İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 256 Hüküm no: 162 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hanım bt. Vezirazam İbrahim Paşa’nın veresesinin kendilerine intikal eden ev ve arsadaki hisselerini satmalarına izin verildiği Dârü’l-hilâfeti’l-aliyye Kostantıniyyeti’l-mahmiye’de Darbhâne kurbünde vâki‘ Sekbânbaşı Yakub Ağa mahallesi sâkinelerinden iken bundan akdem vedâ‘-ı âlem-i fânî eden Ümmühani Hanım bt. el-merhûm Vezîriazam Kara İbrahim Paşa’nın verâseti zevc-i metrûkü İsmail Bey b. Yakub Ağa ile sadriye kızı Ayşe Hanım nâm sagīreye ve li-ebin er karındaşı umdetü’l-emâcid ve’l-ekârim Süleyman Bey ve mahlûletü’l-akl olup rüşdü olmayan li-ebin kız karındaşı Zeyneb Hanım’a münhasıra ve tashîh meselesi on iki sehimden olup sihâm-ı mezbûreden üç sehimi mezbûr İsmail Bey’e ve altı sehimi sagīre-i mezbûre Ayşe Hanım’a ve iki sehimi mûmâ-ileyh Süleyman Bey’e ve bir sehimi mûmâ-ileyhâ Zeyneb Hanım’a isâbet eylediği şer‘an zâhir ve müte‘ayyen oldukdan sonra sagīre-i mezbûre Ayşe Hanım’ın babası mezbûr İsmail Bey mübezzir olup <> âhar diyârda olmağla min-kabli’l-ümm vasîyy-i muhtârı olan umdetü’l-müderrisîni’l-kirâm zübdetü’l-muhakkıkīni’l-fihâm Dürrî Mehmed Efendi b. İlyas Efendi ve ber-vech-i meşrûh mahlûletü’l-akl olan mezbûre Zeyneb Hanım’ın vasîyy-i şer‘îsi olan hâlâ muhâsebe-i evvel umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām Mehmed Efendi b. Sefer Ağa’dan herbiri meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda bi’l-vesâye takrîr-i kelâm ve ta‘bîr ani’l-merâm edip zikri mürûr eden Sekbânbaşı Yakub Ağa mahallesinde vâki‘ bir tarafdan Medîne-i Münevvere şerefehallâhu te‘âlâ vakfından olup merhûm Gümrük emîni Hüseyin Paşa veresesi tasarruflarında olan menzil ve bir tarafdan tarîk-i hâs ve bir tarafdan Büyük Davud Ağa vakfından olan odalar ve bir tarafdan tarîk-i âm ile mahdûd menzilin tûlen ve arzen bi-hesâbı terbî‘î beş bin sekiz yüz üç zirâ‘ mülk arsası ve üzerinde mebnâ ve dâhilen ve hâricen büyût-ı adîde ve matbah ve hamam ve câmekân ve külhan ve fevkānî ve tahtânî bahçe ve köşk ve mahzen ve tarîk-i âm tarafından birbirine muttasıl on iki kepenk on bâb dükkânı ve kanavât-ı müsennât-ı memlûke ile cârî hakk-ı mecrâsından gayrı iki masûra mâ-i lezîzi müştemil mahalli merhûme-i mezbûre Ümmühani Hanım’ın ile’l-vefât silk-i mülkünde münselik olup ve menzil-i mezbûrun dâhiliyesinde vâki‘ sahrınç [55a] ve zât-ı eşcâr-ı müsmire ve gayr-ı müsmireyi hâvî tûlen ve arzen bi-hesâbı mezbûr bin iki yüz elli zirâ‘ bahçe ve merhûme Şah Sultân vakfından icâre-i mu‘acceleli beher yevm beş akçe ücret-i müeccele ile ve menzil-i mezbûr hâriciyesinde vâki‘ bir havuz ve altında bir mahzen ve üzerinde eşcâr-ı müsmire ve gayr-ı müsmireyi müştemil tûlen ve arzen bi-hesâbı merkūm iki bin iki yüz yirmi üç zirâ‘ bahçe ve Haremeyn-i şerîfeyn vakfından icâre-i mu‘accele ve beher yevm üç akçe ücret-i müeccele ile ve yine hâriciye-i mezbûrede vâki‘ bir hamam ve bir câmekân ve altında samanlığı hâvî bi-hesâbı merkūm bin altı yüz altmış zirâ‘ arsa sâlifü’z-zikr Büyük Davud Ağa vakfından kezâlik icâre-i mu‘accele ve beher şehr beş yüz yetmiş beş akçe ücret-i müeccele ile merhûme-i mûmâ-ileyhâ Ümmühani Hanım’ın ile’l-vefât taht-ı tasarrufunda olup ba‘de’l-vefât menzil-i mahdûd-ı mezbûrun mülk-i sırf olan mahâll-i merkūmu sihâm-ı mezbûr on iki sehimden i‘tibâr ile üç sehimi zevci mezbûr İsmail Bey’e ve altı sehimi kızı sagīre-i mezbûre Ayşe Hanım’a ve iki sehimi er karındaşı mûmâ-ileyh Süleyman Bey’e ve bir sehimi kız karındaşı mûmâ-ileyh Zeyneb Hanım’a bi’l-irsi’ş-şer‘î isâbet ve intikāl ve evkāf-ı mezbûreden olan sâlifü’z-zikr üç kıt‘a mahalleri ancak kızı sagīre-i mezbûre Ayşe Hanım’a intikāl-i âdî ile intikāl edip lâkin mûmâ-ileyh Süleyman Bey menzil-i mezbûru mülk-i sırf olan mahâll-i mezkûrda vâki‘ iki sehim hissesini bey‘ murâd etmekle mezbûrân Ayşe Hanım ve Zeyneb Hanım’ın bâlâda tahrîr olunan mülk ve vakf hisseleri ifrâz ve herbiri müstakillen tasarruf mümkün olmayıp müntefi‘-i bahâ olmadıklarından mâ‘adâ mürûr-ı eyyâm ve şuhûr ile menzil-i mezbûrun cidâr-ı erba‘ası ve kenîf ve döşeme duvarları ve sâir mevâzi‘i müşrif-i harâb ve mâil-i turâb olmağla kıymet-i şer‘iyeleri ile semen-i misillerine noksan-ı küllî tereddüb [terettüb] etmek mukarrer olup ve ücret-i mezkûrelerinden müctemi‘ beher yevm yirmi yedişer akçe evkāf-ı mezbûreye mal-ı sagīreden edâ olunmakla dahli harcına vefâ etmeyip ve mezbûretânın hisse-i mezkûreleri birkaç eyyâm hâlî üzere meks olunsa bi’l-külliye münhedim ve harâb olup zarar-ı küllî olmak muhakkak olmağın hâlâ mezbûretân Ayşe Hanım ve Zeyneb Hanım’ın menzil-i mezbûrun mülk olan mahâll-i merkūmunda vâki‘ hisse-i mezkûreleri semen-i misilleri ile bey‘ ve mezbûre Ayşe Hanım’ın evkāf-ı mezbûreden olan hisse-i mezbûreleri bedel-i misli ma‘rifet-i mütevellîler ile ferâğ ve semen ve bedelleri istirbâh ve istiğlâl olunmak mezbûretân Ayşe Hanım ve Zeyneb Hanım hisselerinde [haklarında] min-külli’l-vücûh evlâ ve enfa‘ olmağın hakīkat-i hâl vukūf-ı tâmmı olan bî-garaz Müslimînden ihbâr olunup haberleri tahrîr ve vech-i meşrûh üzere mezbûretânın hisseleriyle semen-i misilleri ve bedel-i mu‘âdilleri ve evkāf-ı mezbûre mütevellîleri izn ü ma‘rifetleriyle bey‘ ve ferâğa kıbel-i şer‘den bize izn verilmek matlûbumuzdur dediklerinde hakīkat-i hâl vukūf-ı tâmmı olan udûl-i Müslimîn ve sikāt-ı muvahhidînden olup meclis-i şer‘a hâzırûn olan cemm-i gafîr ve cemî‘-i kesîrden istifsâr ve istihbâr olundukda fi’l-hakīka kazıyye bâlâda tafsîl ü beyân olunan vech üzere olup mûmâ-ileyh Süleyman Bey menzil-i mahdûd-ı mezbûrun mülk-i sırf olan mahâll-i mezkûrunda vâki‘ iki sehim hissesini bey‘ murâd etmekle mezbûretân Ayşe Hanım ve Zeyneb Hanım’ın bâlâda tafsîl olunan mülk ve vakf hisseleri ifrâz ve herbiri müstakillen tasarruf mümkün olmayıp müntefi‘-i bahâ olmadıklarından mâ‘adâ mürûr-ı eyyâm ve şuhûr ile menzil-i mezbûrun cidârân-ı erba‘ası ve sakf ve döşemesi ve dolma duvarları ve sâir mevâzi‘i müşrif-i harâb ve mâil-i turâb olmağla kıymet-i şer‘iyeleri ile bedel-i misillerine noksan-ı küllî tereddüb [terettüb] etmek mukarrer olup ve ücret-i mezkûrelerinden müctemi‘ beher yevm yirmi yedişer akçe evkāf-ı mezbûreye mal-ı sagīreden edâ olunmağla dahli harcına vefâ etmeyip ve <> mezbûretânın hisse-i mezkûreleri birkaç eyyâm hâlî üzere meks olunsa bi’l-külliye münhedim ve harâb olup zarar-ı küllî olmak muhakkak olmağın hâlâ mezbûretân Ayşe Hanım ve Zeyneb Hanım’ın menzil-i mezbûrun mülk olan mahâll-i merkūmunda vâki‘ hisse-i mezkûreleri semen-i misilleri ile bey‘ ve mezbûre Ayşe Hanım’ın evkāf-ı mezbûreden olan hisse-i mezbûreler bedel-i misli ve ma‘rifet-i mütevellîler ile ferâğ ve semen ve bedelleri istirbâh ve istiğlâl olunmak mezbûretân Ayşe Hanım ve Zeyneb Hanım’ın haklarında min-külli’l-vücûh evlâ ve enfa‘dır deyü herbiri alâ tarîkı’ş-şehâde haber vermeğin mûcebiyle mezbûretân Ayşe Hanım Zeyneb Hanım’ın menzil-i mezbûrun mülk olan mahâll-i merkūmunda vâki‘ on iki sehimden yedi sehim hisselerini semen-i misilleri ile <> ve mezbûre Ayşe Hanım’ın evkāf-ı mezbûreden olan arsa-i müntakile-i mezbûrelerini bedel-i misli ve mütevellîleri ma‘rifetleriyle ferâğa vasiyyân-ı mezbûrân Dürrî Mehmed Efendi’ye ve Muhâsebeci Mehmed Efendi’ye kıbel-i şer‘den izn verilip işbu vesîka bi’t-taleb ketb olundu. Fi’l-yevmi’s-sâmin min-Recebi’l-ferd sene [1]107 Şuhûdü’l-hâl: Fahrü’l-akrân el-Hâc Mehmed Ağa b. İbrahim Çelebi, Mehmed Efendi b. Ahmed el-imâm, el-Hâc Halil Efendi b. Mehmed, el-Hâc Mustafa Efendi b. Eyüb, el-Hâc Mehmed Efendi b. Hüseyin, el-Hâc Ali b. Şaban, el-Hâc Ebûbekir Beşe b. ( ), Ömer Ağa b. Osman, İbrahim Çelebi b. Ahmed, Mehmed Efendi İmâm-ı Halil Paşa, Ahmed Efendi Hatîb-i câmi‘, Abdurrahman Efendi el-Moravî, Ali Ağa b. (…) Efendi, Müftizâde Mehmed Efendi.