İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 240 Hüküm no: 152 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Mahmud’un Hacı Mustafa b. Hacı İbrahim’de alacağı kaldığı iddiasıyla açtığı davada Hacı Mustafa’nın borcu olmadığını ispat ettiği Mahmiye-i İstanbul’da Ma‘cûncu Kasım mahallesi ahâlîsinden İsmail b. Mahmud nâm kimesne mahfil-i kazâda işbu râfi‘u’l-kitâb el-Hâc Mustafa b. el-Hâc İbrahim nâm kimesne mahzarında üzerine da‘vâ ve takrîr-i kelâm edip bundan akdem mezbûr el-Hâc Mustafa’ya mahmiye-i mezbûrda Koruk Mahmud mahallesinde vâki‘ bir tarafdan Mustafa Çelebi mülkü ve bir tarafdan Hüseyin mülkü ve bir tarafdan Şaban Çavuş mülkü ve bir tarafdan tarîk-i âm ile mahdûd birbirine muttasıl altı mülk odalarımı yedi yüz yirmi guruşa bey‘ ve teslîm ol dahi ba‘de’l-iştirâ ve’t-tesellüm zikrolunan odaları vakf ve üç bâb odasını yüz guruş mu‘accele ile bana îcâr ve mu‘accelesini semen-i mezbûr yedi yüz yirmi guruşun üç yüz guruşuna takās ben dahi mukāssa ve kabûl ve semen-i mezbûrun nakd iki yüz on guruşunu dahi yedinden ahz u kabz edip iki yüz on guruşu zimmetinde bâkī kalmağla hâlen mezbûr el-Hâc Mustafa’ya suâl olunup meblağ-ı bâkī-i mezbûr iki yüz on guruşun alıverilmesi matlûbumdur dedikde gıbbe’s-suâl mezbûr el-Hâc Mustafa cevâbında fi’l-vâki‘ kazıyye minvâl-i muharrer üzere olup lâkin meblağ-ı <> mezbûr yedi yüz yirmi guruşu müdde‘î-i merkūma mukaddemâ edâ ve teslîm ol dahi ahz u kabz edip hatta müdde‘î-i mezbûr İsmail yedinden işbu mülknâme hücceti nâtıka olduğu üzere zikrolunan odaların semeni olan meblağ-ı merkūm yedi yüz yirmi guruşu benden kabz eylediğini bin doksan yedi senesi şehr-i Rebî‘ülevvel’inin yirmi dördüncü günü mahmiye-i mezbûrede Davutpaşa mahkemesinde nâibü’ş-şer‘ olan Mehmed Emin Efendi huzûrunda ikrâr ve işhâd ve yedime hüccet vermişidi deyü mazmûnu takrîr-i meşrûhuna muvâfık ve târih-i mezkûr ile müverraha ve nâib-i mûmâ-ileyhin imzâ ve hatmini hâviye hüccet ibrâz edip def‘le mukābele edicek isre’l-istintâk ve’l-inkâr mezbûr el-Hâc Mustafa’dan def‘-i mezkûrunu mübeyyene beyyine taleb olundukda zeyl-i hüccet-i mezkûrda ismi mastûr olup mahmiye-i merkūmede Kumkapı kurbünde Balipaşa mahallesinde sâkin el-Hâc İbrahim b. Halil ve Hoşkadem mahallesinde sâkin el-Hâc Abdullah b. Ebûbekir nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i merkūm İsmail hüccet-i mezkûre nâtıka olduğu üzere zikrolunan altı bâb odaların semeni olan meblağ-ı merkūm yedi yüz yirmi guruşu işbu mezbûr el-Hâc Mustafa’dan bi’t-tamam ahz u kabz eyledim deyü bin doksan yedi senesi şehr-i Rebî‘ülevvel’inin yirmi dördüncü günü bizim huzûrumuzda nâib-i müşârün-ileyh Mehmed Emin Efendi mahzarında ikrâr ve bizi işhâd edip yedine nâib-i mûmâ-ileyhin imzâ ve hatmini hâviye işbu hüccet dahi vermişidi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr ber-vech-i muharrer bî-vech mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mehmed Çelebi b. Ömer, el-Hâc Abdullah b. Şaban, Mustafa b. Ahmed.