İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 144 Hüküm no: 64 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Hasan’ın tuvalet kapısını komşusu Fâtıma bt. Bilal’in duvarına zarar vermeyecek şekilde yaptırması Husûs-ı âti’z-zikrin mahâllinde istimâ‘ ve fasl u hasmı bâbında fermân-ı âlî vârid olmağın imtisâlen-leh savb-ı şer‘-i mutahhardan keşf nâibimiz Abdullah Efendi b. Ali irsâl olunup ol dahi Hâssa mi‘mârlardan Ali Halîfe b. Abdullah ve Ahmed Halîfe b. Abdülmennan ile mahmiye-i İstanbul’da Topkapısı dâhilinde Bâyezid Ağa mahallesinde vâki‘ lede’l-ahâlî ma‘lûmü’l-hudûd pûşe odaları demekle ma‘rûf odalara varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde mahmiye-i mezbûrede Sarı Nasuh mahallesi sâkinelerinden Fâtıma bt. Bilal nâm hatunun zevci ve tarafından husûs-ı âti’z-zikre vekîl olduğu zâtını ma‘rifet-i şer‘iye ile ârifân Mehmed Bey b. Ahmed ve Veli b. Hasan nâm kimesneler şehâdetleriyle şer‘an sâbit olan işbu bâ‘isü’l-kitâb Şahin Bey b. Abdullah nâm kimesne meclis-i ma‘kūd-ı mezbûrda zikrolunan Bâyezid Ağa mahallesinde sâkine İsmihan bt. Hasan nâm hatun muvâcehesinde bi’l-vekâle üzerine da‘vâ ve takrîr-i kelâm edip müvekkile-i mezbûrenin yedinde mülkü ve hakkı olan işbu pûşe odalarına muttasıl mezbûr İsmihan’ın menzili olmağla kendi menzili havlusunda müvekkile-i mezbûrenin odaları duvarı binâsına muttasıl kenîf kapısı ihdâs etmekle müvekkile-i mezbûrenin duvarına zarar-bîni olmağın nazar olunup men‘ u def‘ olunmak matlûbumdur dedikde mi‘mârân-ı mezbûrân ma‘a’l-Müslimîni’l-[22a] mezkûrîn münâza‘un-fîh olan mahâll-i mezbûra nazar-ı enîk ile nazar eylediklerinde fi’l-hakīka işbu mezbûre İsmihan Hatun’un kenîf kapısı müvekkile-i mezbûrenin duvarı binâsına muttasıl ve zarar-bîni olduğu mukarrer ve muhakkakdır deyü herbiri alâ tarîkı’ş-şehâde haber vermeğin mezbûre İsmihan istintâk olundukda zikrolunan kenîf kapısı müvekkile-i mezbûrenin duvar-ı mezkûrundan hafr olunduğunu ba‘de’l-ikrâr mi‘mârân-ı mezbûrân ma‘a’l-Müslimîni’l-mezbûrîn zikrolunan kenîf kapısı duvar-ı mezbûrdan bir zirâ‘ geri ve ba‘îd hafr olunsa zararı mündefi‘ olur deyü icmâ‘ u ittifâk etmeğin mûcebiyle mezbûre İsmihan’a zikrolunan kenîf kapısın duvar-ı mezbûrdan bir zirâ‘ geri ve ba‘îd hafr etmek üzere tenbîh eylediğini mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Ömer b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min-Recebi’l-ferd li-sene seb‘a ve mie ve elf. Şuhûdü’l-hâl: Ahmed Efendi b. Mustafa el-imâm, Mustafa Çelebi b. Müstakīm, Mehmed b. Ahmed, Hasan Çelebi b. Ali, el-Hâc Yusuf b. Ali. Yevmü’l-hamîs fî 27 min-Recebi’l-ferd li-sene 1107