İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 167 Hüküm no: 82 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Hüseyin’in Ali Odabaşı b. Hasan’a olan borcunu ödemesi Mahmiye-i İstanbul’da Kiçi Hatun mahallesinde sâkin işbu râfi‘ Ali Odabaşı b. Hasan nâm kimesne meclis-i şer‘-i şerîfde Hasan Beşe b. Hüseyin nâm kimesne mahzarında üzerine da‘vâ ve takrîr-i kelâm edip mezbûr Hasan Beşe bundan akdem yedimde olan temessük nâtık olduğu üzere yüz guruşumu ikrâz ve kabz eylediğinden sonra meblağ-ı merkūmun kırk dört guruşunu mukaddemâ yedinden ahz u kabz edip bâkī elli altı guruşunu edâ etmeden diyâr-ı âhara gidip hâlâ bunda gelmekle meblağ-ı bâkī-i mezbûru taleb etdiğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve’l-inkâr veisrü’t-talebi’l-beyyine <> udûl-i Müslimînden olup yirmi ikinci cemâ‘at yoldaşlarından Halil Odabaşı b. Nasuh ve mahalle-i mezbûre sükkânından İsmail b. el-Hâc Siyavuş nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka müdde‘î-i mezbûr bundan akdem mezbûr Hasan Beşe’ye mârrü’z-zikr temessük nâtık olduğu üzere yüz guruşu bizim huzûrumuzda ikrâz ve teslîm ol dahi iktirâz ve kabz eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle meblağ-ı bâkī-i mezbûr elli altı guruşu müdde‘î-i mezbûra edâ ve teslîme mezbûr Hasan Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Recebi’l-ferd li-sene seb‘a ve mie ve elf. Şuhûdü’l-hâl: Ahmed Beşe el-Mübâşir, el-Hâc Hüseyin b. Mustafa, Ahmed Beşe b. Ali, Ahmed b. Ahmed, Na‘lcı Osman. Yevmü’l-Cum‘a fî 5 min-Şa‘bâni’l-mu‘azzam li-sene 1107 Yevmü’s-sebt fî 6 min-Şa‘bâni’l-mu‘azzam li-sene 1107