.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 106
Hüküm no: 103
Orijinal metin no: [16a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefât eden Mehmed b. Numan’ın vârislerinin çiftlik ve tarlalarını el-Hâc Halil Ağa’ya sattıkları

Vilâyet-i Rumeli’nde Ohri kazâsına tâbi‘ Durine nâm karye ahâlîsinden olup bundan [akdem] fevt olan Mehmed b. Numan’ın bi’l-inhisâr vârisleri olan Vâlide ve Sâliha bt. Mehmed nâm hatunlar tarafından husûs-ı âti’z-zikre vekîl olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mehmed Ağa b. Mustafa Çavuş ve Mustafa Bey b. Osman şehâdetleri ile şer‘an sâbite olan zevci es-Seyyid Ahmed b. es-Seyyid Mustafa velâyeten kız karındaşı Fâtıma nâm hatun tarafından dahi mezbûrenin zâtını ma‘rifet-i şer‘iyye ile ârifân olan Hüseyin Bey b. Sefer Ağa ve Mehmed Çelebi b. Mustafa Çavuş şehâdetleri ile kezâlik hasm-ı câhid mahzarında şer‘an vekâleti sâbite olan zevci İsa b. Koçu nâm kimesneler mahfil-i kazâda aliyyetü’z-zât safiyyetü’s-sıfât tâcü’l-aliyy ve’s-sa‘âdât Vâlide Sultan -dâmet ismetuhâ- hazretlerinin kethüdâlığı hizmeti ile şeref-yâb olan bu kitâb-ı sıhhat-nisâbın sâhibi iftihârü’l-emâcid ve’l-ekârim câmi‘ü’l-mehâmid ve’l-mekârim el-Hâc Halil Ağa b. Ali Bey taraflarından ikrâr-ı âti’l-beyânı tasdîka vekâleti Ekmekçizâde Ahmed Ağa ve Abdurrahman Efendi b. Mehmed Efendi şehâdetleri ile sâbite olan İbrahim Çelebi b. Mehmed mahzarında ikrâr-ı tâm ve takrîr-i kelâm edip müteveffâ-i mezbûr Mehmed’den müvekkiletân-ı mezbûretâna intikāl edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd olup büyût-ı müte‘addideyi ve ahırı ve anbarı müştemil olan çiftlik tâ‘bir olunur menzil mûrisleri, bir kıt‘a ma‘lûmü’l-hudûd bağı müşârun-ileyh el-Hâc Halil Ağa’ya semen-i misilleri olan yirmi dokuz bin beş yüz nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin vekâletimiz hasebiyle bey‘ edip ol dahi iştirâ ve kabûl edip ve yine kadîmden çiftlik-i mezbûra tâbi‘ olmağla tahdîd ve tavsîfden müstağnî olan bir pullukluk tarlalar ve çayırların dahi hakk-ı tasarruflarını sâhib-i arz ma‘rifetiyle mûmâ-ileyh el-Hâc Halil Ağa’ya on iki bin mezbûru’n-na‘t akçe bedel mukābelesinde yine vekâletimiz hasebiyle tefvîz edip ol dahi tefevvüz ve kabûl eyledikden sonra semen-i mezbûr ile bedel-i merkūmdan müctemi‘ olan kırk bir bin beş yüz akçemi müvekkiletân-ı mezbûretâna îsâl etmek için yedinden bi’t-tamam ahz u kabz edip mûmâ-ileyh el-Hâc Mehmed Ağa’yı emlâk-i mezbûreyi mahallinde tesellüme ve mevâzi‘-i merkūme ve mevâki‘-i mersûmeyi zabt ve tasarrufa taslît eyledik dediklerinde vekîl-i mezbûr İbrahim Çelebi herbirini vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu.

Fi’l-yevmi’s-sâbi‘ aşer min-Şevvâli’l-mükerrem li-sene selâse ve sittin ve elf.

Şuhûdü’l-hâl: Ömer Efendi el-Kādı, Receb Efendi el-Müderris, Bayram Efendi el-mübâşir, Mehmed Bey b. Mustafa, Sefer Ağa b. Hüseyin, Mehmed Bey el-Bevvâbü’s-sultânî.