İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 266 Hüküm no: 168 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Sadaret Kaymakamı Ahmed Paşa b. Abdullah’ın terekesindeki bedelinin Midilli’de borçlu olduğu şahıslara verildiği Sâbıkā Rikâb-ı hümâyûn-ı şevket-makrûnda Sadâret-i uzmâ ve Vekâlet-i kübrâ kāimmakāmı olup cezîr[e]-i Midilli muhâfazasından maktûlen cezîre-i mezbûrede maktûlen vefât eden merhûm Ahmed Paşa b. Abdullah’ın sulbî sagīr oğlu ve hasren vârisi olan İbrahim Bey’in tesviye-i umûruna ve merhûm-ı mezbûrun terekesini kabz ve guremâsı beynlerinde tevzî‘ ve taksîme kıbel-i şer‘den mansûb vasîsi olan Ali Efendi b. Osman meclis-i şer‘-i şerîf-i enverde cezîre-i mezbûre sâkinlerinden umdetü’l-kuzât râfi‘ü hâze’l-kitâb Abdülbaki Efendi b. Mustafa mahzarında üzerine da‘vâ ve takrîr-i kelâm edip merhûm-ı mezbûr Ahmed Paşa bin yüz altı senesi Zilhicceti’ş-şerîfe’si evâsıtında cezîre-i mezbûrda fevt oldukda Midilli kadısı Musa Efendi’nin imzâ ve hatmini hâvî işbu defterin bâlâsında tahrîr olunup âhar bey‘ olunan eşyâ-i ma‘lûmesinden mâ‘adâ merhûm-ı mezbûrun terekesinden zeyl-i defterde mastûr mecmû‘u bin guruşa <> mukavvem olunan yüz guruş kıymetli yeşil çukaya kaplı bir Azak bogası kürk ve doksan iki guruş kıymetli ikisi cedîd ve ikisi köhne cem‘an dört orta keçesi ve yirmi üç guruş kıymetli iki top mîrzayî bogası ve kırk guruş kıymetli iki top sof ve beş guruş kıymetli iki kahve makraması ve yedi guruş kıymetli bir top kutnî ve yedi guruş kıymetli altı boyama makrama ve on üç guruş kıymetli sekiz çift çizme ve üç guruş kıymetli üç çift papuç ve beş guruş kıymetli bir müsta‘mel kaftân ve beş guruş kıymetli bir sarı kutnî kaftân ve iki guruş kıymetli bir köhne kaftân ve iki guruş kıymetli bir Selanik peşkiri ve yirmi guruş kıymetli dört kat mükemmel çamaşır ve on dört guruş kıymetli bir Mardin peşkiri ve kırk bir guruş kıymetli üç sancak ve bir guruş kıymetli bir yedekdeş? ve beş buçuk guruş kıymetli bir hamam peşkiri ve yirmi guruş kıymetli dört çift mavi kadife yastık ve otuz bir guruş kıymetli iki çift kırmızı ihrâm ve yedi guruş kıymetli bir çuka seccâde ve on beş guruş kıymetli iki donluk Hatâyî ve on beş guruş kıymetli bir donluk telli Hatâyî ve on beş guruş kıymetli bir donluk atlas ve on beş guruş kıymetli bir çuka dolama ve elli guruş kıymetli iki Keşmirî şâl ve kırk guruş kıymetli üç gön ?ve iki hünkârî destâr ve iki buçuk guruş kıymetli bir telli Hatâyî boğça ve sekiz guruş kıymetli bir top Hindî alaca ve on guruş kıymetli bir keremsûd bogası ve beş guruş kıymetli bir yorgan boğçası ve yirmi dört guruş kıymetli dört rengâmîz bogası ve otuz altı guruş kıymetli bir çerge ve on beş guruş misilli bir sîm ibrik ve elli guruş kıymetli <> bir sarı fağfûrî kâse ve yirmi guruş kıymetli şâla kaplı bir müsta‘mel nîmten kakum kürk ve iki buçuk guruş kıymetli üç makrama ve iki yüz otuz bir guruş kıymetli iki yüz on beş vakıyye [58a] evânî-i nühâsiye ve bir guruş kıymetli bir zîr-i meşk ve iki guruş kıymetli bir yemenî kürk boğçasını ben bi’l-vesâye ba‘de’l-kabz mezbûr Abdülbaki Efendi’ye bi-tarîkı’l-emâne vaz‘ eylemişidim hâlâ suâl olunup eşyâ-i mezbûrenin a‘yânı mevcûd ise a‘yânının mahâllinde bana teslîm müstehlek ise kıymet-i şer‘iyelerini edâya mezbûr Abdülbaki Efendi’ye tenbîh olunmak matlûbumdur dedikde gıbbe’s-suâl mezbûr Abdülbaki Efendi cevâbında merhûm-ı mûmâ-ileyh Ahmed Paşa hâl-i hayatında cezîre-i mezbûre sâkinlerinden Panayot ve Yorgo v. Manolaki ve Mihalaki v. Yani ve Gara v. Yorgaki ve Dimitri v. Yorgi ve Manolca v. Barafoti nâm zimmîlerden bi-gayr-ı hakkın bin guruş ahz u kabz ve kendi mesârifine sarfla istihlâk eyledikden sonra meblağ-ı mezbûru kable’l-edâ zimmetinde iken fevt olmağın mezbûrûn zimmîler meblağ-ı mezbûr bin guruşu tereke-i müteveffâ-yı mezbûrdan vasîyy-i mezkûr Ali Efendi’den kadı-i mûmâ-ileyh Musa Efendi huzûrunda ba‘de’d-da‘vâ müdde‘âlarını udûl-i Müslimînden Ali Ağa b. Abdullah ve Hüseyin Çelebi b. Habib şehâdetleriyle vasîyy-i mezbûr muvâcehesinde şer‘an isbât ve ba‘de’t-tahlîfi’ş-şer‘î meblağ-ı mezbûr bin guruş tereke-i müteveffâ-yı mezbûrdan edâ olunmak üzere hükm-i hâkimü’ş-şer‘ lâhık olup yedlerine hüccet-i şer‘iye verildikde mezbûrûn zimmîler meblağ-ı mezbûru müteveffâ-yı mezbûrdan ahz u kabza beni taraflarından vekîl etmeleriyle ben dahi ba‘de’l-kabûlü’l-vekâle vasîyy-i mezbûr Ali Efendi hâlâ müdde‘âsı olan eşyâ-i muharrere-i mezbûreyi deyn-i merkūm bin guruş mukābelesinde müvekkilûn-ı mezbûrûna def‘ u teslîm etmek için bana emânet vaz‘ ve teslîm ben dahi ahz u kabz eylediğimden sonra müvekkilûn-ı mezbûrûn eşyâ-i muharrere-i mezkûre kendilere tamamen teslîm olunmak bâbında tuğrâ-yı garrâ-yı sultânî ile mücellâ emr-i şerîf-i cihân-mutâ‘ ısdâr etmeleriyle ben dahi eşyâ-i mezbûreyi mezkûr Ali Efendi’nin emrine binâen bi-a‘yânihâ mezbûrûn zimmîlere bâ-fermân-ı âlî def‘ u teslîm onlar dahi yedimden tamamen ahz u kabz etmişlerdir deyü da‘vâ-yı def‘ edicek gıbbe’l-istintâk ve’l-inkâr mezbûr Abdülbaki Efendi’den def‘-i mezbûrunu mübeyyene beyyine taleb olundukda udûl-i Müslimînden olup fi’l-asl cezîre-i mezbûre sâkinlerinden olup hâlâ mahmiye-i İstanbul’da Tahtakale kurbünde müsâfiren sâkinler olan Abdullah Alaybeyi b. Mustafa ve Ahmed Bey b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka cezîre-i mezbûre sâkinlerinden mezbûrûn Panayot ve Yorgo v. Manolaki ve Mihalaki v. Yani ve Gara v. Yorgaki ve Dimitri v. Yorgi ve Manolca v. Barakoni merkūm-ı mezbûr Ahmed Paşa b. Abdullah hâl-i hayatında cezîre-i mezbûr muhâfazasında iken bizden bi-gayr-ı hakkın bin guruş ahz u kabz ve meblağ-ı mezbûr bin guruşu kendi mesârifine sarfla istihlâk eyledikden sonra kable’l-edâ zimmetinde iken fevt olmuşdur deyü meblağ-ı mezbûr bin guruşu tereke-i müteveffâ-yı mezbûrdan vasîyy-i mezbûr Ali Efendi’den cezîre-i mezbûre kadısı mûmâ-ileyh Musa Efendi huzûrunda ba‘de’d-da‘vâ müdde‘âlarını mezbûrân Ali Ağa b. Abdullah ve Hüseyin Çelebi b. Habib şehâdetleriyle vasîyy-i mezbûr muvâcehesinde şer‘an isbât ve ba‘de’t-tahlîfi’ş-şer‘î meblağ-ı mezbûr bin guruşu tereke-i müteveffâ-yı mezbûrdan edâ olunmak üzere hükm-i hâkimü’ş-şer‘ lâhık olup yedlerine hüccet-i şer‘iye verildikde mezbûrûn zimmîler meblağ-ı mezbûru tereke-i müteveffâ-yı mezbûrdan ahz u kabzına taraflarından işbu mezbûr Abdülbaki Efendi’yi vekîl etmeleriyle ol dahi ba‘de’l-kabûl vasîyy-i mezbûr Ali Efendi hâlâ müdde‘âsı olan mecmû‘u bin guruşa mukavvem yüz guruş kıymetli yeşil çukaya kaplı bir Azak bogası kürk ve doksan iki guruş kıymetli ikisi cedîd ve ikisi köhne cem‘an dört orta keçesi ve yirmi üç guruş kıymetli iki top mîrzayî bogası ve kırk guruş kıymetli iki top sof ve beş guruş kıymetli iki kahve makraması ve yedi guruş kıymetli bir top kutnî ve yedi guruş kıymetli altı makrama ve on üç guruş kıymetli sekiz çift çizme ve üç guruş kıymetli üç çift papuç ve beş guruş kıymetli bir müsta‘mel kaftân ve beş guruş kıymetli bir sarı kutnî kaftân ve iki guruş kıymetli bir köhne kaftân ve iki guruş kıymetli bir Selanik peşkiri ve yirmi guruş kıymetli dört kat mükemmel câmeşûr ve on dört guruş kıymetli bir Mardin peşkiri ve kırk bir guruş kıymetli üç sancak ve bir guruş kıymetli bir yedekdeş? ve beş buçuk guruş kıymetli bir hamam peşkiri ve yirmi guruş kıymetli dört çift mavi kadife yastık ve otuz bir guruş kıymetli iki çift kırmızı ihrâm ve yedi guruş kıymetli bir çuka seccâde ve on beş guruş kıymetli iki donluk Hatâyî ve on beş guruş kıymetli bir donluk telli Hatâyî ve on beş guruş kıymetli bir donluk atlas ve on beş guruş kıymetli bir çuka dolama ve elli guruş kıymetli [58b] iki Keşmirî şâl ve kırk guruş kıymetli üç gön ve iki hünkârî destâr ve iki buçuk guruş kıymetli bir telli Hatâyî boğça ve sekiz guruş kıymetli bir Hindî alaca ve on guruş kıymetli bir keremsûd bogası ve beş guruş kıymetli bir yorgan boğçası ve yirmi dört guruş kıymetli dört rengâmîz bogası ve otuz altı guruş kıymetli bir çerge ve on beş guruş misilli bir sîm ibrik ve elli guruş kıymetli bir sarı fağfûrî kâse ve yirmi guruş kıymetli şâla kaplı bir müsta‘mel nîmten kakum kürk ve iki buçuk guruş kıymetli üç makrama ve iki yüz otuz bir guruş kıymetli iki yüz on beş vakıyye evânî-i nühâsiye ve bir guruş kıymetli bir zîr-i meşk ve iki guruş kıymetli bir yemenî kürk boğçası deyn-i mezbûr bin guruş mukābelesinde müvekkilûn-ı mezbûrûna def‘ u teslîm etmek için biz[im] huzûrumuzda işbu merkūm Abdülbaki Efendi’ye emâneten def‘ u teslîm ol dahi ahz u kabz eyledikden sonra müvekkilûn-ı mezbûrûn zimmîler eşyâ-i mezbûre kendilere tamamen teslîm olunmak bâbında emr-i şerîf-i cihân-mutâ‘ dahi ısdâr etmeleriyle mezbûr Abdülbaki Efendi dahi eşyâ-i mezbûreyi müdde‘î-i mezbûrun emrine binâen mezbûrûn zimmîlere kezâlik huzûrumuzda bâ-fermân-ı âlî bi-a‘yânihâ def‘ u teslîm ol dahi yedinden tamamen ahz u kabz etmişler idi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr Ali Efendi bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-âşir min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mehmed Çelebi b. İbrahim, Halil Efendi b. Mehmed, Mehmed Efendi b. Hüseyin, Ali Beşe Çukadâr, İbrahim Çelebi b. Ahmed, Ali Çelebi b. Bali ve gayruhum. Yevmü’l-ahad fî 20 min-şehri Ramazani’l-mübârek sene 1107 Yevmü’l-isneyn fî 21 min-şehri Ramazani’l-mübârek sene 1107