-sene seb‘a ve mie ve elf. Şuhûdü’l-hâl: Sunullah Efendi b. Mehmed el-imâm, Mehmed Efendi el-imâm, Hamza Halîfe b. Mehmed el-müezzin, Mustafa Çelebi b. ( ), Hüseyin Bey Solak, Pazarbaşı el-Hâc Osman.