İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 275 Hüküm no: 175 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi b. Mustafa Efendi’nin evinin komşusu Süleyman Efendi b. Hacı Mustafa Efendi’nin evine verdiği zararın önlenmesi Husûs-ı âti’l-beyânın mahâllinde ketb u tahrîri için sâdır olan fermân-ı âlîye imtisâlen savb-ı şer‘-i âlîden keşf nâibimiz fahrü’l-müderrisîni’l-kirâm Mevlânâ Abdullah Efendi b. Ali irsâl olunup ol dahi Hâssa mi‘mârlarından Üstâd Ali Halîfe b. Mustafa ve diğer Ali Halîfe b. Abdullah nâm kimesneler ile mahmiye-i İstanbul’da Mesîh Hasan Paşa mahallesinde vâki‘ umdetü’l-müderrisîni’l-kirâm bâ‘isü hâze’l-kitâb Süleyman Efendi b. el-merhûm el-Hâc Mustafa <> Efendi’nin menziline varıp zeyl-i kitâbda muharrerü’l-esâmî olan Müslimîn mahzarlarında akd-i meclis-i şer‘-i mübîn eyledikde mûmâ-ileyh Süleyman Efendi meclis-i ma‘kūd-ı mezkûrda câr-ı mülâsıkı İsmail Efendi b. eş-Şeyh Mustafa Efendi mahzarında üzerine da‘vâ ve takrîr-i kelâm edip mezbûr İsmail Efendi işbu tahtânî menzilinin üzerine fevkānî bir bâb oda binâ ve ihdâs ve oda-i mezbûrenin sahnında benim dâhiliye vâki‘ menzilimin makarr-ı nisvân olan mevâzi‘i görünüp havâle ve zararı olduğundan mâ‘adâ zikrolunan fevkānî odasının sakfının saçağı benim menzilime bir zirâ‘ tecâvüz edip ve direklerini benim menzilimin duvarının köşesine muttasıl etmekle şiddet-i rûzgâr vukū‘unda benim menzilimin binâsına dahi îrâs edip zarar-bîni olmağın hâlâ keşf ve mu‘âyene olunup havâle ve zarar-ı şer‘îsini def‘a mezbûr İsmail Efendi’ye tenbîh olunmak matlûbumdur dedikde mi‘mâr olan mezbûrân ve ebniye ahvâline vukūf-ı tâmmı olup zeyl-i kitâbda muharrerü’l-esâmî olan Müslimîn ile evvelen mârrü’z-zikr nerdübân sahnında müdde‘î-i mûmâ-ileyh Süleyman Efendi’nin menziline nazar olundukda fi’l-hakīka mezbûr İsmail Efendi’nin mârrü’z-zikrolan nerdübânının sahnında müdde‘î-i mûmâ-ileyhin dâhiliye olan menzilinin makarr-ı nisvân olan mevâzi‘ine havâliye ve zarar-ı şer‘îsi olduğu zâhir ve müte‘ayyen olmağla tûlen altı zirâ‘ ve kadden üç zirâ‘ tahta perde ile havâlesi def‘ olduğunu ve zikrolunan muhdes fevkānî odasının sakfının saçağı mûmâ-ileyh Süleyman Efendi’nin menziline bir zirâ‘ tecâvüz etmekle direkleri müdde‘î-i mûmâ-ileyhin dâhiliye olan menzilinin duvarı köşesine muttasıl olup zarar-bîni olduğunu mi‘mârân-ı mezbûrân ile sâir Müslimîn alâ tarîkı’ş-şehâde haber vermeğin mûcebiyle ber-vech-i muharrer zarar-ı şer‘îsini def‘a mezbûr İsmail Efendi’ye ba‘de’t-tenbîh vâki‘ hâli mevlânâ-yı mezbûr mahâllinde ketb u tahrîr ba‘dehû ma‘an irsâl olunan Mustafa Efendi b. Ömer ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Şa‘bâni’l-mu‘azzam li-sene seb‘a ve miete ve elf. Şuhûdü’l-hâl: Fahrü’l-kuzât Hasan Efendi b. Mahmud Efendi, Ali Efendi b. Mustafa, Mehmed Efendi b. Mahmud, es-Seyyid Mehmed Çelebi b. es-Seyyid Ahmed, Mehmed Çelebi b. İbrahim, Mehmed Çelebi b. Abdullah, Abdullah b. Mehmed, Yusuf b. Mahmud ve gayruhum mine’l-huzzâr.