İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 142 Hüküm no: 62 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Odabaşı Çarşısı ekmekçilerinden Makdisî Vartok v. Manuk’un, ekmekçi ustası Asvador v. Zarak’ın ekmek satmasının engellenmesi talebinin reddedildiği Habbâz tâifesinden olup mahmiye-i İstanbul’da Odabaşı sûkunda ekmekçi olan Makdisî Vartok v. Manuk nâm zimmî meclis-i şer‘-i şerîf-i enverde yine tâife-i mezbûreden Şehremîni sûkunda vâki‘ ekmekçi fırını ustası olan işbu bâ‘isü’-sifr Asvador v. Zarak nâm zimmî muvâcehesinde üzerine da‘vâ ve takrîr-i kelâm edip mahmiye-i mezbûre hısnı ebvâbından Topkapısı dâhilinde vâki‘ sûkda bir tarafı helvâcı ve bir tarafı attar dükkânları olup Hatice Sultân dükkânı demekle ma‘rûf ekmekçi iskemlesinde kadîmden Ma‘cûncu sûkda vâki‘ fırından ekmek bey‘ olunagelip zikrolunan ma‘cûncu fırını mu‘attal kalmak hasebiyle sâlifü’z-zikr iskemlede on sene mikdârı benim taht-ı icâremde olan Odabaşı sûkunda vâki‘ fırından ekmek bey‘ olunur idi hâlâ zikrolunan iskemlede mezbûr Asvador ekmek bey‘ etdirmekle suâl olunup zikri sebk eden iskemlede yine Odabaşı sûkunda vâki‘ fırından ekmek bey‘ olunmak matlûbumdur dedikde gıbbe’s-suâl mezbûr Asvador cevâbında kazıyye minvâl-i meşrûh üzere olup lâkin zikrolunan Odabaşı fırını sûk-ı mezbûra ba‘îd olduğundan mâ‘adâ gâh mu‘attal kalıp zikrolunan iskemlede vakti ile ekmek bulunmamağın ahâlî-i mahalle şikâyet eylediklerinde taraf-ı şer‘den benim taht-ı icâremde olan Şehremîni fırını ta‘yîn olunmağla üç senedir Şehremîni fırınından bey‘ oluna gelmişdir deyicek hakīkat-i hâli istihbâr için kıbel-i şer‘den keşf nâibimiz olan Abdullah Efendi b. Ali irsâl olunup ol dahi zikrolunan iskemle üzerine varıp akd-i meclis-i şer‘-i şerîf eylediğinde ahâlî-i mahalle-i mezbûreden Sefer Bey b. İvaz ve Attar Mehmed Çelebi b. Receb ve Mehmed Ağa b. İvaz ve Müezzin Mustafa Halîfe b. Müstakīm ve İmâmzâde Mehmed Çelebi b. Ahmed ve sâir zeyl-i vesîkada muharrerü’l-esâmî kimesneler meclis-i ma‘kūd-ı mezbûra hâzırûn olup istihbâr olunduklarında fi’l-hakīka zikrolunan işbu ekmekçi iskemlesinde kadîmden Ma‘cûncu sûkunda vâki‘ fırından ekmek bey‘ olunur idi lâkin fırın-ı mezbûr mu‘attal kalmağla on sene mikdârı Odabaşı fırınından ekmek bey‘ olunup Odabaşı [21b] fırını sûk-ı mezbûra ba‘îd olduğundan gayrı gâh mu‘attal kalıp vakti ile ekmek bulunmamağla ahâlî-i mahalle şikâyet eylediklerinde taraf-ı şer‘den yerine Şehremîni fırını ta‘yîn olunmağın üç senedir Şehremîni fırınından ekmek bey‘ olunur ve ahâlî-i mahallemiz dahi bir vechile râzılar olup yine kemâ-kân Şehremîni fırınından ekmek bey‘ olunmasın taleb ve iltimâs ederler deyü herbiri hakīkat-i hâli haber vermeleriyle vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mûcebiyle zikrolunan iskemlede yine kemâ-kân Şehremîni fırınından ekmek bey‘ olunmak üzere mezbûr Asvador’a kıbel-i şer‘den izn verilip müdde‘î-i mezbûr Makdisî Vartok zimmî bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Recebi’l-ferd li-sene seb‘a ve mie ve elf. Şuhûdü’l-hâl: Ahmed Efendi b. Mustafa el-imâm, Mustafa Çelebi b. Ahmed, Mustafa Bey b. Abdullah, Ömer Usta b. İbrahim, Mehmed Çelebi b. Abdullah, el-Hâc Hasan b. Ali, İsmail b. İbrahim.