İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 274 Hüküm no: 174 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Tüccar Hacı İsmail b. Mehmed b. İbrahim’in alacaklısı olduğu Tüccar Hüseyin b. Yusuf’un borcunu vasîsine ödemesi Fi’l-asl vilâyet-i Anadolu’da Beyşehri kasabasına tâbi‘ Sano nâm karye ahâlîsinden olup mahmiye-i İstanbul’da Odunkapısı kurbünde merhûm Gaznevî Mahmud Efendi hânında ticâret vechi üzere sâkin iken bundan akdem vefât eden el-Hâc İsmail b. Mehmed b. İbrahim’in hayatında yedinde olan hüccet-i şer‘iye mûcebince vasîyy-i muhtârı olduğu lede’ş-şer‘i’l-enver mütehakkık olan el-Hâc Musa Çelebi b. Mustafa meclis-i şer‘-i şerîf-i enverde ve mahfil-i dîn-i münîf-i ezherde yine tüccâr tâifesinden Hüseyin b. Yusuf mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûrun mezbûr Hüseyin zimmetinde cihet-i karz-ı şer‘îden yüz guruş hakkı olup kable’l-ahz fevt olup mezbûr Hüseyin zimmetinde kalmağın suâl olunup meblağ-ı mezbûrun bi’l-vesâye bana alıverilmesi matlûbumdur dedikde gıbbe’s-suâl mezbûr Hüseyin cevâbında fi’l-hakīka müteveffâ-yı mezbûr el-Hâc İsmail b. Mehmed b. İbrahim’e ber-vech-i muharrer cihet-i karz-ı şer‘îden meblağ-ı mezbûr yüz guruş zimmetinde vâcibü’l-edâ deyni olduğunu ikrâr u i‘tirâf etmeğin alâ mûceb-i i‘tirâfihî meblağ-ı mezbûr yüz guruşu vasîyy-i mezbûra edâ ve teslîme mezbûr Hüseyin’e tenbîh birle mâ vaka‘a bi’t-taleb ketb olundu. Fi’l-yevmi’l-ışrîn min-şehri Ramazani’l-mübârek sene 1107 Şuhûdü’l-hâl: Musa Çelebi b. Ahmed, el-Hâc İbrahim b. Osman, el-Hâc Mehmed b. Ali, Hasan Çelebi b. Hüseyin, İbrahim Çelebi b. Ahmed, Mehmed b. İdris ve gayruhum mine’l-huzzâr.