İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 154 Hüküm no: 74 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice ve Ayşe’nin anneleri Rabia bt. Sinan’dan intikal eden evdeki hisselerini paylaştıkları Husûs-ı âti’z-zikrin mahâllinde ketb u tahrîr[i] iltimâs olunmağın savb-ı şer‘-i enverden keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Ali Halîfe b. Mustafa ile mahmiye-i İstanbul’da Yenibahçe kurbünde Arpaemini mahallesinde vâki‘ iki tarafdan mezbûr Arpaemini vakfı olan odalar ve bir tarafdan ba‘zen Mehmed Efendi mülkü ve ba‘zen Hatice bt. Mehmed nâm hatun mülkü ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘ eylediğinde menzil-i mahdûd-ı mezbûrun nısf-ı şâyi‘i yedinde mülkü ve hakkı iken bundan akdem vefât eden Râbia bt. Sinan nâm hatunun verâseti sadriye kebîre kızları mezbûre Hatice ile Ayşe nâm hatunlara münhasıra olduğu şer‘an zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan mezbûre <> Ayşe meclis-i ma‘kūd-ı mezbûrda li-ebeveyn kız karındaşı kezâlik zâtı ta‘rîf-i şer‘î ile mu‘arrefe olan mezbûre Hatice muvâcehesinde takrîr-i kelâm ve bast-ı merâm edip işbu menzil-i mezbûrun nısf-ı şâyi‘i kız karındaşım mezbûre Hatice’nin ve nısf-ı şâyi‘-i âharı vâlidemiz müteveffât-ı mezbûrenin mülkü olup ba‘de vefâtihâ mezbûre Hatice ile bana isâbet etmekle mecmû‘-ı menzil-i mahdûdun rub‘u bi’l-irs benim ve selâse-i erbâ‘ı ırsen ve şirâen mezbûre Hatice’nin olup kābil-i kısmet olmağın hâlâ ber-vech-i mübeyyen beynimizde taksîm olunmak matlûbumdur dedikde gıbbe’t-tasdîkı’ş-şer‘î mi‘mâr-ı mezbûr menzil-i mezbûru bi’l-muvâcehe mesâha eyledikde tûlen ve arzen bi-hesâbı terbî‘î üç yüz dokuz zirâ‘ binâ ma‘a’l-arsa ve sekiz yüz yirmi beş zirâ‘ arsa-i hâliyeden mezbûre Ayşe’nin rub‘ hissesine yetmiş yedi zirâ‘ binâ ma‘a’l-arsa ve iki yüz sekiz zirâ‘ arsa-i hâliye ve mezbûre Hatice’nin selâse-i erbâ‘ı hissesine iki yüz otuz iki zirâ‘ binâ ma‘a’l-arsa ve altı yüz on sekiz zirâ‘ arsa-i hâliye isâbet eylediği zâhir ve nümâyân olmağın zikrolunan vakf odalar tarafında vâki‘ bi-hesâbı mezbûr kırk zirâ‘ bir bâb tahtânî oda ve yetmiş dört zirâ‘ dehliz ve otuz iki zirâ‘ ahır ki min-haysü’l-mecmû‘ yüz on sekiz zirâ‘ binâ ma‘a’l-arsa ve doksan iki zirâ‘ arsa-i hâliye sokak kapısının sol tarafında bir dayak ve bendegî direk hizâsına vaz‘ olunan alâmete değin mezbûre Ayşe’nin rub‘ hissesine ta‘yîn ve tahsîs olunup bâkī fevkānî bir bâb oda ve bir sofa ve selâse-i erba‘ ahır ki min-haysü’l-mecmû‘ yüz doksan bir zirâ‘ binâ ma‘a’l-arsa ve yedi yüz yirmi üç zirâ‘ arsa-i hâliye mezbûre Hatice’nin selâse-i erba‘ hissesine ta‘yîn ve tahsîs olundukda herbiri bi’t-terâzi kabz u kabûl etmekle beynlerine alâmât-ı fâsıla vaz‘ olunup mezbûre Ayşe’ye hissesinden ziyâde geçen kırk bir zirâ‘ binâ ma‘a’l-arsa ve selâse-i erba‘ bi’r-i mâ mezbûre Hatice’ye hissesinden ziyâde geçen yüz beş zirâ‘ arsa-i hâliyeye takās olundukda herbiri mukāssa ve kabûl ve âhara ta‘yîn ve tahsîs olunan ebniye ve arsaya müte‘allika âmme-i mutâlebâtdan herbiri âharın zimmetini ibrâ-i âmm-ı râfi‘u’l-hısâm ile ibrâ ve ıskāt etmeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ahmed Çelebi b. İbrahim ve Ömer b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene seb’a ve mie ve elf. Şuhûdü’l-hâl: [25a] Mustafa Efendi b. Hasan el-imâm, Ahmed Efendi b. Osman el-imâm, İbrahim Çelebi b. İbrahim, Mustafa Çelebi b. Süleyman, el-Hâc İsmail b. Abdullah, Ali Çelebi b. Ahmed, İbrahim Çelebi b. Mustafa, Mustafa b. Muharrem.