İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 149 Hüküm no: 69 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
İvaz Beşe b. Derviş b. Abdullah’ı haksız yere hapsedip parasını alan İbrahim Haseki’nin parayı geri ödemesi
Mahrûse-i Galata kazâsı nevâhîsinden Kapıdağı nâhiyesine tâbi‘ Şahinbogos nâm karye ahâlîsinden İvaz Beşe b. Derviş b. Abdullah nâm kimesnenin oğlu ve tarafından husûs-ı âti’z-zikre vekîl olduğu Ali Beşe b. Mehmed ve Osman Beşe b. İsmail şehâdetleriyle şer‘an sâbit olan bâ‘isü hâze’l-kitâb Mehmed Beşe b. ( ) nâm kimesne dîvân-ı hazret-i sadrazamîde ma‘kūd meclis-i şer‘-i şerîf-i âlîde Hadîka-i hâssa’da vâki‘ bostan hasekilerinden İbrahim Haseki bir husûs için kasaba-i Bandırma’ya geldikde senin Eyüb ve Kanca Mehmed ile adâvetin vardır deyü babam müvekkil-i mezbûr İvaz Beşe’yi habs ve cerîme nâmıyla bi-gayr-ı hakkın otuz guruşun ahz u kabz ve kendi mesârifine sarfla istihlâk etmişidim hâlâ suâl olunup meblağ-ı mezbûrun bi-tarîkı’d-damân alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mutâbıka beyyine taleb olundukda ityân-ı beyyineden ızhâr-ı acz ile istihlâf etmeğin fi’l-hakīka müdde‘î-i mezbûr Mehmed Beşe’nin babası müvekkil-i merkūm İvaz Beşe’yi ber-vech-i muharrer habs ve cerîme nâmıyla bi-gayr-ı hakkın otuz guruşunu ahz u kabz etmeyip ol vechile meblağ-ı mezbûrun bi-tarîkı’d-damân müvekkil-i mezbûr İvaz Beşe’ye reddi üzerine lâzım gelmedikde merkūm İbrahim Haseki’ye yemîn teklîf olundukda ol dahi yemînden nükûl etmeğin mûcebiyle meblağ-ı mezbûr otuz guruşu vekîl-i mezbûr Mehmed Beşe’ye redd ü teslîme merkūm İbrahim Haseki’ye tenbîh birle mâ hüve’l-vâki‘ bi’t-taleb ketb olundu.
Fi’l-yevmi’s-sâdis ve’l-ışrîn min-şehri Recebi’l-ferd li-sene seb‘a ve mie ve elf.
Şuhûdü’l-hâl: Umdetü erbâbü’t-tahrîr ve’l-kalem Mustafa Efendi Tezkire-i evvel, zübdetü ashâbi’t-tastîr ve’r-rakām Mehmed Efendi Tezkire-i sânî, fahrü’l-eşbâh ve’l-a‘yân Yusuf Bey Ser-çavuşân, fahrü’l-akrân Odabaşı ( ), el-Hâc Mehmed Çavuş, İbrahim Çavuş, Halil Efendi [b.] Mehmed, el-Hâc Mustafa.
Yevm-i sebt fî 29 min-Recebi’l-ferd li-sene 1107
|