İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 162 Hüküm no: 79 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa’dan intikal eden evi varislerinin anlaşarak paylaştıkları Husûs-ı âti’z-zikrin mahâllinde ketb u tahrîri iltimâs olunmağın savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Mustafa Halîfe b. Abdullah ve Ali Halîfe b. Abdülmennan ile mahmiye-i İstanbul’da Ayasofya-i Kebîr Câmi‘-i şerîfi kurbünde Üskübî mahallesinde vâki‘ bir tarafdan mahalle-i mezbûre müezzinlerine mevkūf menzil ve ba‘zen tarîk-i âm ve bir tarafdan Ahmed Paşa sarayı ve bir tarafdan İsmail Çelebi menzili ve bir tarafdan turşucu dükkânı ile mahdûd dâhilen ve hâricen dört bâb fevkānî oda iki sofa ve dehliz ve üç kenîf ve ahır ve bi’r-i mâyı müştemil menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde menzil-i mahdûd-ı mezbûr yedinde mülkü ve hakkı iken bundan akdem fevt olan Fâtıma bt. Mustafa nâm hatunun verâseti zevc-i metrûkü Süleyman Efendi b. Mehmed nâm kimesne ile vâlidesi Sâliha bt. Abdullah nâm hatuna münhasıra olduğu şer‘an zâhir ve mütehakkık oldukdan sonra zâtı ma‘rifet-i şer‘iye ile ârifân el-Hâc Mustafa b. Yusuf ve Mehmed Çelebi b. Mustafa nâm kimesneler şehâdetleriyle mu‘arrefe olan mezbûre Sâliha meclis-i ma‘kūd-ı mezbûrda dâmadı merkūm Süleyman Efendi mahzarında takrîr-i kelâm ve bast-ı merâm edip sadriye kızım müteveffâ-yı mezbûrenin terekesinden olan işbu menzil-i mahdûd-ı mezbûrun nısf-ı şâyi‘i zevc-i metrûkü mezbûr Süleyman Efendi [27a] ve nısf-ı şâyi‘-i âharı dahi karzan ve redden bana isâbet eyleyip kābil-i kısmet olmağın beynimizde taksîm ve herbirimizin hissesi ifrâz olunmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân menzil-i mezbûru bi’l-muvâcehe mesâha eylediklerinde tûlen ve arzen bi-hesâbı terbî‘î üç yüz otuz dört zirâ‘ binâ ve ma‘a’l-arsa ve on zirâ‘ arsa-i hâliyeden mezbûrânın herbirinin nısf hisselerine yüz altmış yedişer binâ ma‘a’l-arsa ve beşer zirâ‘ arsa-i hâliye isâbet eylediği zâhir ve nümâyân olmağın dâhiliyede vâki‘ fevkānî iki bâb oda ve bir sofa ve dehliz ve iki kenîf ve orta kapıyı müştemil yüz elli dört zirâ‘ binâ ma’a’l-arsa ve orta kapıdan sokak kapısının eşiğinde vaz‘ olunan alâmete değin tûlen on ve arzen taşra cânibi iki buçuk ebniyesiyle sokak kapısının bir kanadı mezbûr Süleyman Efendi’nin nısf hissesine ta‘yîn ve tahsîs olunup ve hâriciyede vâki‘ iki bâb fevkānî oda ve yanı sofa ve dehliz ve bir kenîf ve ahır ve bi’r-i mâ ve bir mermer tekne ve bir musluk ve sokak kapısının bir kanadı ki min-haysü’l-mecmû‘ yüz elli zirâ‘ binâ ma’a’l-arsa mezbûre Sâliha’nın nısf hissesine ta‘yîn ve tahsîs ve beynlerine alâmât-ı fâsıla vaz‘ olunup ve mezbûr Süleyman Efendi’ye ziyâde geçen beher zirâ‘ yüz seksener akçeye takvîm olunan yedi zirâ‘ ebniye ma‘a’l-arsa kıymeti olan üç bin akçenin iki bin akçesin mezbûre Sâliha’ya geçen mecmû‘u bi-safkatin dört bin akçeye takvîm olunan yedi zirâ‘ bi’r-i mâ ve bir musluk ve bir mermer tekne kıymetlerinden mezbûr Süleyman Efendi kendiye isâbet eden iki bin akçeye takās eyledikde mezbûre Sâliha dahi mukāssa ve kabûl edip bâkī bin akçeyi dahi mezbûr Süleyman Efendi merkūme Sâliha’ya teslîm etmek üzere herbiri hisse-i mu‘ayyene-i müfrezelerin bi’t-terâzi kabz ve kabûl ve âharın hissesine ta‘yîn olunan ebniye ve arsadan ehadühümâ âharın zimmetini ibrâ-i âmm-ı râfi‘u’l-hısâm ile ibrâ ve ıskāt etmeğin vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min-Recebi’l-ferd li-sene 1107 Şuhûdü’l-hâl: el-Hâc Mustafa b. Yusuf, el-Hâc Mehmed b. Mustafa, Ali Efendi b. Mehmed, İbrahim Çelebi b. Osman, Süleyman Beşe b. Mehmed, Receb Çelebi b. Ömer.