İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 153 Hüküm no: 72 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mahmud b. Ahmed’in, Mahmud Bey b. Şaban’dan aldığı borcu ödeyip rehin bıraktığı evinin kendisine teslim edilmesi Mahmiye-i İstanbul’da Kadırga limanı kurbünde Kâtib Sinan mahallesinde sâkin işbu râfi‘u’l-kitâb el-Hâc Mahmud b. Ahmed nâm kimesne meclis-i şer‘-i şerîf-i enverde zikrolunan Kâtib Sinan vakfına hâlâ mütevellî olan Mehmed Ağa b. Ali Efendi hazır iken mahalle-i mezbûre sükkânından Mahmud Bey b. Şaban b. Oruc nâm kimesne mahzarında üzerine da‘vâ ve takrîr-i kelâm edip târih-i kitâbdan iki buçuk sene mukaddem mezbûr Mahmud Bey dört yüz on guruşunu bana idâne ve teslîm ben dahi istidâne ve kabz edip meblağ-ı mezbûr dört yüz on guruş ve devr-i şer‘î ile üzerime ilzâm olunmadık ribâ-i sırf olan doksan guruş ki cem‘an beş yüz guruş mezbûr Mahmud Bey’e zimmetimde deynim olmak üzere ikrâr eylediğimden sonra zikrolunan Kâtib Sinan vakfından icâre-i mu‘accele ve beher mâh yüz otuz altı akçe ücret-i müeccele ile taht-ı tasarrufumda olup mahalle-i mezbûrede vâki‘ bir tarafdan ba‘zen Sarrâc menzili ve ba‘zen Attar Hasan Çelebi menzili ve üç tarafdan tarîk-i âm ile mahdûd ve dâhiliyede üç bâb fevkānî oda ve bir sofa ve havlu ve hâriciyede bir bâb oda ve tarîk-i âm tarafında vâki‘ üç bâb dükkânı müştemil vakf menzili târih-i mezbûrda zâhiren kat‘î olup hakīkatde tasarrufumda bâkī olmak üzere meblağ-ı mezbûr mukābelesinde mezbûr Mahmud Bey’e ben muvâza‘a ile ferâğ ve tefvîz ol dahi ber-vech-i muharrer tefevvüz ve kabûl ve muvâza‘aten babası mezbûr Şaban üzerine ol târihde mütevellî bulunan Zekai Mustafa Efendi’ye kayd ve tahrîr etdirmişidi. Lâkin mezbûr Mahmud Bey’den istidâne eylediğim dört yüz on guruşdan mâ‘adâ doksan guruş ber-vech-i meşrûh ribâ ve mahs olup ve ferâğ-ı mezkûr ferâğ-ı kat‘î olmayıp muvâza‘a olmağın hâlâ suâl olunup ber-vech-i muharrer kendiden istidâne eylediğim meblağ-ı mezbûr dört yüz on guruşu yedimden ahz u <> ve menzil-i mezbûrdan <> kasr-ı yed ve bana teslîme tenbîh olunmak matlûbumdur dedikde gıbbe’s-suâl mezbûr Mahmud Bey cevâbında fi’l-hakīka müdde‘î-i mezbûr el-Hâc Mahmud menzil-i mahdûd-ı mezbûru târih-i mezbûrda zâhiren kat‘î olup hakīkatde kendi tasarrufunda bâkī olmak üzere muvâza‘a ile kendiye ferâğ ve tefvîz kendi dahi tefevvüz ve babası merkūm Şaban üzerine muvâza‘a kayd ve tahrîr etdirdiğini tav‘an ikrâr u i‘tirâf edip lâkin meblağ-ı mezbûr beş yüz guruşun dört yüz on guruşdan ziyâdesi olan doksan guruş ber-vech-i muharrer ribâ-i sırf olduğunu inkâr edicek müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka meblağ-ı mezbûr beş yüz guruşun dört yüz on guruşdan ziyâdesi olan doksan guruş ribâ-i sırf olmayıp ol vechile meblağ-ı mezbûr doksan guruş mütâlebesinden müdde‘î-i mezkûr el-Hâc Mahmud’un zimmeti berî olmadığına Mahmud Bey’e bi’d-defa‘ât yemîn teklîf olundukda ol dahi yemînden nükûl etmeğin mûcebiyle meblağ-ı mezbûr dört yüz on guruşu müdde‘î-i mezbûrdan kabz ve menzil-i mahdûd-ı mezbûrdan kasr-ı yed ve müdde‘î-i mezbûr el-Hâc Mahmud’a edâ ve teslîme tenbîh ve ziyâde-i mezkûre doksan guruş mütâlebesi’çün bî-vech ta‘arruzdan mezbûr Mahmud Bey men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-şehri Recebi’l-ferd li-sene seb‘a ve mie ve elf. Şuhûdü’l-hâl: Nurullah Efendi İmâm-ı Koca Mustafa Paşa, Ömer Çavuş b. Süleyman, el-Hâc Hasan b. Mehmed, İbrahim Çelebi b. Ahmed, Mustafa b. Şaban, el-Hâc Mehmed b. İbrahim ve gayruhum mine’l-huzzâr.