İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 154 Hüküm no: 73 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın alacaklı olduğu Ahmed Ağa b. Mehmed ile sulh olduğu Medîne-i Hazret-i Ebâ Eyyûbe’l-Ensârî’de Çömlekçiler mahallesinde sâkine Ayşe bt. Hasan nâm hatun meclis-i şer‘-i şerîf-i enverde Ahmed Ağa b. Mehmed mahzarında ikrâr-ı tâm ve takrîr-i kelâm edip mezbûr Ahmed Ağa zimmetinde cihet-i deyn-i şer‘îden üç yüz guruş hakkım olup bundan akdem meblağ-ı mezbûru mezbûr Ahmed Ağa’dan taleb ve da‘vâ etdiğimde ol dahi inkâr etmekle muslihûn tavassut edip müdde‘âm olan meblağ-ı mezbûrdan Ahmed Ağa benimle altmış guruşa sulh olup ben dahi sulh-ı mezbûru kabûl ve ziyâde da‘vâsından mezbûrun zimmetini ibrâ-i âmm ile ibrâ etdiğimden sonra bundan akdem bedel-i sulh olan meblağ-ı mezbûr altmış guruş zimmetinde kalmağın on altı guruşunu yedinden ahz u kabz edip bâkī kırk dört guruşum kalmağın taleb etdiğimde ba‘de’n-nizâ‘ meblağ-ı mezbûrun on beş guruşunu dahi mezbûr Ahmed Ağa bana def‘ u teslîm ben dahi yedinden ahz u kabz edip ba‘de’l-yevm ziyâde müdde‘âm olan yirmi dokuz guruşa ve târih-i kitâba gelince sâir husûsa müte‘allika âmme-i da‘vâdan mezbûr Ahmed Ağa’nın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Recebi’l-ferd li-sene seb‘a ve mie ve elf. Şuhûdü’l-hâl: Salih Çelebi b. Mehmed, Ali Çelebi b. Memi, Hüseyin Çelebi b. Mustafa, Ahmed Çelebi b. Ahmed, Mustafa Çelebi b. Şaban. Yevmü’l-isneyn fî gurre-i Şa‘bâni’l-mu‘azzam li-sene 1107