İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 265 Hüküm no: 167 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa Mütesellimi Ahmed Ağa b. Osman’ın, vefat Bursa Mutasarrıfı İsmail Paşa b. Ahmed’de olan alacağının bir kısmını hanımı Ayşe Hatun bt. Eyüb Çavuş’dan aldığı Sâbıkā Bursa sancağına ber-vech-i arpalık mutasarrıf iken maktûlen vefât eden İsmail Paşa b. Ahmed’in hayatında livâ-i mezbûrede mütesellimi olan es-Seyyid Ahmed Ağa b. es-Seyyid Osman meclis-i şer‘-i şerîf-i enverde müteveffâ-yı mezbûr İsmail Paşa’nın verâseti zevce-i metrûkesi Ayşe Hatun bt. Eyüb Çavuş ile sulbî sagīr oğlu Mehmed Bey’e ve sulbiye kebîre kızı Zeliha Hanım’a münhasıra olup kable’l-kısme sagīr-i mezbûr Mehmed Bey dahi fevt olup verâseti vâlide-i mezbûre Ayşe Hatun ile li-ebin kız karındaşı mezbûre Zeliha Hanım’a ve li-ebin ammi Osman Efendi’ye münhasıra ve tashîh meseleleri bi-tarîkı’l-münâsahati’ş-şer‘iye yetmiş iki sehimden olup sihâm-ı mezbûreden yirmi üç sehimi mezbûre Ayşe Hatun’a ve kırk iki sehimi mezbûre Zeliha Hanım’a ve bâkī yedi sehimi merkūm Osman Efendi’ye isâbet eylediği şer‘an zâhir ve müte‘ayyen oldukdan sonra tereke-i müteveffâ-yı mezbûra vâzı‘atü’l-yed olan mezbûre Ayşe Hatun tarafından husûs-ı âti’z-zikri tasdîka vekîl-i müsecceli olan bâ‘isü hâze’l-kitâb Ahmed Çelebi b. Mustafa mahzarında ikrâr-ı tâm edip bundan akdem livâ-i mezbûr taraf-ı Saltanat-ı aliyye’den mûmâ-ileyh İsmail Paşa’ya tevcîh olundukda iki defada benden bin yüz guruşumu istidâne ve kabz ve livâ-i mezbûra beni mütesellim nasb u ta‘yîn ve deyn-i mezbûru zikrolunan mütesellimlik mahsûlünden kabz ve istifâya beni vekîl etmekle ben dahi ba‘de’l-kabûl zikrolunan mütesellimliği altı ay ve on üç gün zabt ve mahsûlâtından ba‘de ihrâci’l-mesârif kendiye âid olan [57b] meblağdan deyn-i mezbûrun altı yüz dokuz guruşunu ahz u istifâ edip dört yüz doksan guruş hakkım bâkī kalmağın hatta bin yüz beş senesi şehr-i Recebi’l-ferd’inin altıncı günü Bursa kadısı olan umdetü’l-mevâliyyi’l-izâm Ahmed Efendi huzûrunda mûmâ-ileyh İsmail Paşa’nın vekîl-i şer‘îsi olan Hüseyin Ağa b. Ali ile mürâfa‘a-i şer‘ olduğumuzda meblağ-ı bâkī-i mezbûr dört yüz doksan guruş mûmâ-ileyh zimmetinde hakkım olduğu zâhir ve müte‘ayyen olmağla şer‘an edâsına tenbîh ve işbu hüccet-i şer‘iye dahi tahrîr olundukdan sonra kable’l-edâ zimmetinde iken maktûlen fevt olup terekesine veresesi mezbûrûn vâzı‘u’l-yed olmağla meblağ-ı mezbûrdan müvekkile-i mezbûrenin ber-vech-i muharrer yirmi üç sehim hissesi için edâsı lâzım gelen yüz elli altı buçuk guruşun hâlâ yüz on guruşunu müvekkile-i mezbûre Ayşe Hatun yedinden ahz u kabz edip mâ‘adâ hissesi olan kırk altı buçuk guruş ve bi’l-cümle müteveffâ-yı mezbûr ile ile’l-vefât beynimizde cereyân eden sâir ahz u i‘tâya müte‘allika âmme-i da‘vâdan ancak mezbûre Ayşe Hatun’un zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim min-ba‘d mezbûre Ayşe Hatun ile da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min-şehri Ramazani’l-mübârek sene [1]107 Şuhûdü’l-hâl: Mehmed Çelebi b. İbrahim, Mustafa Ağa b. Hızır sâkin-i Bursa, Pazarcı Mustafa Beşe, Mustafa Efendi b. Hasan, es-Seyyid Mehmed Efendi b. İbrahim Pazarcı, Abdurrahman Efendi b. Mustafa Muhâsebeci