İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 167 Hüküm no: 83 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bozcaadalı Mehmed Reis b. Hasan’ın gemisine yüklediği buğdayı Bozcaada ahalisine satmasına izin verildiği Sefîne reislerinden Bozcaadalı Mehmed Reis b. Hasan nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip Bahr-i Sefîd’de vâki‘ Rodos ve İstanköy ve Sakız ve Kuşadası ve Midilli ve Bozcaada ve Limni’ye mahmiye-i İstanbul’dan nakl ve ibâdullâha bey‘i fermân olunan buğdaydan çenber ta‘bîr olunur sefînemde mevcûd iki bin altı yüz keyl buğdayı harbî kefereye ve sâir mahallerde bey‘ ve ihrâc etmeyip cezâir-i mezbûreden Bozcaada cezîresine nakl ve İstanbul’da râyic olduğu üzere her keyli kırk beşer akçe ve navl için ecr-i misli idiği sikāt-ı makbûletü’l-kelimât ihbârlarıyla takdîr olunan yedişer akçe ve cihet-i ma‘îşetim için dahi yedişer akçe ki cem‘an elli dokuzar akçeye mârrü’z-zikr Bozcaada cezîresinde ibâdullâha bey‘ ve hîn-i avdetde ol mikdâr buğdayı âhar mahalle götürmeyip cezîre-i mezkûrede tamamen ibâdullâha bey‘ eylediğimi hâkimü’ş-şer‘den hüccet etdirdikden sonra mahmiye-i mezbûreye getirip hâkimü’ş-şer‘a îsâl edeceğime kefillerim alınıp ber-vech-i muharrer bana izn verilmek matlûbumdur dedikde mahmiye-i mezbûrede Keçeci Pîrî mahallesinde el-Hâc Ahmed b. Mustafa ve Debbağyunus mahallesinde el-Hâc Halil b. İbrahim ve Müfti Ali Çelebi mahallesinde el-Hâc Mustafa b. Süleyman nâm kimesneler mezbûr Mehmed Reis zikrolunan iki bin altı yüz keyl buğdayı harbî kefereye ve sâir mahallerde bey‘ ve ihrâc etmeyip mârrü’z-zikr Bozcaada cezîresinde ibâdullâha bâlâda tafsîl olunan vech üzere cem‘an her keylini elli dokuzar akçeye tamamen bey‘ ve hüccet getirmeğe biz kefîl olduk dediklerinde mezkûr Mehmed Reis[‘e] zikrolunan buğdayı cezîre-i mezbûreye nakle ba‘de’l-izn mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mehmed Efendi b. Hüseyin, Receb Efendi Nâib-i Kapan, Süleyman Ağa Kethudâ-i Kapan, Çorbacı Süleyman Ağa, Ali b. Bali, İbrahim Çelebi b. Ahmed, Mustafa b. Mehmed, Mehmed Çelebi [b.] İbrahim, Mustafa Efendi b. Mehmed.