İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 263 Hüküm no: 165 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azak ve Özi taraflarına gönderilecek olan firkate kaptanlarının serdarı İlyas Bey b. Mehmed ile kaptanların gemilerinin ihtiyaçları olan top ve diğer mühimmatı Tersane Emini Yusuf Efendi b. Mustafa’dan teslim aldıkları Husûs-ı âti’z-zikrin mahâllinde ketb u tahrîri için sâdır olan fermân-ı şerîfe imtisâlen savb-ı şer‘den irsâl olunan İbrahim Efendi b. Mehmed el-Hamîdî Tersâne-i âmire’de Kapudan paşaya mahsûs olan dîvânhâneye varıp hâlâ düstûr-ı mükerrem müşîr-i müfahham Mezamorta demekle şehîr sa‘âdetlü Hüseyin Paşa yesserallâhu külle mâ yürîd ve mâ yeşâ’ hazretlerinin huzûrlarında ma‘kūd meclis-i şer‘-i şerîf-i enverde hâlâ Azak ve Özi taraflarına ihrâcı fermân olunan otuz beş pâre firkate ta‘bîr olunur sefînelerin üzerlerine serdârları olan emirü’l-ümerâ’i’l-kirâm İlyas Bey b. Mehmed ve kapudanlarından Semmûrkaş? demekle şehîr Mehmed Kapudan b. Yusuf ve sâirleri bi-ecmâ‘ihim meclis-i ma‘kūd-ı mezbûrda hâlâ Tersâne emîni olan umdetü’l-emâcid ve’l-ekârim câmi‘ü’l-mehâmid ve’l-mekârim Yusuf Efendi b. Mustafa mahzarında ikrâr ve takrîr-i kelâm edip biz işbu bin yüz yedi senesinde zikrolunan Azak ve Özi taraflarına ihrâcı fermân olunan otuz beş pâre firkateler için emîn-i mûmâ-ileyh Yusuf Efendi’nin yedine verdiğimiz mümzâ ve mahtûm mahzen defteri mûcebince herbirinin ikişer eniğiyle saçma ta‘bîr olunur yetmiş dört aded tuç top ve yetmiş aded demir top ki cem‘an yüz kırk dört aded topları ve bunlardan mâ‘adâ sefîne-i mezbûreler için iktizâ eden otuz dokuz aded koğuş toplarının on dört aded topu Tophâne’den ve on sekiz aded topları Tersâne-i mezbûreden ve yedi aded koğuş topları mukābelelerinde dahi on üç saçma toplarını ve yine mârrü’z-zikr sefînelere lâzım olan demir ve esbâb-ı âhen ve bâd-bân ve resenhâlarımızı ve sütun ve seren ve kürek ve tente ve tenteletelerimizi ve sâir cemî‘-i mühimmâtlarımızı mûmâ-ileyh Yusuf Efendi yedinden bi’t-tamam ve’l-kemâl ahz u kabz eyledik dediklerinde gıbbe’t-tasdîk ( ) ve’l-vicâhî vâki‘ hâli mezbûr İbrahim Efendi [57a] mahâllinde ketb u tahrîr ve ba‘dehû ma‘an irsâl olunan Mehmed b. Mehmed ve Ahmed b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min-Şa‘bâni’l-mu‘azzam li-sene seb‘a mie ve elf. Şuhûdü’l-hâl: Ebûbekir b. Mehmed, Mustafa Reis b. Ömer, Ahmed Efendi b. Hüseyin, Muslu Efendi b. Receb. Yevmü’l-Cum‘a fî 18 min-şehri Ramazani’l-mübârek sene 1107