İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 168 Hüküm no: 84 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Reis b. Hacı Hasan’ın gemisine yüklediği buğdayı Sakız adası ahalisine satmasına izin verildiği Sefîne reislerinden olup mahrûse-i Galata’ya tâbi‘ kasaba-i Fındıklı’da Molla Çelebi mahallesinde sâkin es-Seyyid el-Hâc Abdullah b. el-Hâc Hasan nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip Bahr-i Sefîd’de vâki‘ Rodos ve İstanköy ve Sakız ve Kuşadası ve Midilli ve Bozcaada ve Limni’ye mahmiye-i İstanbul’dan nakl ve ibâdullâha bey‘i fermân olunan buğdaydan şayka ta‘bîr olunur sefînemde mevcûd altı bin keyl buğdayı harbî kefereye ve sâir mahallerde bey‘ ve ihrâc etmeyip cezâir-i mezbûreden Sakız cezîresine nakl ve İstanbul’da râyic olduğu üzere her keyli kırk beşer akçe ve navl için ecr-i misli idiği sikāt-ı makbûletü’l-kelimât ihbârlarıyla takdîr olunan onar akçe ve cihet-i ma‘îşetim için dahi yedişer akçe ki cem‘an altmış ikişer akçeye mârrü’z-zikr Sakız cezîresinde ibâdullâha bey‘ ba‘dehû hîn-i avdetde ol mikdâr buğdayı âhar mahalle götürmeyip cezîre-i mezkûrede tamamen ibâdullâha bey‘ eylediğimi hâkimü’ş-şer‘den hüccet etdirdikden sonra mahmiye-i mezbûreye getirip hâkimü’ş-şer‘a îsâl edeceğime kefillerim alınıp ber-vech-i meşrûh bana izn verilmek matlûbumdur dedikde mahmiye-i mezbûrede Azebler mahallesi sükkânından es-Seyyid el-Hâc Hüseyin b. el-Hâc Veli ve el-Hâc Ömer b. Pîrî ve el-Hâc Osman b. Mehmed nâm kimesneler mezkûr es-Seyyid el-Hâc Abdullah zikrolunan altı bin keyl buğdayı harbî kefereye ve sâir mahallerde bey‘ ve ihrâc etmeyip mârrü’z-zikr Sakız cezîresinde ibâdullâha bâlâda tafsîl olunan vech üzere cem‘an altmış ikişer akçeye tamamen bey‘ ve hüccet getirmeğe biz kefîl olduk dediklerinde mezbûr es-Seyyid el-Hâc Abdullah’a zikrolunan buğdayı cezîre-i mezbûreye nakle ba‘de’l-izn mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Eş-şâhidûnü’s-sâbıkūn.