İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 143 Hüküm no: 63 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa ile kızı Nimetullah’ın evlerinin komşuları Hacı Mehmed Ağa b. Mustafa’nın evine verdiği zararın önlenmesi Husûs-ı âti’l-beyânın mahâllinde ketb u tahrîri <> bâbında fermân-ı âlî vârid olmağın imtisâlen-leh savb-ı şer‘-i enverden keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Ali Halîfe b. Abdullah ve Ahmed Halîfe b. Abdülmennan ile mahmiye-i İstanbul’da Kasab İvaz mahallesinde sâkin el-Hâc Mehmed Ağa b. Mustafa nâm kimesnenin menziline varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf eylediğinde mezbûr Mehmed Ağa’nın câr-ı mülâsıkı olup sâbıkā kul kethudâsı müteveffâ Mehmed Ağa’nın sulbiye kızı Nimetullah nâm sagīrenin vâlidesi ve tesviye-i umûruna kıbel-i şer‘den mansûbe vasîsi Hatice bt. Mustafa nâm hatun tarafından husûs-ı âti’z-zikre vekîl olduğu zâtını ma‘rifet-i şer‘iye ile ârifân Ali b. Mustafa ve Ali Ağa b. Ahmed şehâdetleriyle şer‘an sâbit olan el-Hâc Ali b. Mehmed nâm kimesne meclis-i ma‘kūd-ı mezbûrda işbu bâ‘isü’l-vesîka mezbûr el-Hâc Mehmed Ağa muvâcehesinde bi’l-vekâle ikrâr ve takrîr-i kelâm edip müvekkile-i mezbûre ile sagīre-i mezbûrenin mülk-i mevrûs-ı müşterekleri işbu menzilin mezbûr Mehmed Ağa’nın menzili duvarı üzerine mütevellî mi‘mârân-ı mezbûrân mesâhaları üzere tûlen yirmi dokuz ve arzen buçuk zirâ‘ saçağının damlası ve hamam ile diğer oda üzerlerinden müctemi‘ olan yağmur suyu mukaddemâ oluk ile müvekkile-i mezbûrenin kendi havlusuna cereyân edip mürûr-ı eyyâm ile zikrolunan mevzi‘lerin olukları zâil olmağın kemâ-kân oluklar vaz‘ olunsun ve menzil-i mezbûrun fevkānîsinde vâki‘ kenîfde iki sagīr cam ve vüstâda vâki‘ kenîfde bir sagīr cam hâdis olup menzilimin makarr-ı nisvân olan mevâzi‘ine havâleleri vardır def‘ olunsun deyü da‘vâ etmekle müvekkile-i mezbûre dahi ber-vech-i mübeyyen zikrolunan mevzi‘lere kemâ-kân müceddeden oluklar vaz‘ edip kendi havlusuna icrâ etmek üzere ve zikrolunan fevkānîde vâki‘ kenîfde olan iki sagīr camı seddedip ve vüstâda vâki‘ kenîfde olan bir sagīr camı iki kat havâle camı yapmak üzere ta‘ahhüd eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb u tahrîr ve ma‘an ba‘s olunan Mehmed b. İbrahim ve Ömer b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min-Recebi’l-ferd li-sene seb‘a ve mie ve elf. Şuhûdü’l-hâl: Mehmed b. Yusuf el-müezzin, Mehmed Efendi b. Mustafa, Mehmed Çelebi b. Abdullah, el-Hâc Ahmed b. Abdullah, Ali Çelebi b. Hasan, Sinan b. Mehmed.