İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 161 Hüküm no: 78 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hac Timur mahallesi mescidi imamlarına vakfedilen harap evi yaptıran İmam Mustafa Efendi b. Hasan’ın inşaat masraflarının tespit edildiği Husûs-ı âti’z-zikrin mahâllinde ketb u tahrîri bâbında fermân-ı âlî vârid olmağın imtisâlen-leh savb-ı şer‘-i enverden keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Ali Halîfe b. Mustafa ile mahmiye-i İstanbul’da el-Hâc Timur mahallesinde vâki‘ zikri câ’î menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz kimesneler mahzarlarında akd-i meclis-i şer‘-i şerîf eylediğinde mahalle-i mezbûre mescid-i şerîfi imâmı olan işbu râfi‘u’l-kitâb Mustafa Efendi b. Hasan meclis-i ma‘kūd-ı mezbûrda süknâsı mescid-i mezbûrda imâm olanlara meşrûta olup bir tarafdan Tâyîzâde Ahmed Bey menzili ve bir tarafdan Hasan Paşa odaları ve bir tarafdan süknâsı mescid-i mezbûrda müezzin olanlara meşrûta olan menzil ve bir tarafdan ba‘zen yine menzil-i mezbûr ve ba‘zen tarîk-i hâs ile mahdûd menzilin hasbî mütevellîsi olan Abdurrahman Çelebi b. Ahmed mahzarında takrîr-i kelâm ve bast-ı merâm edip işbu menzil-i mahdûd-ı mezbûr mürûr-ı eyyâm ve kürûr-ı a‘vâm ile müşrif-i harâb olmağla kābil-i süknâ olmayıp eşedd-i ihtiyâc ile ta‘mîre ve termîme muhtâc olup ve ta‘mîr ü termîmi için dahi mevkūf bir nesne olmamağın masrûfum olan meblağı lede’z-zafer vakfa rücû‘ etmek üzere kendi mâlım ile ta‘mîr ü termîme mütevellî-i mezbûr bana izn vermeğin ben dahi vech-i muharrer üzere kendi mâlım ile işbu sagīr odayı müceddeden binâ ve kebîr odayı dahi ta‘mîr ü termîm etmekle hâlâ kıbel-i şer‘-i mutahhardan keşfolunup masrûfum tahmîn-i sahîh ile tahmîn ve hüccet olunmak matlûbumdur dedikde gıbbe’t-tasdîkı’ş-şer‘î mi‘mâr-ı mezbûr menzil-i mezbûrun ebniye-i cedîdesin ve meremmât olandan mevâzi‘ini bi’l-muvâcehe mesâha eyledikde arzen yirmi iki ve kadden dört bi-hesâbı terbî‘î seksen sekiz zirâ‘ iki tarafı beyâz sıvalı dolma duvar zirâ‘ı otuz akçeden iki bin altı yüz kırk akçe ve kadden bir buçuk ve arzen bir zirâ‘ dört aded billûr cam herbiri seksener akçeden üç yüz yirmi akçe ve çıkrıkçı işi kanadları çam tahtası üç aded cedîd pencere herbiri yüz yirmişer akçeden üç yüz altmış akçe ve bir cedîd sandık ve iki yüz yirmi akçe ve bir cedîd misârında [musândıra] sekiz yüz akçe ve bi-hesâbı mezbûr kırk sekiz zirâ‘ yassı şişeli cam tahtası tavan zirâ‘ı yirmi ikişer akçeden bin elli akçe ve bi-hesâbı mezbûr doksan zirâ‘ tahta ve döşeme zirâ‘ı yirmişer akçeden bin sekiz yüz akçe ve bir ocak korluğu ma‘a dolma kırk akçe ve ağa tahtası raf seksen akçe ve diğer odada yük yeri ma‘a magsel altı yüz akçe ve dehlizde vâki‘ cedîd direk ve taban üç yüz akçe ve kuyu ta‘mîri ve tathîri bin beş yüz akçe ve meremmât-ı sakf üç yüz akçe ve bi-hesâbı mezbûr on iki zirâ‘ taş duvar zirâ‘ı kırkar akçeden dört yüz seksen akçe ve bir cedîd orta kapı ma‘a çârçûbe üç yüz altmış akçe ve bir cedîd sokak kapısı dört yüz akçe ki min-haysü’l-mecmû‘ on bir bin yüz elli altı akçe ile ancak olur noksan ile olmak mümkün değildir deyü mi‘mâr-ı mezbûr ile Müslimûn-ı mezbûrûn icmâ‘ u ittifâk etmeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Ömer b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min-Recebi’l-ferd li-sene seb‘a ve mie ve elf. Şuhûdü’l-hâl: Mehmed Efendi b. Ahmed el-imâm-ı bi-mahalle-i Seydi Ömer, Mehmed Çelebi b. Halil, Mehmed Bey b. Yusuf, Mustafa Çelebi b. Ali, Ahmed Bey b. Ali.