İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 279 Hüküm no: 179 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sekbanbaşı Murtaza Ağa b. Hâşim’in satın aldığı köle Osman b. Abdullah’ın köle olmadığı ispat edildiğinden ödediği paranın Bosnalı Mehmed Efendi’nin terekesinden tahsili Sâbıkā sekbânbaşı olan umdetü’l-emâcid ve’l-ekârim Murtaza Ağa b. Hâşim tarafından husûs-ı âti’z-zikre vekîl olduğu Mehmed Efendi b. Abdi ve el-Hâc Yusuf b. Abdullah şehâdetleriyle hasm-ı şer‘î-i câhid mahzarında şer‘an sâbit ve sübût-ı vekâletine hükm-i şer‘î lâhık olan menzil kethudâsı Ahmed Ağa b. Ali meclis-i şer‘-i şerîf-i enverde sâbıkā Mekke-i Mükerreme kadısı oldukdan sonra vedâ‘-ı âlem-i fânî eden Bosnevî merhûm Mehmed Efendi’nin sulbî kebîr oğlu ve hasren vârisi olmağla tereke-i vâfiyesine vâzı‘u’l-yed olan Mehmed Efendi mahzarında bi’l-vekâle üzerine da‘vâ ve takrîr-i kelâm edip merhûm-ı mûmâ-ileyh Bosnevî Mehmed Efendi mukaddemâ hâl-i hayatında orta boylu açık kaşlı elâ gözlü Osman b. Abdullah’ı rıkk olup abd-i memlûku olmak üzere müvekkilim mûmâ-ileyh Hâşimzâde Mustafa Ağa’ya yüz otuz guruşa bey‘ ve teslîm ol dahi iştirâ ve tesellüm ve def‘-i semen-i mezbûr edip yedinde iken mevsûf-ı mezkûr Osman vilâyet-i Rumeli’nde Seksar kazâsına tâbi‘ Kakoz nâm karye sükkânından olup hürrü’l-asl olan Nikola v. Yanaki nâm zimmînin firâşından hâsıl ve zevce-i menkûhası olup hürretü’l-asl olan Roşise bt. Manol nâm nasrâniyeden mütevellid sulbî oğlu olup kendiye ve ebeveynine kat‘a rıkk târî olmamış hürrü’l-asl olduğunu işbu târih-i kitâb şehrü’l-mübârekinin on yedinci günü mahmiye-i mezbûrede Balat mahkemesinde nâibü’ş-şer‘i’ş-şerîf olan Abdüllatif Efendi huzûrunda benim muvâcehemde da‘vâ edip ben dahi inkâr etmekle mevsûf-ı mezbûr Osman dahi müdde‘âsını udûl-i Müslimînden ve fi’l-asl kasaba-i Seksar merhûm Sultân Selim Câmi‘-i şerîf’inde imâm olup mahmiye-i İstanbul’da Emir Buhârî mahallesinde müsâferet vechi üzere sâkinler olan Ahmed Efendi b. Mehmed ve câmi‘-i mezkûrda müezzin olan Ömer Halîfe b. Kenan şehâdetleriyle benim muvâcehemde şer‘an isbât etmekle mevsûf-ı mezkûrun hürriyetine hükm-i hâkimü’ş-şer‘ lâhık olup sebîli tahliye olunmağla bâyi‘-i mûmâ-ileyh Bosnevî Mehmed Efendi mukaddemâ fevt olup tereke-i vâfiyesine oğlu işbu Mehmed Efendi vâzı‘u’l-yed bulunmağla babası merhûm-ı mezbûrun semen deyü makbûzu olan <> meblağ-ı mezbûru terekesinden bi’l-mürâca‘atın taleb eylediğimde bana teslîmden imtinâ‘ eder hâlâ suâl olunup meblağ-ı mezbûru tereke-i müteveffâ-yı mezbûrdan bana redd ü teslîme mezbûr Mehmed Efendi’ye <> tenbîh olunmak matlûbumdur dedikde gıbbe’s-suâl mezbûr Mehmed Efendi cevâbında babası merhûm-ı mezbûr Mehmed Efendi mevsûf-ı mezbûr Osman’ı rıkk olmak üzere Kemânî Mehmed Ağa’dan yüz elli guruş semen-i medfû‘a ba‘de’l-iştirâ müvekkil-i mezbûr Murtaza Ağa’ya yüz otuz guruşa bey‘ ve kabz-ı semen eylediğini ve babası merhûm-ı mezbûr Bosnevî Mehmed Efendi kable reddi’s-semen fevt olmağla tereke-i vâfiyesine kendinin vaz‘-ı yedini ikrâr lâkin mevsûf-ı mezkûrun bâlâda tafsîl olunan vech üzere hürriyetine hükm-i hâkimü’ş-şer‘ lâhık ve sebîli tahliye olunduğunu ve ber-vech-i muharrer sebîli tahliye olunan bi-aynihî mevsûf-ı mezbûr Osman idiğini inkâr edicek vekîl-i mezbûrdan müdde‘âsına mutâbıka beyyine taleb olundukda udûl-i Müslimînden olup mahmiye-i mezbûrede Akşemseddin mahallesinde sâkin es-Seyyid Hüseyin Ağa b. Şahin ve el-Hâc Yusuf b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mevsûf-ı mezbûr Osman müvekkil-i mûmâ-ileyh Murtaza Ağa’nın yedinde iken târih-i kitâb şehrü’l-mübârekinin on yedinci günü Balat mahkemesinde nâibü’ş-şer‘ olan mûmâ-ileyh Abdüllatif Efendi huzûrunda fi’l-asl vilâyet-i Rumeli’nde Seksar kazâsına tâbi‘ Kakoz nâm karye sükkânından olup hürrü’l-asl olan mezbûr Nikola v. Yanaki’nin firâşından hâsıl ve zevce-i menkûhası olup hürretü’l-asl olan mezbûre Roşise bt. Manol’dan mütevellid sulbî oğlu olup kendiye ve ebeveynine kat‘a rıkk târî olmamış hürrü’l-asl olduğunu da‘vâ ve müdde‘âsını kasaba-i mezbûrede merhûm Sultân Süleyman Câmi‘-i şerîf’inde imâm olup mahmiye-i mezbûrede Emir Buhârî mahallesinde müsâfiren sâkinler olan Ahmed Efendi b. Mehmed ve câmi‘-i mezkûrda müezzin olan Ömer Halîfe b. Kenan şehâdetleriyle işbu vekîl-i mezkûr muvâcehesinde şer‘an isbât edip mevsûf-ı mezbûr Osman’ın ber-vech-i muharrer hürriyetine bizim huzûrumuzda hükm-i hâkimü’ş-şer‘ lâhık olup sebîli tahliye <> olunmuşidi ve ber-vech-i muharrer hürriyetine hükm-i hâkim lâhık olup sebîli tahliye <> olunan gulâm merhûm-ı mezbûr Bosnevî Mehmed Efendi’nin müvekkil-i mezbûr Murtaza Ağa’ya meblağ-ı mezbûr yüz otuz guruşa semen-i makbûza bey‘ eylediği bi-aynihî merkūm Osman’dır biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Ramazani’l-mübârek li-sene seb‘a ve mie ve elf. Şuhûdü’l-hâl: es-Seyyid Ebûbekir Çavuş, İbrahim Çelebi b. Ahmed, Mehmed Çelebi b. Mehmed, Ali b. Bali , Mahmud b. Osman, Hüseyin b. Mustafa ve gayruhum mine’l-huzzâr.