İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 276 Hüküm no: 176 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maliye tezkirecisi Mehmed Efendi b. Yusuf’un cariyesi Aşçı Timurhan bt. Abdullah’ı azat ettiği <> Husûs-ı âti’z-zikri mahâllinde ketb u tahrîr için savb-ı şer‘den bi’t-taleb irsâl olunan Ebûbekir Efendi b. el-Hâc Abdülkerim hâlâ atebe-i aliyye ve südde-i seniyyede Mâliye tezkirecisi olan Küçük Çelebi demekle şehîr umdetü erbâbü’t-tahrîr ve’l-kalem Mehmed Efendi b. Yusuf’un mahmiye-i İstanbul’da Sekbânbaşı mahallesinde vâki‘ menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr eyledikde mûmâ-ileyh Mehmed Efendi tarafından ıtk-ı âti’z-zikri ikrâra vekîl olduğu Hüseyin Ağa b. Receb ve es-Seyyid Abdullah Çelebi b. Ali şehâdetleriyle şer‘an sâbit olan Ebûbekir Efendi b. eş-Şeyh Mustafa Efendi meclis-i ma‘kūd-ı mezbûrda ikrâr-ı tâm ve takrîr-i kelâm edip müvekkilim mûmâ-ileyh Mehmed Efendi kendiye rıkkını i‘tirâf eden açık kaşlı gök elâ gözlü orta boylu Rusiyyetü’l-asl hâmiletü hâze’l-kitâb Aşçı Timurhan bt. Abdullah nâm câriyesini târih-i kitâbdan on gün mukaddem sefer-i hümâyûn-ı nusret-makrûna azîmet etdiğinde hasbeten lillâhi te‘âlâ ve haseneten li-rûhi rasûlihi’l-mu‘allâ mâlından tahrîr ve i‘tâk ve kayd-ı rıkkıyetden ıtlâk ve kazâ-yı hürriyete idrâc ve ilhâk eyledi min-ba‘d mevsûfe-i mezbûre Timurhan sâir harâir-i asliyât gibi hürre olmuşdur dedikde vâki‘ hâli mezbûr Ebûbekir Efendi mahâllinde tahrîr edip ba‘dehû ma‘an ba‘s olunan Ali b. Bali ve Receb b. Osman ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-şehri Ramazani’l-mübârek li-sene seb‘a ve miete ve elf. Şuhûdü’l-hâl: Fahrü’l-a‘yân Ahmed Efendi b. Yusuf, Ahmed Çelebi b. ( ), Uzun Halil Ağa, Hüseyin Efendi b. ( ), Hüseyin Ağa b. Receb.