İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 150 Hüküm no: 70 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zağarcıbaşı Mehmed Ağa b. Abdullah’ın, Yençerilerin Yetmişbirinci Cemaati’ne mahsus oda vakfına ait iki arsayı kendi bahçesine ilhak etmesine izin verildiği Husûs-ı âti’l-beyânın mahâllinde ketb u tahrîri iltimâs olunmağın kıbel-i şer‘-i şerîf-i enverden keşf nâibimiz olan Abdullah Efendi b. Ali irsâl olunup ol dahi Hâssa mi‘mârlarından Ali Halîfe b. Abdullah ve Osman Halîfe b. Abdülmennan ile mahmiye-i İstanbul’da Davudpaşa-yı Cedîd kurbünde Kazganî Sadi mahallesinde vâki‘ Dergâh-ı âlî yeniçerileri odalarından yetmiş bir cemâ‘at seksoncularına mahsûs odanın vakfı müsakkafâtından ebniyesi bin yüz beş Muharremi’l-harâm’ında vâki‘ harîkde muhterika olan dokuz bâb odanın iki kıt‘a arsaları üzerine varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf eylediğinde fahrü’l-eşbâh ve’l-ekfâ bi’l-fi‘il zağarcıbaşı olan işbu bâ‘isü’l-vesîka Mehmed Ağa b. Abdullah meclis-i <<şer‘>> ma‘kūd-ı mezbûrda vakf-ı mezbûra bi’l-fi‘il mütevellî olan Yusuf Çelebi b. Abdullah muvâcehesinde üzerine da‘vâ ve takrîr-i kelâm edip iki tarafdan kendi mülküm olan bahçe ve mahzen ve hamam ve bir tarafdan tarîk-i <> âmm ile mahdûde işbu arsa ve yine vakf-ı mezbûrdan olup bir tarafdan Şerife Hatun tasarrufunda olan arsa ve bir tarafdan Medîne-i Münevvere vakfı olan arsa ve bir tarafdan sâlifü’z-zikr tarîk-i hâs ile mahdûde işbu arsalar icâreteyn-i ma‘lûmeteyn ile benim tasarrufumda olup bahçe-i mezkûreme zam ve ilhâka mütevellî-i mezbûr dahi izn vermekle mikdârları ma‘lûm olmak için mesâha ve tahrîr ve hüccet olunmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân evvelen tahdîd olunan arsa-i mezkûreyi bi’l-muvâcehe mesâha eylediklerinde tûlen otuz yedi buçuk ve arzen yirmi bi-hesâbı terbî‘î yedi yüz elli zirâ‘ ve sâniyen tahdîd olunan arsa-i mezkûreyi dahi mesâha eylediklerinde tûlen yirmi iki ve arzen on dört bi-hesâbı mezbûr üç yüz sekiz zirâ‘ min-haysü’l-mecmû‘ bin elli sekiz zirâ‘ arsa olduğu lede’ş-şer‘ zâhir ve nümâyân olmağın vâki‘ hâli mevlânâ-yı mezbûr mahâllinde ketb u tahrîr ve ma‘an ba‘s olunan Mehmed Çelebi b. İbrahim ve Ömer b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min-Recebi’l-ferd li-sene seb‘a ve mie ve elf. Şuhûdü’l-hâl: Hüseyin Efendi b. Osman, Mehmed Odabaşı b. el-Hâc Mehmed, diğer Mehmed Odabaşı b. Ahmed, İbrahim Çelebi b. Hasan, el-Hâc Hüseyin b. Mustafa. Yevmü’l-ahad fî selhi Recebi’l-ferd li-sene 1107