İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 276 Hüküm no: 177 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sayda Valisi Mustafa Paşa’nın mühürdarı Hacı Mehmed Ağa’nın, verasete ait eşya ve cariyeyi Dilaver b. Abdullah’tan teslim aldığı Silâhşör-i şehriyârî iken bundan akdem vedâ‘-ı âlem-i fânî eden merhûm İbşir Ağa’nın hayatında hizmetinde iken medîne-i Edirne’de fevt olan Gürciyyü’l-asl Süleyman b. Abdullah’ın verâseti min-ciheti’l-usûbeti’n-nesebiye kendiyi i‘tâk eden merhûm Selim Efendi b. Mahmud’un sulbî kebîr oğlu olup hâlâ Sayda vâlîsi sa‘âdetlü Mustafa Paşa hazretlerinin mühürdârı el-Hâc Mehmed Ağa’ya münhasıra olduğu şer‘an zâhir ve müte‘ayyen oldukdan sonra mezbûr el-Hâc Mehmed Ağa’nın vâlidesi ve tarafından husûs-ı âti’z-zikre vekîl olduğu kendi zâtını ârifân Abdullah Ağa b. Abdullah ve Hasan Bey b. Mehmed şehâdetleriyle şer‘an sâbit olan Fâtıma Hatun bt. Zülfikar dîvân-ı kāimmakām-ı hazret-i sadrazamîde ma‘kūd meclis-i [şer‘-i] şerîf-i enverde medîne-i mezbûre sâkinlerinden olup müteveffâ-yı mezbûr Süleyman’ın babalığı işbu râfi‘u’l-kitâb Dilaver b. Abdullah nâm kimesne mahzarında bi’l-vekâle ikrâr-ı tâm ve takrîr-i kelâm edip müteveffâ-yı mezbûr Süleyman hâl-i hayatında yedinde mülk ve hakkı olan eşyâsından on sekiz zirâ‘ londra çuka ve bir çuka perde ve bir sîm akreb sâ‘at ve iki donluk kumaş ve bir top yeşil kutnî ve bir köhne astar ve iki yastık yüzü ve üç yemenî mak‘ad ve iki çift kadife yastık ve iki kalembeg tesbih ve orta Selanik keçesi ve bir sagīr yan keçesini ve bir tüfenk ve bir fânus ve dört lengeri ve beş sahan ve bir ibrik ve bir sagīr ibrik ve bir tas ile Rusiyyetü’l-asl Fâtıma nâm câriye-i memlûkesini merkūm Dilaver’e îdâ‘ ve teslîm ol dahi ahz u kabz ve yedinde iken mezbûr Süleyman fevt oldukda mezbûr İbşir Ağa sefer-i hümâyûnda bulunmağla mezbûr İbşir Ağa müteveffâ-yı mezbûr Süleyman’ın vârisi zu‘muyla merkūm Dilaver eşyâ-yı mezbûre ile câriye-i merkūmeyi merkūmun menzil kethudâsı ve vekîli işbu hazır bi’l-meclis Abdullah Çelebi b. Abdullah’a def‘ u teslîm ol dahi ahz u kabz ve mezbûr İbşir Ağa’ya sefer-i hümâyûndan geldikde def‘ u teslîm ol dahi ba‘de’l-kabz yedinde iken fevt olmağla kızı sagīre Rukiye’nin vasîsi olan işbu hazır bi’l-meclis Mustafa Ağa b. Ali dahi eşyâ-i mezbûre ile câriye-i merkūmeyi mezbûr İbşir Ağa’nın mülkü olmak üzere bi’l-vesâye kabz ve terekesi ile ma‘an sûk-ı sultânîde bey‘ ve kabz-ı semen etmişdi hâlâ zikrolunan eşyâ ve câriyenin kıymet-i şer‘iyelerini vasîyy-i mezbûrdan tazmîn ve ahz etmekle eşyâ-yı mezbûreye ve sâire müte‘allika âmme-i da‘vâdan merkūm Dilaver’in zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim min-ba‘d mezbûr Dilaver ile vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-şehri Ramazani’l-mübârek li-sene seb‘a ve mie ve elf. Şuhûdü’l-hâl: Hasan Ağa b. Nasuh, Ali Çavuş b. Mehmed, Attar Ömer Çelebi b. ( ), Na‘lband Mustafa, el-Hâc Mehmed Na‘lband.