İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 159 Hüküm no: 76 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu esnafının kethudâsı Hacı Mehmed’in azledilerek yerine Mehmed Çavuş b. Mehmed’in tayini Mahmiye-i İstanbul’da uncu tâifesinin ihtiyârlarından el-Hâc Ahmed b. el-Hâc Hicâzî ve el-Hâc Mehmed b. el-Hâc Mehmed ve Mehmed Ağa b. Abdullah ve Ahmed b. Mustafa ve el-Hâc Osman b. Abdullah ve es-Seyyid Kasım b. İbrahim ve Ahmed b. el-Hâc Ömer ve Ahmed b. Abdullah ve Hüseyin b. Süleyman ve es-Seyyid Ali b. es-Seyyid Yusuf ve Ahmed b. Yusuf ve el-Hâc Mehmed b. Hüseyin ve Mehmed b. Ebûbekir ve el-Hâc Mustafa b. Ahmed nâm kimesneler ile İstati v. Viço ve Petro v. Manol ve Fetilu? v. İstati ve Yani v. Viredos ve sâirleri meclis-i şer‘-i şerîf-i enverde herbiri takrîr-i kelâm edip bundan akdem kendi ihtiyârımız ve cânib-i şer‘den hüccet-i şer‘iye ile kethudâmız olan el-Hâc Mehmed bir vechile umûrumuzu ikāmete ve taraf-ı Saltanat-ı aliyye’den fermân olunan ordu çadırını ihrâca kādir olmamağla umûrumuz muhtell ü müşevveş olmağın mezbûr el-Hâc Mehmed azl ve yerine umûr-ı kethudâlığı ikāmete kādir bir kimesne kethudâ nasb u ta‘yîn olunmak lâzım ve mühim olmağla tâife-i mezbûreden olup her vechile kethudâlık umûrunu ikāmete kādir ve hidmet-i ibâdullâha mücidd ü sâ‘î olan işbu hazır bi’l-meclis Mehmed Çavuş b. Mehmed’i üzerimize kethudâ ihtiyâr eyledik mezbûr el-Hâc Mehmed azl ve yerine mezkûr Mehmed Çavuş savb-ı şer‘den kethudâ nasb u ta‘yîn olunmak matlûbumuzdur deyü husûs-ı mezbûr için fermân dahi ibrâz etmekle kazıyye bâlâda tafsîl olunan vech üzere olduğunu âhar tâifeden sikāt-ı makbûletü’l-kelimât dahi ihbâr etmeleriyle mezbûr el-Hâc Mehmed azl ve tâife-i mezbûre üzerlerine muhtârları olan merkūm Mehmed Çavuş kıbel-i şer‘den kethudâ nasb u ta‘yîn olunup işbu vesîka bi’t-taleb ketb olundu. Fi’l-yevmi’s-sâmin [ve’]l-aşer min-Recebi’l-ferd li-sene seb‘a ve mie ve elf. Şuhûdü’l-hâl: Mustafa Çelebi b. ( )Yiğitbaşı, el-Hâc Mustafa b. Tevekkül, İbrahim Çelebi b. Ahmed, Ali Çelebi b. Bali, Mustafa b. Osman, Receb b. Osman, Ömer b. Yusuf, Mahmud b. Mehmed, Ahmed b. Abdullah. Yevmü’s-sebt fî 2 Şaban li-sene 1107