İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 160 Hüküm no: 77 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un vakfettiği harap durumdaki evi kiracısı Mustafa Çavuş b. Veli’nin yaptırmasına izin verildiği Husûs-ı âti’z-zikrin mahâllinde ketb u tahrîr[i] bâbında fermân-ı âlî vârid olmağın imtisâlen-leh savb-ı şer‘den keşf nâibimiz olan Abdullah Efendi b. Ali irsâl olunup ol dahi Hâssa mi‘mârlardan Ali Halîfe b. Abdullah ve Ahmed Halîfe b. Abdülmennan [ile] mahmiye-i İstanbul’da Seydi Ömer mahallesinde vâki‘ gallesi ve tevliyeti yine Seydi Ömer Mescid-i şerîfi’nde imâm olanlara meşrûta merhûme Emine nâm hatun vakfı olup bir tarafdan Mustafa Çavuş b. Veli tasarrufunda Medîne-i Münevvere vakfı olan menzil ve iki tarafdan Hüsameddin Efendi vakfı ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde işbu bâ‘isü’l-kitâb merkūm Mustafa Çavuş meclis-i ma‘kūd-ı mezbûrda menzil-i mezbûrun ber-vech-i mübeyyen mütevellîsi olan mescid-i mezbûr imâmı olan Mehmed Efendi b. Mehmed mahzarında takrîr-i kelâm edip icâreteyn-i ma‘lûmeteyn ile taht-ı tasarrufumda olan işbu menzil-i mahdûd-ı mezbûr mürûr-ı eyyâm ve kürûr-ı a‘vâm ile müşrif-i harâb olup kābil-i süknâ olmamağın cânib-i vakf-ı mezbûrda dahi binâya müsâ‘ade olmayıp hâlî ve mu‘attal kalmağın kendi mâlım ile ihdâs edeceğim ebniye mülküm olmak üzere mütevellî-i mezbûr bana izn vermekle hükm-i enkāzda olan işbu köhne ebniyesi keşf ve mesâha ve takvîm olunup hüccet olunmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân menzil-i mezbûru bi’l-muvâcehe mesâha eylediklerinde tûlen ve arzen bi-hesâbı terbî‘î yüz beş zirâ‘ sakf zirâ‘ı on beşer akçeden bin beş yüz yetmiş beş akçe ve bi-hesâbı mezbûr altmış zirâ‘ taş duvar zirâ‘ı otuz ikişer akçeden bin dokuz yüz yirmi akçe ve bi-hesâbı mezbûr otuz zirâ‘ tahta perde zirâ‘ı onar akçeden üç yüz akçe ki <> ebniye-i mezkûrenin el-yevm kıymet-i şer‘iyesi min-haysü’l-mecmû‘ ancak üç bin yedi yüz doksan beş akçedir ziyâde değildir deyü mi‘mârân-ı mezbûrân Müslimûn-ı mezbûrûn ile icmâ‘ u ittifâk ve herbiri haber vermeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve İbrahim b. Mustafa ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-ferd li-sene seb‘a ve mie ve elf. Şuhûdü’l-hâl: Mustafa Efendi b. Hasan el-imâm, Ahmed Efendi b. Osman el-imâm, Receb b. el-Hâc İbrahim, el-Hâc İsmail b. Abdullah, Mustafa b. Muharrem, Mustafa b. Süleyman, Ali b. Mehmed, Derviş b. el-Hâc Hasan Abdurrahman b. Ahmed.