İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 262 Hüküm no: 164 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Estozile’nin babası Hasan’ın kızının mehir bedelinden hissesine düşen parayı damadı Yahudi Avraham v. Mosi’den aldığı Mahrûse-i Galata kazâsı müzâfâtından kasaba-i Beşiktaş’a tâbi‘ Ortaköy nâm karye[de] sâkin iken bundan akdem hâlike olan Estozile bt. Mühtedî Hasan nâm yahudiyenin verâseti hîn-i helâkinde Yahûd olup ba‘dehâ şeref-i İslâm ile müşerref olan babası mezbûr Hasan’a ve zevci Avraham v. Mosi nâm yahudiye münhasıra olduğu şer‘an zâhir ve müte‘ayyen oldukdan sonra mezbûr Hasan dîvân-ı hazret-i sadrazamîde ma‘kūd meclis-i şerîf-i enverde işbu râfi‘u’l-vesîka mezbûr Avraham muvâcehesinde üzerine da‘vâ ve takrîr-i kelâm edip kızım mezbûre Estozile’nin zevci mezbûr Avraham zimmetinde mukarrer ve ma‘kūdün-aleyh bin guruş mehr-i müeccel hakkı olup kable’l-ahz hâlike olmağla mezbûrun beş yüz guruşu ırsen bana isâbet etmişdir hâlâ suâl olunup alıverilmesi matlûbumdur dedikde gıbbe’s-suâl merkūm Avraham cevâbında zevcem mezbûre Estozile’nin zimmetimde mütekarrer ve ma‘kūdün-aleyh ancak bin akçe mehr-i müecceli olup kable’l-ahz hâlike olmağla meblağ-ı mezbûrun beş yüz akçesi bana ve beş yüz akçesi pederi mezbûra ırsen isâbet edip meblağ-ı mezbûr beş yüz akçe müdde‘î-i mezbûra zimmetimde deynimdir elân müdde‘î-i mezbûra cihet-i merkūmeden beş yüz akçe zimmetinde deyni olduğunu ikrâr ve mehr-i mezbûrun ziyâdesini inkâr edicek müdde‘î-i mezbûrdan ziyâde müdde‘âsını mübeyyene beyyine taleb olundukda ityân-ı beyyine<> için istimhâl etmekle kirâren ve mirâren mehl-i şer‘î birle ba‘de’l-imhâl ityân-ı beyyineden bi’l-külliye ızhâr-ı acz edip tahlîfe dahi tâlib olmamağın mûcebiyle mârrü’z-zikr beş yüz akçeyi ba‘de’l-ahz ziyâde için bilâ-beyyine bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fî 17 min-Şa‘bâni’l-mu‘azzam sene 1107 Şuhûdü’l-hâl: Umdetü erbâbü’t-tahrîr ve’l-kalem Tezkire-i evvel Mustafa Efendi, zübdetü ashâbi’t-tastîr ve’r-rakām Tezkire-i sânî Mehmed Efendi, fahrü’l-eşbâh ve’l-a‘yân Yusuf Bey Ser-çavuşân, fahrü’l-akrân Muhzır el-Hâc Mehmed Ağa b. ( ), el-Hâc Halil efendi, el-Hâc Ali Beşe b. ( ), el-Hâc Ebûbekir Beşe, el-Hâc Mehmed Çavuş. Yevmü’l-hâdî fî 17 min-şehri Ramazani’l-mübârek sene 1107