İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 254 Hüküm no: 161 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yazıcıbaşı Ali Ağa b. Mehmed’in, vefat eden Ali Yazıcı b. Yusuf’da alacağı olduğu iddiasıyla kardeşi İbrahim’e açtığı davanın reddedildiği Mahmiye-i İstanbul’da Odabaşı çarşısı kurbünde Koruk Mahmud mahallesinde sâkin sâbıkā yazıcıbaşı olan Ali Ağa b. Mehmed nâm kimesne dîvân-ı hazret-i sadrazamîde ma‘kūd meclis-i şer‘-i şerîf-i âlîde Dergâh-ı âlî yeniçeleri ocağında başyazıcı iken merhûm Köprülüzâde Mustafa Paşa şehîden fevt olduğu muhârebede gāib olan Ali Yazıcı b. Yusuf’un karındaşı işbu râfi‘u’l-kitâb İbrahim Çelebi b. Yusuf nâm kimesne mahzarında takrîr-i da‘vâ ve tasvîr-i müdde‘â edip bin doksan dokuz senesinde kul kethudâsı olan Mustafa Ağa b. Abdi’ye cihet-i karz-ı şer‘îden iki bin beş yüz guruş zimmetimde deynim olup meblağ-ı mezbûru nâtık ve hatt u hatmimi hâvî kendiye temessük verdiğimden sonra mezbûr Mustafa Ağa kul kethudâlığından azl ve Gönye sancağı beyi olup livâ-i mezbûra gittikde mezbûr Ali Yazıcı ber-vech-i muharrer başyazıcı olmağla temessük-i merkūm bir tarîk ile yedine girip mezbûr Mustafa Ağa’nın taraf-ı mîrîye deyni olmağla senin zimmetinde cihet-i mezbûreden hakkı olan meblağ-ı mezbûr iki bin beş yüz guruşu mezbûr Mustafa Ağa’nın taraf-ı mîrîye olan [54b] deyni için ben tahsîle memûrum deyü beni ahz u habs ve meblağ-ı mezbûrun bin beş yüz guruşunu benden ahz u kabz ve istihlâk eyledikden sonra muhârebe-i mezbûrede vech-i muharrer üzere gāib olmağla meblağ-ı mezbûr zimmetinde kalmışdır hâlâ mezbûr İbrahim Çelebi merkūm Ali Yazıcı’nın karındaşı olmağla meblağ-ı mezbûru taleb ederim suâl olunsun dedikde müdde‘î-i mezbûrun takrîr-i meşrûhu üzere merkūm Ali Yazıcı mefkūd olup hayat ve memâtı nâ-ma‘lûm olmağla mezbûr Ali Yazıcı’nın fevtini ve terekesine mezbûr İbrahim Çelebi’nin vaz‘-ı yedini iddi‘â etmediğinden mâ‘adâ müdde‘î-i mezbûr Ali Ağa bin yüz altı senesi Cumâdelâhire’sinde Âsitâne-i sa‘âdet’de Sadâret-i uzmâ ve Vekâlet-i kübrâ kāimmakāmı olan düstûr-ı zî-şân sa‘âdetlü Mustafa Paşa hazretlerinin dîvân-ı âlîlerinde ma‘kūd meclis-i şer‘-i şerîf-i enverde ve yine târih-i mezbûrda Mahmud Paşa mahkemesinde nâibü’ş-şer‘i’ş-şerîf olan umdetü’l-müderrisîn Osman Efendi b. Ebûbekir huzûrunda işbu hazır bi’l-meclis Süleyman Ağa b. Mehmed’den sâlifü’z-zikr doksan dokuz senesinde dâyin-i mezbûr Mustafa Ağa livâ-i mezbûra gittiğimden sonra başbâkīkulu bulunmağla ordu-yı hümâyûn Davudpaşa sahrâsında iken beni ahz edip mezbûr Mustafa Ağa’nın bâlâda tafsîl olunan vech üzere taraf-ı mîrîye deyni olmağla mezbûrun cihet-i mezbûreden zimmetinde hakkı olan meblağ-ı mezbûru mezbûr Mustafa Ağa’nın taraf-ı mîrîye olan deyni için ver deyü kendi çadırında dokuz gün beni habs ve bin yirmi guruş olmak üzere dört yüz yirmi yaldız altınımı bi-gayr-ı hakkın ahz u kabz eyledin deyü da‘vâ edip ol dahi inkâr etmekle mezbûr Ali Ağa müdde‘âsını isbât edemeyip mezbûr Süleyman Ağa bi’t-taleb tahlîf olunup yedine hüccet-i şer‘iye verilmekle meblağ-ı mezbûru tekrar merkūm Ali Yazıcı’dan talebi meşrû‘ olmayıp da‘vâsı tenâkus olup ve mezbûr Ali Yazıcı vech-i meşrûh üzere mefkūd oldukda hâlâ kalîl ü kesîr ve celîl ü hakīr eşyâsı ve zimem-i nâsda olan hukūku tahsîl olundukda elli üç bin doksan altı guruşa bâliğ olmağla meblağ-ı mezbûr bâ-fermân-ı âlî cânib-i mîrîden kabz olunup veresesi yedlerinde bir habbe bâkī kalmayıp eşyâsından bir nesneye vaz‘-ı yedleri olmamağla hâricden bazı kimesnelerin mezbûr Ali Yazıcı’ya ma‘lûmü’l-mikdâr şey vermişidik zimmetinde kalmışidi deyü iddi‘âları istimâ‘ olunmayıp men‘ u def‘ olunmak bâbında mezbûr İbrahim Çelebi yedinde müte‘addid emr-i şerîf-i cihân-mutâ‘ dahi olmağla müdde‘î-i mezbûr Ali Ağa’nın da‘vâsını istimâ‘a bir vechile mesâğ olmamağın mûcebiyle müdde‘î-i mezbûr Ali Ağa bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Tezkire-i evvel Mustafa Efendi, zübdetü ashâbi’t-tastîr ve’r-rakām Tezkire-i sânî Mehmed Efendi, umdetü’l-eşbâh ve’l-a‘yân Yusuf Bey Ser-çavuşân, fahrü’l-akrân ve’l-ekfâ Muhzır Mehmed Ağa, umdetü’l-a‘yân Odabaşı Mustafa Ağa. Yevmü’s-sâlis fî 15 min-şehri Ramazani’l-mübârek sene