İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 145 Hüküm no: 65 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyis Ramazan b. Hacı Hasan’ın, Sekbanbaşı Murtaza Ağa’nın ahırında hiç kimsenin müdahalesi olmadan kazaen düşerek vefat ettiği Mahmiye-i İstanbul’da Akşemseddin mahallesinde sâkin sâbıkā sekbânbaşı olan fahrü’l-eşbâh ve’l-a‘yân Murtaza Ağa b. … menzili ahırında sâkin seyis tâifesinden Ramazan b. el-Hâc Hasan nâm kimesne meclis-i şer‘-i şerîf-i enverde takrîr-i kelâm ve bast-ı merâm edip babam mezbûr el-Hâc Hasan müsâferet tarîki üzere ahır-ı mezbûrda benim ile sâkin iken Murtaza olduğu hâlde ahır-ı mezbûrda vâki‘ kerevet üzerinde yatır iken kendi sun‘u ile aşağı düşüp başı ser-bende kazığına rast gelip mecrûh olmağla bi-emrillâhi te‘âlâ fevt olmağın kıbel-i şer‘den üzerine varılıp keşfolunmak matlûbumdur deyü mazmûnu takrîrine muvâfık fermân-ı âlî ibrâz etmeğin imtisâlen-leh kıbel-i şer‘-i enverden keşf nâibimiz olan Abdullah Efendi b. Ali irsâl olunup ol dahi bi’l-fi‘il asesbaşı olan fahrü’l-eşbâh Mehmed Ağa ve subaşı diğer Mehmed Ağa ile mezbûr Murtaza Ağa’nın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyleyip müteveffâ-yı mezbûr el-Hâc Hüseyin’e keşf [ve] nazar eylediklerinde fi’l-hakīka kafası içeri çöküp fevt olduğunu ba‘de’l-keşf ve’l-mu‘âyene vâki‘ hâli mevlânâ-yı mezbûr mahâllinde ketb u tahrîr ve ma‘an ba‘s olunan Mehmed Çelebi b. İbrahim ve Ali b. Şaban ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Recebi’l-ferd li-sene seb‘a ve mie ve elf. Şuhûdü’l-hâl: Ebûbekir Efendi b. Receb İmâm, Çorbacı Mehmed Ağa b. Mustafa, Seyyid Ahmed Ağa b. Osman, İbrahim Ser-muhzırân, Hüseyin b. Mehmed. Yevmü’l-Cum‘a fî 28 min-Recebi’l-ferd li-sene 1107