İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 149 Hüküm no: 68 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun bt. Abdullah’ın ulemaya vakfettiği evin Müderris Mehmed Selim Efendi b. Hüseyin Efendi’nin ikametine verildiği Ashâb-ı hayrâtdan merhûme Kamer Hatun bt. Abdullah’ın süknâsı külle yevm altışar İhlâs-ı şerîf tilâvet etmek üzere ulemâdan bir recül-i sâlihe meşrûta vakfı olup mahmiye-i İstanbul’da Nevbethâne mahallesinde vâki‘ bir tarafdan merhûm Müsâhib Mustafa Paşa veresesi mülkleri ve bir tarafdan hadîka-i hâssa imâmına meşrûta vakf menzil ve bir tarafdan Mehmed Çelebi mülkü ve bir tarafdan tarîk-i âm ile mahdûd dâhiliyede iki bâb fevkānî oda ve bir sofa ve kenîf ve hâriciyede bir bâb fevkānî oda ve bir sofa ve bir kenîfi müştemil menziline tevcîh-i hâkimü’ş-şer‘le mutasarrıf olan Halil b. Durmuş kendi rızâsıyla süknâ-yı menzil-i mahdûd-ı mezbûrdan kasr-ı yed etmekle süknâ-yı menzil-i mahdûd-ı mezbûr mahlûle oldukda <> ulemâdan olmayıp avâm-ı nâsdan olan Ahmed b. Osman nâm kimesne hilâf-ı inhâ bir tarîk ile kendiye tevcîh etdirip tevcîh-i mezbûr hilâf-ı şart-ı vâkıf olmağla süknâ-yı menzil-i mezbûr elân mahlûle ve işbu râfi‘u’l-kitâb ulemâdan olup müderrisîn-i kirâmdan olan Mehmed Selim Efendi b. Hüseyin Efendi süknâya muhtâc ve her vechile mahall ü müstehak olduğunu sikāt-ı makbûlü’l-kelimât ihbâr etmeleriyle süknâ-yı menzil-i mahdûd-ı mezbûr merkūm Ahmed ref‘inden şart-ı vâkıf üzere kıbel-i şer‘-i hatîrden mezbûr Mehmed Selim Efendi’ye tevcîh olunup tasarrufi’çün işbu vesîka bi’t-taleb ketb olundu. Fi’l-yevmi’s-sâmin ve’l-ışrîn min-şehri Recebi’l-ferd li-sene seb‘a ve mie ve elf. Şuhûdü’l-hâl: Mehmed Efendi b. Hüseyin, Mehmed Çelebi b. İbrahim, Mustafa Çelebi [b.] Şaban, İbrahim b. Ahmed.